សុខភាព៖ យោងតាមការផ្សាយរបស់សារព័ត៌មានបរទេស បច្ចុប្បន្ននេះ ជំងឺខ្សោយតម្រងនោមលែងជារឿងរបស់មនុស្សចាស់ទៀតហើយ ដោយសារយុវវ័យជាច្រើនកំពុងប្រឈមមុខនឹងហានិភ័យនេះកាន់តែខ្លាំងតាមរយៈទម្លាប់រស់នៅមិនល្អប្រចាំថ្ងៃ។

កត្តាចម្បងបំផុតដែលកំពុងបំផ្លាញតម្រងនោមដោយមិនដឹងខ្លួន គឺរបបអាហារដែលសម្បូរទៅដោយជាតិប្រៃ និងជាតិផ្អែមហួសកម្រិត។ ការទទួលទានអាហាររហ័សដែលមានជាតិសូដ្យូមខ្ពស់ បង្ខំឱ្យតម្រងនោមត្រូវធ្វើការធ្ងន់ហួសកម្លាំងដើម្បីចម្រោះជាតិពុល ខណៈដែលការញ៉ាំភេសជ្ជៈផ្អែមខ្លាំងដូចជាតែគុជ ឬទឹកក្រូចកំប៉ុង បង្កើនហានិភ័យនៃជំងឺទឹកនោមផ្អែមប្រភេទទី២ ដែលជាមេខ្លោងបង្កឱ្យមានជំងឺខ្សោយតម្រងនោមរ៉ាំរ៉ៃ។

ទន្ទឹមនឹងរបបអាហារ ការខ្វះជាតិទឹក និងការទប់នោមក៏ជាមូលហេតុបង្កគ្រោះថ្នាក់ខ្លាំងផងដែរ។ នៅពេលរាងកាយមិនទទួលបានទឹកគ្រប់គ្រាន់ ទឹកនោមនឹងមានសភាពខាប់ខ្លាំង ដែលងាយបង្កជាក្រួសក្នុងតម្រងនោម និងការកកកុញជាតិពុល។ ចំណែកការទប់នោមវិញ គឺជាការផ្ដល់ឱកាសឱ្យបាក់តេរីលូតលាស់ក្នុងផ្លូវទឹកនោម ដែលអាចរាលដាលដល់ការខូចមុខងារតម្រងនោមក្នុងរយៈពេលវែង។ ក្រៅពីនេះ ការប្រើប្រាស់ថ្នាំបំបាត់ការឈឺចាប់ ឬថ្នាំផ្សះដោយគ្មានវេជ្ជបញ្ជាត្រឹមត្រូវ ក៏ប្រៀបដូចជាការលេបថ្នាំពុលបំផ្លាញតម្រងនោមដោយផ្ទាល់ ប្រសិនបើប្រើប្រាស់ក្នុងកម្រិតលើសកំណត់ ឬប្រើរយៈពេលយូរ។

លើសពីនេះ កង្វះសកម្មភាពរាងកាយ និងការសម្រាកមិនគ្រប់គ្រាន់ ក៏ជាសត្រូវលាក់មុខរបស់តម្រងនោមផងដែរ។ ការអង្គុយមួយកន្លែងយូរពេកបង្កើនហានិភ័យនៃជំងឺលើសឈាម ដែលជាកត្តាប៉ះពាល់ដល់សរសៃឈាមតម្រងនោម ចំណែកការគេងយប់ជ្រៅ និងភាពតានតឹងរ៉ាំរ៉ៃ រំខានដល់វដ្តនៃការជួសជុលកោសិកាតម្រងនោមតាមធម្មជាតិ។

ប្រសិនបើអ្នកសង្កេតឃើញសញ្ញាព្រមានដូចជា នោមមានពពុះច្រើន ហើមមុខ ឬជើង និងមានអារម្មណ៍អស់កម្លាំងល្ហិតល្ហៃខុសធម្មតា អ្នកគួរតែទៅពិគ្រោះជាមួយគ្រូពេទ្យជំនាញជាបន្ទាន់។ ការកែសម្រួលទម្លាប់ដោយផឹកទឹកឱ្យបានគ្រប់គ្រាន់ និងហាត់ប្រាណឱ្យបានទៀងទាត់ គឺជាវិធីសាស្ត្រដ៏ល្អបំផុតដើម្បីការពារតម្រងនោមឱ្យមានសុខភាពល្អ​៕