ខេត្តស្ទឹងត្រែង ៖ វិស័យកសិ-ឧស្សាហកម្ម ក្នុងខេត្តស្ទឹងត្រែង កំពុងបង្ហាញសញ្ញានៃការបោះជំហានយ៉ាងខ្លាំង ដោយក្នុងឆ្នាំ២០២៥ កន្លងទៅក្រុមហ៊ុនចំនួន៤ បានសម្រេចការនាំចេញចេកអំបូងលឿងស្រស់ ទៅកាន់ទីផ្សារអន្តរជាតិ រួមមាន…
ខេត្តស្ទឹងត្រែង ៖ វិស័យកសិ-ឧស្សាហកម្ម ក្នុងខេត្តស្ទឹងត្រែង កំពុងបង្ហាញសញ្ញានៃការបោះជំហានយ៉ាងខ្លាំង ដោយក្នុងឆ្នាំ២០២៥ កន្លងទៅក្រុម
ហ៊ុនចំនួន៤ បានសម្រេចការនាំចេញចេកអំបូងលឿងស្រស់ ទៅកាន់ទីផ្សារអន្តរជាតិ រួមមាន ចិន កូរ៉េខាងត្បូង និងជប៉ុន ក្នុងបរិមាណសរុបដល់
ទៅ ១០៦,៥១៦ តោន ។
នាព្រឹកថ្ងៃទី១៥ ខែមករា ឆ្នាំ២០២៦ នៅសាលាខេត្តស្ទឹងត្រែង បានរៀបចំពិធីចុះហត្ថលេខាលើអនុស្សរណៈ នៃការយោគយល់ (MOU) ស្តីពី «ការកសាងខ្សែច្រវ៉ាក់ផ្គត់ផ្គង់ចេកអំបូងលឿង ទៅកាន់ទីផ្សារប្រទេសជប៉ុន» រវាងក្រុមហ៊ុន ភូម៉ាឌី (Phumady Investment Group) និងក្រុមហ៊ុន SUMIFRU JAPANCORAPORTION ក្រោមអធិបតីភាពលោក សរ សុពុត្រា អភិបាលនៃគណៈអភិបាលខេត្តស្ទឹងត្រែង ។
យោងតាមរបាយការណ៍ពីមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង ក្រុមហ៊ុនធំៗចំនួន៤ ដែលជាក្បាលម៉ាស៊ីនរុញច្រានការនាំ
ចេញចេកអំបូងលឿង រួមមាន៖ ១. ក្រុមហ៊ុន ស៊ីវហ្គេក ២. ក្រុមហ៊ុន ភូម៉ាឌី ៣. ក្រុមហ៊ុន ដំឡូងមីចំកាត់ ៤. ក្រុមហ៊ុន ហ្គ្រេនលែន ។
ដោយឡែក សម្រាប់ក្រុមហ៊ុន ភូម៉ាឌី ក្នុងឆ្នាំ២០២៥ បានដាំដុះលើផ្ទៃដីសរុប ១,០៣៨ ហិកតា (ចេក ៧២៥ហិកតា និងទុរេន ៣១៣ហិកតា) ដោយនាំចេញចេកស្រស់បាន ១៦,០១០ តោន ក្នុងនោះ ៨៥% ផ្គត់ផ្គង់ទៅទីផ្សារជប៉ុន និង ១៥% ទៅកូរ៉េខាងត្បូង។ ក្នុងឆ្នាំ២០២៦ នេះ ក្រុមហ៊ុនគ្រោងត្រូវការកម្លាំងពលកម្មបន្ថែមរហូតដល់ជិត ២,០០០ នាក់ ដើម្បីឆ្លើយតបនឹងការរីកចម្រើននៃផ្ទៃដីដាំដុះ ។
ក្នុងឱកាសនោះ លោក សរ សុពុត្រា បានបង្ហាញការគាំទ្រយ៉ាងពេញទំហឹងចំពោះកិច្ចសហប្រតិបត្តិការនេះ។ លោកអភិបាលខេត្តបានសង្កត់ធ្ងន់ថា៖ “វិស័យកសិកម្មកសិ-ឧស្សាហកម្ម និងទេសចរណ៍ គឺជាសសរស្តម្ភសេដ្ឋកិច្ចដ៏សំខាន់របស់ខេត្ត។ យើងខ្ញុំលើកទឹកចិត្តឱ្យក្រុមហ៊ុន SUMIFRU ពិចារណានាំចេញកសិផលសក្ដានុពលផ្សេងទៀតដូចជា កៅស៊ូ ស្វាយចន្ទី ស្វាយកែវរមៀត និងទុរេនជាដើម” ។
បើទោះបីជាលទ្ធផលគួរឱ្យមោទនៈក៏ដោយ ប្រធានមន្ទីរកសិកម្មខេត្តបានឱ្យដឹងថា ក្នុងចំណោមផ្ទៃដីសម្បទានសេដ្ឋកិច្ចសរុបជាង ៩ម៉ឺនហិកតា (១៣ គម្រោង) បច្ចុប្បន្នទើបតែអនុវត្តបានប្រមាណ ២៥% (ស្មើនឹង ២២,៣១៤ ហិកតា) ប៉ុណ្ណោះ។ នេះគឺជាឱកាសមាសសម្រាប់វិនិយោគិនដទៃទៀត ក្នុងការចូលមកបណ្ដាក់ទុនដើម្បីប្រែក្លាយខេត្តស្ទឹងត្រែងឱ្យទៅជាតំបន់ផលិត កម្មដ៏រឹងមាំ ។
រដ្ឋបាលខេត្តស្ទឹងត្រែង ប្ដេជ្ញាបន្តសម្របសម្រួល និងបង្កលក្ខណៈងាយស្រួលគ្រប់បែបយ៉ាងដល់ក្រុមហ៊ុនវិនិយោគ ដើម្បីបង្កើតការងារជូនប្រជាពលរដ្ឋក្នុងស្រុក និងជំរុញសេដ្ឋកិច្ចជាតិឱ្យកាន់តែរីកចម្រើនខ្លាំងក្លា ៕
ចែករំលែកព័តមាននេះ