ខេត្តព្រៃវែង ៖ មហាជនរិះគន់មន្ត្រីសមត្ថកិច្ចបណ្តែតបណ្តាយឲ្យឈ្មួញនាំសត្វមាន់រស់ និងស៊ុតមាន់ ស៊ុតទាពីប្រទេសវៀតណាម ឆ្លងដែនចូលមកតាមច្រករបៀងស្វាយអាង៉ោង ដូចគេហែកឋិន មិនឃើញស្ថាបន័មានសមត្ថកិច្ច ឬមន្ត្រីជំនាញណាមកពិនិត្យ ឬបង្ក្រាបឡើយ…
ខេត្តព្រៃវែង ៖ មហាជនរិះគន់មន្ត្រីសមត្ថកិច្ចបណ្តែតបណ្តាយឲ្យឈ្មួញនាំសត្វមាន់រស់ និងស៊ុតមាន់ ស៊ុតទាពីប្រទេសវៀតណាម ឆ្លងដែនចូលមកតាមច្រករបៀងស្វាយអាង៉ោង ដូចគេហែកឋិន មិនឃើញស្ថាបន័មានសមត្ថកិច្ច ឬមន្ត្រីជំនាញណាមកពិនិត្យ ឬបង្ក្រាបឡើយ ។ ករណីនេះបានកើតឡើងនៅវេលាម៉ោង ១១ និង ៣០នាទីព្រឹកថ្ងៃទី ១៦ ខែមករា ឆ្នាំ ២០២៦ នៅចំណុចច្រករបៀងស្វាយអាង៉ោង ឃុំចាម ស្រុកកំពង់ត្របែក ខេត្តព្រៃវែង ។
បើតាមប្រជាពលរដ្ឋដែលរស់នៅ ឃុំចាម បានលើកឡើងថា ក្រុមឈ្មួញ បានមកទិញមាន់រស់ពីប្រទេសវៀតណាមដឹកតាមម៉ូតូ ឆ្លងដែនចូលមកតាមច្រករបៀងស្វាយអាង៉ោង រួចលើកដាក់រថយន្តដឹកទៅភ្នំពេញ និងចែកចាយក្នុងស្រុកខេត្តព្រៃវែង ដោយពុំដែលឃើញមានមន្ត្រៅជំនាញ ឬស្ថាបន័មានសមត្ថកិច្ចណាមកពិនិត្យទេ ។
ពួកគាត់លើកឡើងទៀតថា បើសមត្ថកិច្ចបណ្តែតបណ្តោយឲ្យឈ្មួញនាំសត្វមាន់រស់ពីប្រទេសវៀតណាមចូលមកដោយគ្មានការត្រួតពិនិត្យដូច្នេះ ពួកគាត់ព្រួយបារម្ភអំពីសុវត្ថិភាពសុខភាព អ្នកបរិភោគ ជាពិសេសស៊ុតមាន់ស៊ុតទា ដែលក្រសួងហាមឃាត់មិនឲ្យនាំសាច់សត្វ ស៊ុតសត្វ និងផលិតផលដើមកំណើតអំពីសាច់សត្វ ក៏ប៉ុន្តែជាក់ស្តែង សមត្ថកិច្ចប្រចាំការនៅច្រកទ្វារព្រំដែនច្រករបៀងស្វាយអាង៉ោង បានបើកដៃឲ្យឈ្មួញដឹកសត្វមាន់រស់ ពងមាន់ ពងទា ឆ្លងដែនពីប្រទេសវៀតណាមចូលមករដ្ឋបាលស្រុកកំពង់ត្របែកយ៉ាងគគ្រឹកគគ្រេងដូចគេហែកឋិន ពុំមានមន្ត្រីជំនាញណាមកត្រួតពិនិត្យឡើយ សង្ស័យមាន់ឈឺផងក៏មិនដឹង ព្រោះគ្មានការពិនិត្យ ។
បើតាមម្ចាស់រថយន្តដឹកសត្វមាន់រស់ នោះបានប្រាប់អ្នកសារព័ត៌មានយើងថា គាត់គ្រាន់តែជាអ្នកស៊ីឈ្នួលគេទេ រថយន្តរបស់គាត់ដឹកក្នុង ១ថ្ងៃ ១ជើង ដាក់បាន ១៦០ទ្រុងទៅ ២០០ទ្រុង ដឹកយកទៅឲ្យថៅកែនៅស្រុកកំពង់ត្រែក និងបន្តដឹកទៅរាជធានីភ្នំពេញ ។ ចំណែកអ្នកដឹកស៊ុតមាន់ស៊ុតទា គឺពួកគេដឹកយកទៅឲ្យថៅកែគេស្តុករួចចែកចាយក្នុងខេត្ត និងដឹកតាមរថយន្តទៅរាជធានីភ្នំពេញដោយមន្ត្រីពេទ្យសត្វអ្នកចេញលិខិតបញ្ជាក់ (ពងមាន់ពងទាក្រុងស្រុក) ។
ទាក់ទិនករណីនេះដែរលោក ចិន វិសាល ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រម៉ាញ និងនេសាទ ខេត្តព្រៃវែង បានប្រាប់អ្នកសារព័ត៌មានយើងថា ចំពោះឈ្មួញនាំសត្វមាន់រស់ពីប្រទេសវៀតណាមឆ្លងដែនចូលតាមច្រករបៀងស្វាយអាង៉ោង ឃុំចាមស្រុកកំពង់ត្របែកនេះគេមានច្បាប់ រកស៊ីជាច្រើនឆ្នាំហើយ គឺថៅកែមាន់ឈ្មោះលោក កែរ ង៉ោ មានទីលំនៅភូមិកំពង់ត្របែកស្រុកកំពង់ត្របែកខេត្តព្រៃវែង ។
ទាក់ទិនករណីនេះដែរមិនអាចរកការបំភ្លឺពីលោក កែរ ង៉ោ ឈ្មួញនាំសត្វមាន់រស់ពីប្រទេសវៀតណាមឆ្លងដែនមករដ្ឋបាលស្រុកកំពង់ត្របែកបានទេ ដោយអ្នកបើកបររថយន្តដឹកមាន់ ប្រាប់ថា គ្រាន់តែជាអ្នកស៊ីឈ្នួលបើកបររថយន្តឲ្យគេមិនស្គាល់លេខទូរសព្ទ័ថៅកែទេ ចាំមេការមកទើបស្គាល់លេខទូរសព្ទ័ថៅកែ ។
មហាជនលើកឡើងថា ការនាំសត្វមាន់រស់ និងពងមាន់ពងទា ពីបរទេសចូលមកហើយគ្មានមន្ត្រីជំនាញត្រួតពិនិត្យបែបនេះតើសង្ឃឹមអ្វីទៅ សុវត្ថិភាពសុខមាលភាពអ្នកបរិភោគ ៕
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