រាជធានីភ្នំពេញ ៖ ទឹកចិត្តឪពុកម្ដាយចំពោះកូន ពិតជាធំធេង ធំជាងមហាសាគរទៅទៀត ជាក់ស្ដែងប្ដីប្រពន្ធ១គូ ទោះបីជាកូនប្រុសរបស់គាត់ បានបាត់ខ្លួនអស់រយៈពេល៦ខែទៅហើយ និងពុំដឹងថា ស្លាប់ឬរស់ក្ដី…
រាជធានីភ្នំពេញ ៖ ទឹកចិត្តឪពុកម្ដាយចំពោះកូន ពិតជាធំធេង ធំជាងមហាសាគរទៅទៀត ជាក់ស្ដែងប្ដីប្រពន្ធ១គូ ទោះបីជាកូនប្រុសរបស់គាត់ បានបាត់ខ្លួនអស់រយៈពេល៦ខែទៅហើយ និងពុំដឹងថា ស្លាប់ឬរស់ក្ដី ក៏ពួកគាត់មិនបោះបង់ឡើយនៅតែព្យាយាមតាមស្វែងរកកូនគ្រប់ទីកន្លែងក្នុងក្ដីសង្ឃឹមថា នឹងបានរកឃើញកូនប្រុសនៅថ្ងៃណាមួយមិនខាន។ ដោយឡែក នៅវេលាម៉ោង៣រសៀលថ្ងៃទី១៦ ខែមករា ឆ្នាំ២០២៦ បន្ទាប់ពីដើររកគ្រប់កន្លែង មិនឃើញ ពួកគាត់ក៏បានកាន់រូបថតកូនម្នាក់១សន្លឹក ព្រមទាំងសំបុត្រកំណើតកូនប្រុសផង ធ្វើដំណើរទៅកាន់សាលាសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ទៅទីនោះដើម្បីអោយអាជ្ញាធរ និងនគរបាលឲ្យជួយស្វែងរកកូនប្រុសគាត់នោះផង ឬក៏បានប្រទះឃើញក្មេងប្រុសមានភិនភាគដូចក្នុងរូបថតនោះ សូមជួយផ្ដល់ដំណឹងដល់ពួកគាត់ដោយក្ដីអនុគ្រោះផង ។
ប្ដីប្រពន្ធ១គូនោះ បុរសជាប្ដីឈ្មោះ ប្រាក់ ចំរ៉ុង អាយុ៣៧ឆ្នាំ មុខរបរសន្តិសុខ មានស្រុកកំណើតនៅភូមិថ្នល់ ឃុំអមលាំង ស្រុកថ្ពង ខេត្តកំពង់ស្ពឺ។ ប្រពន្ធឈ្មោះ ថន ញ៉ អាយុ៤១ឆ្នាំ គ្មានមុខរបរទេ គាត់នៅចាំផ្ទះ និងមានស្រុកកំណើតនៅភូមិគុយ ឃុំដារ ស្រុកកំពង់លែង ខេត្តកំពង់ឆ្នាំង។ ចំណែកកូនប្រុស ដែលបាត់ខ្លួននោះឈ្មោះ ប្រាក់ ចាន់នី អាយុ១៣ឆ្នាំ បច្ចុប្បន្នគ្រួសារមួយនេះ ស្នាក់នៅផ្ទះជួល នៅភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ឪពុកម្ដាយខាងលើ បាននិយាយថា កូនប្រុសរបស់ពួកគាត់រូបនោះ បានបាត់ខ្លួនតាំងពីវេលាយប់ថ្ងៃទី១៩ ខែមិថុនា ឆ្នាំ២០២៥មកម្ល៉េះ បើគិតរហូតមកដល់ពេលនេះ មានរយៈពេល៦ខែមកហើយ។ នៅវេលាល្ងាចថ្ងៃនោះ កូនប្រុសរូបនេះ រួមជាមួយកូនស្រីម្នាក់ទៀត (២នាក់បងប្អូនបង្កើត) បានបណ្ដើរគ្នាចេញដើរពីផ្ទះទៅដើររើសអេតចាយ នៅតាមតំបន់នានា។ ដែលតាមទម្លាប់រាល់ថ្ងៃ កូនគាត់ទាំង២នាក់ ចេញពីផ្ទះនៅម៉ោង៦ល្ងាច ហើយម៉ោង៧ ឬ៨យប់ត្រលប់ចូលផ្ទះវិញហើយ ប៉ុន្តែថ្ងៃចុងក្រោយនោះ ស្រាប់តែឃើញតែកូនស្រីត្រលប់ទៅវិញតែម្នាក់ឯង ចំណែកកូនប្រុសច្បង អត់ឃើញទៅផ្ទះវិញសោះ ។
