ប្រទេសអ៊ីរ៉ង់ ៖ បណ្ដាប្រទេសនៅឈូងសមុទ្រពែរ្ស៍ ពិសេស អារ៉ាប៊ីសាអូឌីត កាតា និងអូម៉ង់ បានរួមគ្នាបញ្ចុះបញ្ចូលប្រធានាធិបតីអាមេរិក លោកដូណាល់ត្រាំ កុំវាយប្រហារអ៊ីរ៉ង់…
ប្រទេសអ៊ីរ៉ង់ ៖ បណ្ដាប្រទេសនៅឈូងសមុទ្រពែរ្ស៍ ពិសេស អារ៉ាប៊ីសាអូឌីត កាតា និងអូម៉ង់ បានរួមគ្នាបញ្ចុះបញ្ចូលប្រធានាធិបតីអាមេរិក លោកដូណាល់ត្រាំ កុំវាយប្រហារអ៊ីរ៉ង់ ឆ្លើយតបចំពោះការបង្ក្រាបដ៏បង្ហូរឈាមពួកបាតុករ ហើយព្រមានពីគ្រោះថ្នាក់ធ្ងន់ធ្ងរសម្រាប់តំបន់ ។ នេះជាការអះអាង កាលពីថ្ងៃទី១៥ មករា របស់អ្នកទទួលខុសត្រូវជាន់ខ្ពស់មួយរូបរបស់អារ៉ាប៊ីសាអូឌីត ។
ចាប់តាំងពីផ្ទុះចលនាតវ៉ាដ៏ធំពីថ្ងៃទី២៨ ធ្នូ មក ប្រធានាធិបតីអាមេរិក លោកដូណាល់ត្រាំ បានបង្កើនការគំរាមកំហែងធ្វើអន្តរាគមន៍យោធាប្រឆាំងអ៊ីរ៉ង់ តែកាលពីថ្ងៃទី១៤ មករាលោកត្រាំអះអាងថា បានទទួលព័ត៌មានថា ការសម្លាប់មនុស្សត្រូវបានបញ្ចប់ និងថា ការប្រហារជីវិតពួកបាតុករដែលចាប់ខ្លួនទីបំផុតក៏មិនមានដែរ ។
ប្រឈមមុខនឹងចលនានោះ ដែលជាចលនាបះបោរធំបំផុតមួយពុំធ្លាប់មាន តាំងពីការបង្កើតសាធារណរដ្ឋអ៊ិស្លាមអ៊ីរ៉ង់ពីឆ្នាំ១៩៧៩ មក បណ្ដាក្រុមអ្នកការពារសិទ្ធិមនុស្ស ចោទប្រកាន់អាជ្ញាធរអ៊ីរ៉ង់ថា ធ្វើដោយសំងាត់ការបង្ក្រាប ដែលបណ្ដាលឲ្យមនុស្សស្លាប់ច្រើនពាន់នាក់រួចហើយ។
នាថ្ងៃទី១៥ មករា ភាពស្ងប់ស្ងាត់ និងប្រក្រតីភាពកើតមានឡើងវិញទាំងស្រុងនៅក្រុងតេហេរ៉ង់ ហើយពុំមានបាតុកម្មធំដុំណាមួយក្នុងប្រទេសតាំងពីច្រើនថ្ងៃមកហើយ ។ បន្ទាប់ពីបាតុកម្មដ៏ពុះកញ្ជ្រោលកាលពីចុងសប្ដាហ៍កន្លងទៅ អាជ្ញាធរអ៊ីរ៉ង់បានរៀបចំកាលពីថ្ងៃទី១៤មករា នូវពិធីដើរហែក្បួនតស៊ូជាតិនិងពិធីបុណ្យសព សមាជិកកងកម្លាំងសន្តិសុខជាង១០០នាក់ដែលស្លាប់ ក្នុងការប៉ះទង្កិចគ្នាជាមួយពួកបាតុករ។ ពិធីនោះចូលរួមដោយពលរដ្ឋអ៊ីរ៉ង់ច្រើនពាន់នាក់ ។
តាមរដ្ឋមន្ត្រីការបរទេសអ៊ីរ៉ង់ថា ភាពស្ងប់ស្ងាត់ពេលនេះ កើតមានឡើងវិញក្នុងប្រទេស ហើយអាជ្ញាធរត្រួតត្រាសភាពការណ៍បានទាំងស្រុង ។ នៅក្រុងតេហេរ៉ង់ អាជ្ញាធរតុលាការបានសន្យាពីកាត់ក្ដីដោយរហ័ស និងជាសាធារណៈបណ្ដាបាតុករដែលត្រូវចាប់ខ្លួន ៕
ចែករំលែកព័តមាននេះ