វេណេស៊ុយអេឡា-អាមេរិក ៖ មេដឹកនាំប្រឆាំងវេណេស៊ុយអេឡា លោកស្រីម៉ារីយ៉ាកូរីណាម៉ាឆាដូ ថ្លែងកាលពីថ្ងៃទី១៥ មករា ថា លោកស្រីបានផ្ទេរពានរង្វាន់ណូបែលសន្តិភាពឆ្នាំ២០២៥ ដែលលោកស្រីបានទទួល ជូនទៅប្រធានាធិបតីអាមេរិក…
វេណេស៊ុយអេឡា-អាមេរិក ៖ មេដឹកនាំប្រឆាំងវេណេស៊ុយអេឡា លោកស្រីម៉ារីយ៉ាកូរីណាម៉ាឆាដូ ថ្លែងកាលពីថ្ងៃទី១៥ មករា ថា លោកស្រីបានផ្ទេរពានរង្វាន់ណូបែលសន្តិភាពឆ្នាំ២០២៥ ដែលលោកស្រីបានទទួល ជូនទៅប្រធានាធិបតីអាមេរិក លោកដូណាល់ ត្រាំវិញ ក្នុងឱកាសដែលអ្នកទាំង២ជួបគ្នានៅសេតវិមាន ។ ការផ្ទេរបែបនេះ លោកស្រីថា ជាការដឹងគុណចំពោះលោកត្រាំ ដែលបានសន្យាជួយប្រទេសលោកស្រីឲ្យមានសេរីភាព ។
នៅវិមានកាពីតូល ក្រោយពីលោកស្រីជួបជាមួយបណ្ដាសមាជិកសភាអាមេរិក លោកស្រីបានថ្លែងនៅមុខបណ្ដាអ្នកកាសែតថា ខ្ញុំប្រគល់ជូនប្រធានាធិបតីអាមេរិក ពានរង្វាន់ណូបែលសន្តិភាពដែលខ្ញុំទទួលបាន ។ លោកស្រីបន្តថា ខ្ញុំបានអះអាងប្រាប់លោកត្រាំថា ប្រជាជនវេណេស៊ុយអេឡា ចង់រស់នៅក្នុងសេរីភាព ដោយថ្លៃថ្នូរនិងក្នុងយុត្តិធម៌។ បែបនេះគេត្រូវការលទ្ធិប្រជាធិបតេយ្យ ។
ខាងអាមេរិកវិញ អ្នកនាំពាក្យសេតវិមាន លោកស្រីការ៉ូលីនលីវីតបានពន្យល់ថា លោកស្រីម៉ារីយ៉ាកូរីណាម៉ាឆាដូ ពិតជាមានសំឡេងគួរឲ្យកត់សម្គាល់ និងគួរឲ្យលើកទឹកចិត្ត សម្រាប់ពលរដ្ឋវណេស៊ុយអេឡាជាច្រើន ។ មុនការជួបគ្នាជាមួយមេដឹកនាំប្រឆាំងវេណេស៊ុយអេឡារូបនោះ លោកត្រាំបានថ្លែងទៅកាន់ទូរទស្សនFOX NEWSថា នោះជាមហាកិត្តិយសមួយសម្រាប់លោក ប្រសិនបើគេព្រមប្រគល់ពានរង្វាន់នេះ ឬចែករំលែងគ្នាជាមួយលោក ដោយលោករំឭកថាលោកពិតជាចង់បានពាននោះ ។
នាល្ងាចថ្ងៃទី១៥ មករា នោះ លោកត្រាំបានសម្ដែងការអបអរសាទរចំពោះកាយវិការដ៏អស្ចារ្ស
នោះរបស់ លោកស្រីម៉ារីយ៉ាកូរីណាម៉ាឆាដូ ។ លោកថា លោកស្រីបានប្រគល់ពាននោះ ដល់រូបខ្ញុំដោយសារការងារដែលខ្ញុំបានបំពេញ ។ នោះជាកាយវិការដ៏អស្ចារ្យនៃការគោរពគ្នាទៅវិញទៅមក ។ អរគុណលោកស្រីម៉ារីយ៉ា។
ចំណែកប្រធានាធិបតីស្ដីទីវេណេស៊ុយអេឡា លោកស្រីដែលស៊ីរ៉ូឌ្រីហ្គេស ក្នុងសុន្ទរកថាមួយទៅកាន់ប្រជាជាតិ កាលពីថ្ងៃទី១៥មករា លើកឡើងពីការកែប្រែមួយផ្នែកច្បាប់ស្ដីពីប្រេងកាត ៕
ចែករំលែកព័តមាននេះ