ចំណេះដឹង៖ យោងតាមការផ្សាយរបស់សារព័ត៌មានបរទេស នៅក្នុងសម័យកាលដ៏មមាញឹកនេះ ផលិតភាពការងារមិនមែនផ្អែកទៅលើការធ្វើការឱ្យបានច្រើនម៉ោងនោះទេ ប៉ុន្តែវាអាស្រ័យលើរបៀបដែលយើងចាត់ចែងគំនិត និងពេលវេលា។ ដើម្បីសម្រេចបានលទ្ធផលល្អបំផុតដោយមិនមានភាពតានតឹងហួសហេតុ អ្នកអាចអនុវត្តតាមគោលការណ៍សំខាន់ៗទាំង ៩ នេះ៖

ជំហានដំបូងបំផុតគឺ ការរៀបចំផែនការ និងកំណត់អាទិភាព។ រៀងរាល់ព្រឹក ចូរចំណាយពេលបន្តិចដើម្បីតម្រៀបកិច្ចការតាមកម្រិតសំខាន់ និងបន្ទាន់។ ការដឹងច្បាស់ថាអ្វីត្រូវធ្វើមុន និងអ្វីត្រូវធ្វើក្រោយ នឹងជួយឱ្យអ្នកគ្រប់គ្រងពេលវេលាបានល្អបំផុត។ បន្ទាប់មកគឺ ការបង្កើនការផ្តោតអារម្មណ៍ ដោយកាត់បន្ថយការរំខានពីមជ្ឈដ្ឋានខាងក្រៅ ដូចជាការលេងបណ្តាញសង្គម ឬការសន្ទនាដែលមិនចាំបាច់។ ការផ្ដោតលើគោលដៅច្បាស់លាស់ នឹងជួយឱ្យអ្នកបញ្ចប់ការងារបានលឿន និងមានគុណភាព។

ទម្លាប់ដ៏មានតម្លៃមួយទៀតគឺ ការធ្វើកិច្ចការម្តងមួយ​។ ទោះបីជាការធ្វើការច្រើនមុខក្នុងពេលតែមួយ ​មើលទៅហាក់ដូចជាចំណេញពេល ប៉ុន្តែវាតែងតែធ្វើឱ្យគុណភាពការងារធ្លាក់ចុះ និងបង្កឱ្យមានកំហុសឆ្គង។ ជាមួយគ្នានេះដែរ ការជៀសវាងការពន្យារពេល គឺជាគន្លឹះដើម្បីកុំឱ្យកិច្ចការដែលមិនទាន់រួចរាល់ ក្លាយជាបន្ទុកផ្លូវចិត្តនៅថ្ងៃបន្ទាប់។

ក្រៅពីការខំប្រឹងធ្វើការ អ្នកក៏ត្រូវយល់ពី សិល្បៈនៃការសម្រាក ផងដែរ។ នៅពេលមានអារម្មណ៍អស់កម្លាំង ការសម្រាកភ្នែក ឬដើរចុះឡើងរយៈពេល ១៥ នាទី នឹងជួយឱ្យខួរក្បាលស្រឡះ និងអាចបង្កើតគំនិតថ្មីៗបានល្អជាងមុន។ ការអាន អត្ថបទបំផុសគំនិត ជារៀងរាល់ថ្ងៃ ក៏ជាការបញ្ចូលថាមពលវិជ្ជមានឱ្យខ្លួនឯង ដើម្បីរក្សាភាពរីករាយក្នុងការងារជានិច្ច។

ចុងក្រោយបំផុត ដើម្បីឱ្យជីវិតមានតុល្យភាព ចូរ បង្កើតពេលវេលាសម្រាប់ខ្លួនឯង ក្រោយចេញពីធ្វើការ ដូចជាការហាត់ប្រាណ ឬធ្វើម្ហូបដែលអ្នកចូលចិត្ត។ កុំភ្លេច កោតសរសើរ និងផ្តល់តម្លៃឱ្យការងាររបស់ខ្លួនឯង ជារៀងរាល់ថ្ងៃ ទោះជាវាជារឿងតូចតាចក៏ដោយ។

ការចាប់ផ្តើមថ្ងៃថ្មីជាមួយ ផ្នត់គំនិតវិជ្ជមាន និងការចាត់ទុកបញ្ហាប្រឈមជាមេរៀនសម្រាប់រៀនសូត្រ នឹងជួយឱ្យអ្នកក្លាយជាបុគ្គលដែលមានសក្តានុពល និងជោគជ័យក្នុងអាជីព​៕