ខេត្តរតនគិរី ៖ យោងតាមមន្ទីរព័ត៌មានខេត្តរតនគិរីបានឱ្យដឹងថា យុវជនឈាមរាវ(ក្មេងទំនើង) ដែលធ្វើសកម្មភាពវាយកំទេចម៉ូតូអ្នកដទៃដោយចេតនា កាលវេលាម៉ោង១០ព្រឹកថ្ងៃទី១៦ មករា នៅមុខវិទ្យាល័យសម្តេចហ៊ុន សែនភូមិថ្មី ក្រុងបាន…
ខេត្តរតនគិរី ៖ យោងតាមមន្ទីរព័ត៌មានខេត្តរតនគិរីបានឱ្យដឹងថា យុវជនឈាមរាវ(ក្មេងទំនើង) ដែលធ្វើសកម្មភាពវាយកំទេចម៉ូតូអ្នកដទៃដោយចេតនា កាលវេលាម៉ោង១០ព្រឹកថ្ងៃទី១៦ មករា នៅមុខវិទ្យាល័យសម្តេចហ៊ុន សែនភូមិថ្មី ក្រុងបាន លុង ហើយរត់គេចខ្លួនបាត់ ។
ក្រោមបទបញ្ជាដ៏ម៉ឺងម៉ាត់របស់ឯកឧត្តម ញ៉ែម សំអឿន អភិបាលខេត្តរតនគិរី និងជាប្រធានគណៈបញ្ជាការឯកភាពខេត្ត ក្នុងនោះ ស្នងការនគរបាលខេត្ត លោកឧត្តមសេនីយ៍ទោ អ៊ុង សុភាព បានណែនាំដល់កំលាំងសមត្ថកិច្ចដឹកនាំផ្ទាល់ដោយលោក មាស ពៅបូរ៉ា ស្នងការរងទទួលបន្ទុកព្រហ្មទណ្ឌកំរិតស្រាល នៃស្នងការដ្ឋានខេត្តនិងដោយមានការសម្របសម្រួលនីតិវិធីពី ឯកឧត្ដម ឡុង ហុកម៉េង ព្រះរាជអាជ្ញា នៃអយ្យការអមសាលាដំបូងខេត្តរតនគិរី កម្លាំងសមត្ថកិច្ចបានធ្វើការឃាត់ខ្លួនជនសង្ស័យចំនួន២នាក់ ពាក់ព័ន្ធករណី ធ្វើឲ្យខូចខាតទ្រព្យសម្បត្តិអ្នកដទៃដោយចេតនា ។
ក្រោមរូបភាពវាយម៉ូតូប្រើប្រាស់ដងឆត្រ និងមួកសុវត្ថិភាព ហេតុការណ៍នេះ បង្ករឡើងកាលពីវេលាម៉ោង១០ និង៣០នាទី ថ្ងៃទី១៦ ខែមករា ឆ្នាំ២០២៦ នៅចំណុចមុខសាលាវិទ្យាល័យសម្តេចហ៊ុនសែនភូមិថ្មី ស្ថិតនៅក្នុងភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី ។
តាមការបញ្ជាក់ពីលោកឧត្តមសេនីយ៍ត្រី មាស ពៅបូរ៉ា ស្នងការរង គឺក្រោយជនសង្ស័យដែលជាអ្នកដៃដល់បានធ្វើសកម្មភាពរួច រយៈពេល៣ម៉ោងក្រោយ កម្លាំងសមត្ថកិច្ចបានធ្វើការស្រាវជ្រាវកំណត់បានជនសង្ស័យ និងធ្វើការដេញតាមចាប់ឃាត់ខ្លួនបានចំនួន២នាក់ នៅវេលាម៉ោង ១៣ និង៤០នាទីរសៀល ថ្ងៃទី១៦ ខែមករា ឆ្នាំ២០២៦ រីឯបក្សពួកផ្សំគំនិតចំនួន៣នាក់ផ្សេងទៀតសមត្ថកិច្ចកំពុងស្រាវជ្រាវឃាត់ខ្លួនបន្ត ។
ចំពោះជនសង្ស័យចំនួន២នាក់ ដែលកំពុងត្រូវបានឃាត់ខ្លួនមានភិនភាគ ដូចតទៅ៖ ១.ឈ្មោះ ជា ល័ក្ខ ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិ៤ សង្កាត់កាចាញ ក្រុងបានលុង ខេត្តរតនគិរី ។ ២.ឈ្មោះ ភារិន សុខជាតិ ភេទប្រុស អាយុ១៥ឆ្នាំ ជនជាតិខ្មែរ មុខរបរសិស្ស មានទីលំនៅភូមិជ័យជំនះ សង្កាត់ឡាបានសៀក ក្រុងបានលុងខេត្តរតនគិរី ។
បច្ចុប្បន្ន ជនសង្ស័យទាំង២នាក់ ត្រូវបានឃាត់ខ្លួនជាបណ្ដោះអាសន្ន នៅការិយាល័យជំនាញរបស់ស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនទៅកាន់អយ្យការអមសាលាដំបូងខេត្តរតនគិរី ដើម្បីអនុវត្តទៅតាមនីតិវិធីច្បាប់ ៕
ចែករំលែកព័តមាននេះ