ទីក្រុងម៉ូស្គូ៖ លោកពូទីនចាប់ផ្ដើមលូកដៃចូលក្នុងបញ្ហាអ៊ីរ៉ង់ជាបណ្ដើរៗហើយបន្ទាប់ពីមានចលនាបាតុកម្មដ៏ពុះកញ្ជ្រោលដែលនាំទៅដល់ការស្លាប់មនុស្សរាប់ពាន់នាក់ត្រឹមតែរយៈពេលប៉ុន្មានថ្ងៃប៉ុណ្ណោះ។ ហេតុនេះ លោកពូទីនបានហៅទូរស័ព្ទទៅនាយករដ្ឋមន្ត្រីអ៊ីស្រាអែល និងប្រធានាធិបតីអ៊ីរ៉ង់ដាច់ដោយឡែកពីគ្នា។ លោកថ្លែងថារដ្ឋាភិបាលទីក្រុងម៉ូស្គូត្រៀមខ្លួនធ្វើជាអ្នកសម្របសម្រួលបញ្ហា។
អាជ្ញាធរអ៊ីរ៉ង់បានចាត់វិធានការបង្ក្រាបយ៉ាងចាស់ដៃទៅលើចលនាបាតុកម្មដែលផ្ទុះឡើងដំបូងកាលពីចុងខែធ្នូ។ លោកត្រាំព្រមានថាលោកអាចនឹងធ្វើអន្តរាគមន៍យោធានៅអ៊ីរ៉ង់បើមានមនុស្សស្លាប់កាន់តែច្រើនបែបនេះ។ កាលពីឆ្នាំមុន អ៊ីស្រាអែល និងអាមេរិកបានប្រឡូកនៅក្នុងសង្គ្រាមរយៈពេល១២ថ្ងៃជាមួយអ៊ីរ៉ង់ដោយបាញ់មីស៊ីលដាក់គ្នា និងគ្រាប់បែកទម្លាក់ពីលើយន្តហោះ។
ចាប់តាំងពីសង្គ្រាមអ៊ុយក្រែនផ្ទុះឡើងកាលពីឆ្នាំ២០២២ រុស្ស៊ីចាប់ផ្ដើមពង្រឹងទំនាក់ទំនងកាន់តែជិតស្និទ្ធជាមួយអ៊ីរ៉ង់។ ដ្រូនភាគច្រើនដែលរុស្ស៊ីប្រើប្រាស់សម្រាប់វាយប្រហារអ៊ុយក្រែនគឺជាផលិតផលរបស់អ៊ីរ៉ង់។ កាលពីឆ្នាំមុន លោកពូទីន និងប្រធានាធិបតីអ៊ីរ៉ង់បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្ររយៈពេល២០ឆ្នាំ។ មានន័យថាជួយគ្នាទៅវិញទៅមកនៅក្នុងករណីដែលភាគីហត្ថលេខីប្រឈមនឹងបញ្ហាអ្វីមួយ។
នៅក្នុងការសន្ទនាគ្នាជាមួយនាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ វិមានក្រឹមឡាំងថ្លែងថាលោកពូទីនបានបំផុសគំនិតស្ដីពីការលើកកម្ពស់ស្ថិរភាពនៅមជ្ឈិមបូព៌ា។ លោកក៏បានត្រៀមខ្លួនធ្វើជាអ្នកសម្របសម្រួលដោះស្រាយបញ្ហា និងលើកកម្ពស់ការសន្ទនាគ្នាបែបស្ថាបនាជាមួយភាគីពាក់ព័ន្ធទាំងអស់។ វិមានក្រឹមឡាំងថ្លែងថាសេចក្ដីលម្អិតនៃការសន្ទនាគ្នារវាងលោកពូទីន និងប្រធានាធិបតីអ៊ីរ៉ង់នឹងផ្សព្វផ្សាយជាលាយលក្ខណ៍អក្សរ។
ឥទ្ធិពលរបស់រុស្ស៊ីនៅមជ្ឈិមបូព៌ាក៏ពឹងផ្អែកទៅលើប្រទេសអ៊ីរ៉ង់ផងដែរ។ បើសិនទៅថ្ងៃមុខ អ៊ីរ៉ង់មានបញ្ហាធ្ងន់ធ្ងរដល់ថ្នាក់ផ្លាស់ប្ដូររបបដឹកនាំ រដ្ឋាភិបាលទីក្រុងម៉ូស្គូមុខជាបាត់បង់លំនឹងជាមិនខាន។ រុស្ស៊ីមិនអាចបណ្ដោយឱ្យបាត់បង់សម្ព័ន្ធមិត្តរបស់ខ្លួនទៀតទេបន្ទាប់ពីរបបដឹកនាំរបស់លោកអាល់អាសាតនៅប្រទេសស៊ីរីដែលជាសម្ព័ន្ធមិត្តដ៏ធំរបស់រុស្ស៊ីបានដួលរលំកាលពីចុងឆ្នាំ២០២៤។ កាលពីដើមខែមករានេះ សម្ព័ន្ធមិត្តដ៏ធំមួយរបស់រុស្ស៊ីនៅអាមេរិកខាងត្បូងគឺលោកម៉ាឌូរ៉ូត្រូវយោធាអាមេរិកផ្ដួលរំលំពីអំណាច និងចាប់ខ្លួនទៅកាត់ទោសនៅទីក្រុងញូយ៉ក។ ដូច្នេះ វាធ្វើឱ្យប៉ះពាល់ឥទ្ធិពលរបស់រុស្ស៊ីមិនតិចទេ។
នៅពេលអ្នកសារព័ត៌មានសួរថាតើរុស្ស៊ីនឹងផ្ដល់ការគាំទ្រអ្វីខ្លះសម្រាប់អ៊ីរ៉ង់បើសិនជាមានរឿងធំកើតឡើង? អ្នកនាំពាក្យវិមានក្រឹមឡាំងថ្លែងថារុស្ស៊ីត្រៀមផ្ដល់ការគាំទ្រមិនចំពោះតែប្រទេសអ៊ីរ៉ង់មួយប៉ុណ្ណោះទេ ប៉ុន្តែគាំទ្រប្រទេសទាំងអស់នៅទូទាំងតំបន់មជ្ឈិមបូព៌ា។ ក្រឹមឡាំងថាការគាំទ្ររបស់រុស្ស៊ីគឺដើម្បីថែរក្សាស្ថិរភាព និងសន្តិភាពនៅក្នុងតំបន់។ នេះជាផ្នែកមួយនៃកិច្ចខិតខំប្រឹងប្រែងរបស់លោកពូទីនដើម្បីបន្ធូរបន្ថយភាពតានតឹងនៅក្នុងតំបន់៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