រាជធានីភ្នំពេញ ៖ អ្នកសារព័ត៌មានម្នាក់ស្ទើរអស់ជីវិត នៅក្នុងពេលលោកកំពុងឈរថតរូបឡាយព័ត៌មានក្នុងឧប្បត្តិហេតុគ្រោះថ្នាក់ចរាចរណ៍មួយ ស្ថិតនៅតាមមហាវិថីសម្ដេចតេជោ (ផ្លូវ៦០ម៉ែត្រ) ត្រង់ចំណុចខាងត្បូងផ្សារអ៊ីអន៣ សង្កាត់ជើងឯក ខណ្ឌដង្កោ រាជធានីភ្នំពេញ…
រាជធានីភ្នំពេញ ៖ អ្នកសារព័ត៌មានម្នាក់ស្ទើរអស់ជីវិត នៅក្នុងពេលលោកកំពុងឈរថតរូបឡាយព័ត៌មានក្នុងឧប្បត្តិហេតុគ្រោះថ្នាក់ចរាចរណ៍មួយ ស្ថិតនៅតាមមហាវិថីសម្ដេចតេជោ (ផ្លូវ៦០ម៉ែត្រ) ត្រង់ចំណុចខាងត្បូងផ្សារអ៊ីអន៣ សង្កាត់ជើងឯក ខណ្ឌដង្កោ រាជធានីភ្នំពេញ កាលពីវេលាម៉ោង៧ព្រឹកថ្ងៃទី១៦ ខែមករា ឆ្នាំ២០២៦ ។
លោក ទុយ ម៉ែន គឺជាអ្នកសារព័ត៌មាន Fresh News មួយរូប ដែលស្ទើរតែបាត់បង់ជីវិត ខណៈពេលដែលរូបលោក កំពុងឈរថតយករាយព័ត៌មានឧប្បត្តិហេតុគ្រោះថ្នាក់ចរាចរណ៍រថយន្ត Lexus RX-330 ១គ្រឿងបុករបាំងពុះចែកទ្រូង ផ្លូវ៦០ម៉ែត្រ។ នៅក្នុងពេលដែលលោក ទុយ ម៉ែន កំពុងឈរក្បែររបាំងថ្មដែលបាក់រាយប៉ាយនៅកណ្ដាលផ្លូវនោះ ស្រាប់តែមានរថយន្តស៊េរីទំនើប ១គ្រឿង ពណ៍ខ្មៅ ពាក់ស្លាកលេខភ្នំពេញ 2BZ-6699 មិនដឹងជាប្រញាប់ទៅណាទេ បានបើកបរក្នុងល្បឿនយ៉ាងលឿនដូចហោះ ក្នុងទិសដៅពីជើងទៅត្បូង វ៉ាជែងរថយន្ត១គ្រឿងផ្សេងទៀត ហើយចុចស៊ីផ្លេយ៉ាងរន្ថើនថែមទៀតផង ស្ទើរតែបុកអ្នកកាសែតរូបនោះទៅហើយ ។
ប៉ុន្តែខណៈនោះ អ្នកកាសែតខាងលើ បានគេចចេញផុតពីរថយន្តផ្ដាច់ព្រលឹងនោះ តែបន្តិចប៉ុណ្ណោះ ទើបបានរួចផុតពីសេចក្ដីស្លាប់ ប៉ុន្តែលោក ទុយ ម៉ែន រងការភិតភ័យខ្លាំងណាស់ ហើយអាចនិយាយបានថា ទឹកដោះម្ដាយថ្លៃ! ទើបរួចផុតពីសេចក្ដីស្លាប់ ចំណែករូបភាពនោះ ត្រូវបានថតដោយអ្នកកាសែតដូចគ្នា ដែលកំពុងថតឡាយព័ត៌មាន គ្រោះថ្នាក់ចរាចរណ៍ខាងលើនោះដែរ។ បន្ទាប់ពីមានហេតុការណ៍បែបនេះ លោក ទុយ ម៉ែន ក៏បានបង្ហោះនូវរូបភាពនោះ នៅក្នុងផេកហ្វេសប៊ុកផ្ទាល់ខ្លួនរបស់លោក អមដោយសំណេរខ្លី ដែលមានខ្លឹមថា «ជីវិតខ្ញុំថ្លៃ បានគេចផុត មិនដឹងបើកប្រញាប់ទៅណាទេ» ។
