រាជធានីភ្នំពេញ ៖ សាកសពក្មេងប្រុសម្នាក់ ដែលគេប្រទះឃើញនៅគំនរសំរាមក្បែរចិញ្ចើមផ្លូវជាតិលេខ៦អា បន្ទាប់ពីត្រួតពិនិត្យយ៉ាងល្អិតល្អន់ត្រូវបានសមត្ថកិច្ច និងក្រុមគ្រូពេទ្យសន្និដ្ឋានថា ជាករណីឃាតកម្ម ស្លាប់ដោយប៉ះទង្គិចក្បាលធ្ងន់ធ្ងរ ។ ហេតុការណ៍នេះ…
រាជធានីភ្នំពេញ ៖ សាកសពក្មេងប្រុសម្នាក់ ដែលគេប្រទះឃើញនៅគំនរសំរាមក្បែរចិញ្ចើមផ្លូវជាតិលេខ៦អា បន្ទាប់ពីត្រួតពិនិត្យយ៉ាងល្អិតល្អន់ត្រូវបានសមត្ថកិច្ច និងក្រុមគ្រូពេទ្យសន្និដ្ឋានថា ជាករណីឃាតកម្ម ស្លាប់ដោយប៉ះទង្គិចក្បាលធ្ងន់ធ្ងរ ។
ហេតុការណ៍នេះ បង្កឲ្យមានការភ្ញាក់ផ្អើល កាលពីវេលាម៉ោង៣ និង១៥នាទីរសៀលថ្ងៃទី១៦ ខែមករា ឆ្នាំ២០២៦ នៅតាមផ្លូវជាតិលេខ៦អា ក្នុងភូមិបាក់ខែង សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ។
សាកសពក្មេងប្រុសរូបនោះ ពុំទាន់ស្គាល់អត្តសញ្ញាណឡើយ អាយុប្រហែល៤ទៅ៥ឆ្នាំ កំពស់០,៩០ម៉ែត ។ តាមសាក្សីបានអោយដឹងថា នៅមុនពេលកើតហេតុ មានអ្នកដំណើរឆ្លងកាត់ក៏បានប្រទះឃើញសាកសពក្មេងប្រុស មានលក្ខណៈហើមស្អុយត្រូវបានគេគ្របកន្សែងពោះគោ ពណ៌.ស រួចរាយការណ៍ប្រាប់សមត្ថកិច្ច។ បន្ទាប់ពីភ្ញាក់ផ្អើល សមត្ថកិច្ចជំនាញនិងអង្គការ CPU បានចុះធ្វើការត្រួតពិនិត្យ។
តាមការត្រួតពិនិត្យសាកសពមានសភាពហើម ស្អុយរលួយ និងមានស្នាមជាំនៅថ្ងាសចំហៀងខាងឆ្វេង , ជាំនៅខ្នងក្រោមកញ្ចឹងក, ជាំនៅដើមដៃខាងឆ្វេង និងកំភួនដៃខាងឆ្វេង,ជាំនៅភ្លៅខាងស្ដាំ។
បន្ទាប់ពីត្រួតពិនិត្យលោកឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមតុលាការរាជធានីភ្នំពេញ បានសន្និដ្ឋានថា ជាករណីឃាតកម្ម (ស្លាប់ដោយប៉ះទង្គិចក្បាលធ្ងន់ធ្ងរ)។ ទោះបីជាយ៉ាងណា គេពុំដឹងថា ក្មេងប្រុសនោះមានរឿងអ្វីឡើយ បានជាឃាតករសម្លាប់ហើយយកសពទៅបោះចោល។
ជុំវិញករណីឃាតកម្មនេះ សមត្ថកិច្ចមានការសង្ស័យថា ក្មេងប្រុសរូបនោះអាចមានទំនាស់វាយតប់គ្នាជាមួយក្មេងៗ ហើយក្មេងបានរុញដួលបោកក្បាលសន្លប់ ហើយទៅបោះចោលបណ្តាលអោយស្លាប់តែម្តង ។ សពត្រូវបាននគរបាលបញ្ជូនទៅកាន់ឈាបនដ្ឋានវត្តបាក់ខែងបូជាតាមប្រពៃណី៕
ចែករំលែកព័តមាននេះ