ពួកគាត់បាននិយាយបន្តថា ពេលពួកគាត់ សួរនាំកូនស្រី នាងប្រាប់ថា នាង និងបងប្រុស បានដើររើសអេតចាយនៅកន្លែងផ្សេងគ្នា ហើយនាង ក៏មិនដឹងថា តើបងប្រុស ទៅរើសអេតចាយនៅកន្លែងណាដែរ នាងស្មានថា បងប្រុសមកដល់ផ្ទះមុននាងបាត់ទៅហើយ។ ចាប់តាំងពីពេលនោះមក ពួកគាត់មានការព្រួយបារម្ភ ចំពោះសុវត្ថិភាពកូនប្រុសរូបនោះខ្លាំងណាស់ ក៏បានតាមរកកូនគ្រប់កន្លែង ដែលកូនធ្លាប់ទៅ និងកន្លែងនានា តែមិនឃើញសោះ ពួកគាត់បានកាន់រូបថត កូនដើរសួរគេឯងជាច្រើនកន្លែង ប៉ុន្តែពុំមានអ្នកបានឃើញទេ។ មិនតែប៉ុណ្ណោះ ក៏បានទៅតាមរកដល់ស្រុកកំណើតទាំងសងខាង ក៏នៅតែពុំឃើញទៀត ដោយមិនដឹងថា កូនប្រុសជាទីស្រលាញ់ កំពុងស្ថិតនៅទីណា និងមានសុខទុក្ខបែបណានោះទេ ពួកគាត់ពិតជានឹករលឹកកូនប្រុសខ្លាំងណាស់ ។
ប្ដីប្រពន្ធ១គូនេះ បានរៀបរាប់បន្តថា ទោះជាកូនបាត់ខ្លួនអស់រយៈពេល៦ខែ ទៅហើយក្ដី ប៉ុន្តែគាត់ពួកគាត់មិនបោះបង់ក្ដីសង្ឃឹមទេ ពួកគាត់នៅតែព្យាយាមតាមរកកូនពី១ថ្ងៃ ទៅ១ថ្ងៃ និងពី១ខែ ទៅ១ខែមិនឈប់ឡើយ ។ ជាចុងក្រោយនេះ ពួកគាត់បានសម្រេចចិត្តធ្វើដំណើរទៅកាន់សាលាសង្កាត់ចោមចៅទី៣ ខណ្ឌពោធិ៍សែនជ័យ ដើម្បីពឹងពាក់ឲ្យអាជ្ញាធរជួយស្វែងរកកូនប្រុសគាត់នោះផង ។ ពួកគាត់ក៏បាននាំយករូបថត និងសំបុត្រកំណើតកូនប្រុសទៅបង្ហាញឲ្យអាជ្ញាធរបានស្គាល់ ក្រែងថ្ងៃណាមួយប្រទះឃើញក្មេងប្រុស ដែលមានភិនភាគដូចក្នុងរូបថតនោះ សូមជួយផ្ដល់ដំណឹងដល់ពួកគាត់ផង ។
ដោយឡែក បុរសជាប្ដី បាននិយាយថា សព្វថ្ងៃនេះ គ្រួសារពួកគាត់មានជីវភាពក្រីក្រខ្លាំងណាស់ ទើបពួកគាត់បណ្ដែតបណ្ដោយឲ្យកូនប្រុស និងកូនស្រី ដែលនៅវ័យតូចៗនៅឡើយ ចេញដើររើសអេតចាយ ដើម្បីលក់ គ្រាន់បានប្រាក់ខ្លះចិញ្ចឹមជីវិត តែមិននឹកស្មានថា មានរឿងបែបនេះសោះ។ សព្វថ្ងៃនេះ រូបគាត់ ធ្វើជាសន្តិសុខយាម នៅឯម្ដុំផ្សារថ្មី បានប្រាក់មិនគ្រប់ការចំណាយផ្សេងនៅក្នុងគ្រួសារទេ មិនតែប៉ុណ្ណោះ កាលមុនគាត់មានកង់កញ្ចាស់ ១គ្រឿង គ្រាន់នឹងជិះចេញពីផ្ទះ ទៅធ្វើការនៅផ្សារថ្មីដែរ ប៉ុន្តែក្រោយមក កង់នោះ ត្រូវចោរលួចបាត់ទៀត។ ចាប់ពីពេលនោះមក គាត់គ្មានកង់ជិះទៅធ្វើការទៀតនោះឡើយ ប៉ុន្តែគាត់ ក៏មិនបានបោះបង់ចោលការងារនោះដែរ គាត់បានដើរទៅមកធ្វើការតាំងពីសង្កាត់ភ្នំពេញថ្មី រហូតដល់កន្លែងធ្វើការ នៅម្ដុំផ្សារថ្មី ជារៀងរាល់ថ្ងៃ ។
ដោយឡែក សប្បុរសជន២រូប ប្ដីឈ្មោះ សោម សង្ហា និងប្រពន្ធឈ្មោះ ទ្រី ស្រីមុំ មុខរបរលក់មាន់បំពងរស់នៅបុរីសែនមនោរម្យ ភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ។ ក្រោយពីបានស្ដាប់ការរៀរាប់របស់ប្ដីប្រពន្ធខាងលើគួរឲ្យអាណិតនោះ អ្នកទាំង២ ក៏បានផ្ដល់កង់ ១គ្រឿង ទៅឲ្យប្ដីប្រពន្ធ ដ៏កំសត់នេះ ដើម្បីបានជិះទៅធ្វើការងារ រកប្រាក់មកចិញ្ចឹមជីវិត និងផ្គត់ផ្គង់គ្រួសារតទៅទៀត ៕
ចែករំលែកព័តមាននេះ