ក្រោយពីការបង្ហោះនោះ ក៏មានអ្នកចូលទៅខមិនច្រើន ឲ្យលោក ទុយ ម៉ែន មានការប្រុងប្រយ័ត្នខ្លួនផង ហើយក៏មានអ្នកខ្លះស្នើសុំឲ្យសមត្ថកិច្ចជួយស្រាវជ្រាវរករថយន្តនោះ ដើម្បីត្រួតពិនិត្យ និងអប់រំណែនាំដល់អ្នកបើកបររថយន្តនោះផងដែរ។ ក្រៅពីនេះ ក៏មានអ្នកយករូបភាពដ៏រន្ធត់នោះ ទៅបង្ហោះលើហ្វេសប៊ុករបស់ខ្លួនរៀងៗខ្លួន និងបានសរសេរខ្លឹមសារផ្សេងៗគ្នា ក្នុងមានដូចជា ៖
ទី១ ៖ ប្រញាប់ទៅណាលោកម្ចាស់ ? ក្នុងវីដេអូនេះ រថយន្តពណ៌ខ្មៅប្រញាប់ពេក បើកជែងស្ទើរបុកអ្នកសារព័ត៌មាន ពេលឈររាយការណ៍ព័ត៌មានគ្រោះថ្នាក់ចរាចរណ៍ រថយន្តបុកទ្រូងផ្លូវនៅមហាវិថីសម្តេចតេជោ ហៅផ្លូវ៦០ម៉ែត្រ។
ទី២ ៖ មិនដឹងបើកប្រញាប់ទៅណា រថយន្តស៊េរីទំនើបមួយគ្រឿងពាក់ស្លាកលេខភ្នំពេញ 2BZ 6699 បើកបរលឿនក្បែរនឹងបុកអ្នកព័ត៌មាន ខណៈកំពុងថតករណីគ្រោះថ្នាក់ចរាចរណ៍លើដងផ្លូវ៦០ម៉ែត្រ នៅព្រឹកថ្ងៃទី១៦ មករា ២០២៦ ។
ទី៣ ៖ ១លានសំណាង! ព្រលឹងចុងសក់ បើកឡានប្រមាថអាយុជីវិតអ្នកដទៃ សំណាងល្អគេចទាន់ ទុយ ម៉ែន ។
ទី៤ ៖ ជីវិតអ្នកសារព័ត៌មាន នៅលើដងផ្លូវប្រឈមនឹងគ្រោះថ្នាក់ ដូចជាព្រឹកមិញនេះ កុំតែគាត់គេចទាន់មិនដឹងជាយ៉ាងណាទេ ហើយអ្នកបើកបរក៏មិនដឹងថាប្រញ៉ាប់ទៅណា បើកលឿនណាស់! ។
ទី៥ ៖ ហេតុអ្វីប្រមាថជីវិតគេបែបនេះ មានឡានទំនើបបើកលើដងផ្លូវអស្ចារ្យណាស់មែនទេ មានឡានថ្លៃ តែចរិកធូរថ្លៃ ជីវិតអ្នកព័ត៌មានតាមចិញ្ចើមផ្លូវទើបយល់អារម្មណ៍មួយនេះ រថយន្តសេរីទំនើប១គ្រឿង ពាក់ស្លាកលេខភ្នំពេញ 2BZ-6699 បើកបរយ៉ាងលឿន និងវិះបុកអ្នកសារព័ត៌មាន Fresh News ម្នាក់ ខណៈកំពុងថត និងរាយការណ៍ពីករណីគ្រោះថ្នាក់ចរាចរណ៍មួយបានកើតឡើង នៅលើដងផ្លូវ៦០ម៉ែត្រ នាព្រឹកថ្ងៃទី១៦ ខែមករា ឆ្នាំ២០២៦ ។
ទី៦ ៖ ប្រយ័ត្នប្រយែងប្អូនទុយ ម៉ែន តាមល្បឿនរថយន្តនោះ គឺហួសល្បឿនកំណត់លើផ្លូវ៦០ម៉ែត្រហើយ សមត្ថកិច្ចអាចចាត់វិធានការបាន ៕
ចែករំលែកព័តមាននេះ