រាជធានីភ្នំពេញ ៖ រថយន្តដឹកធុងហ្គាសសំពីងសំពោង និងលើសទម្ងន់ជាង២០តោន ត្រូវបានកម្លាំងនគរបាលចរាចរណ៍ រាជធានីភ្នំពេញ ឃាត់ បន្ទាប់ពីរថយន្តនោះ ចូលក្នុងរាជធានីភ្នំពេញ ក្នុងម៉ោងហាមឃាត់…
រាជធានីភ្នំពេញ ៖ រថយន្តដឹកធុងហ្គាសសំពីងសំពោង និងលើសទម្ងន់ជាង២០តោន ត្រូវបានកម្លាំងនគរបាលចរាចរណ៍ រាជធានីភ្នំពេញ ឃាត់ បន្ទាប់ពីរថយន្តនោះ ចូលក្នុងរាជធានីភ្នំពេញ ក្នុងម៉ោងហាមឃាត់ ហើយផុងបំផ្លាញផ្លូវសាធារណៈ ។
តាមស្នងការដ្ឋាននគរបាលរាជភ្នំពេញ បានឲ្យដឹងថា ដោយអនុវត្តតាមបទបញ្ជា និងគោលការណែនាំរបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១៥ ខែមករា ឆ្នាំ២០២៦ កម្លាំងនគរបាលការិយាល័យចរាចរណ៍ផ្លូវគោក ដឹកនាំដោយលោកឧត្តមសេនីយ៍ទោ ហេង រតនា ស្នងការរងទទួលការងារនគរបាលចរាចរណ៍ បានបន្តការចុះអនុវត្តន៍ការរឹតបន្តឹងច្បាប់ក្នុងភូមិសាស្ត្ររាជធានីភ្នំពេញ ដោយក្នុងនោះបានធ្វើការចាប់ឃាត់រថយន្តដឹកទំនិញធុនធំមួយគ្រឿង ដែលដឹកលើសទម្ងន់ច្រើន និងបានកិនបំផ្លាញទ្រព្យសម្បត្តិសាធារណៈរបស់រដ្ឋ បណ្តាលឲ្យរងការខូចខាតបន្ថែមទៀត ។
ទាក់ទិនការហាមឃាត់មិនឲ្យរថយន្តដឹកទំនិញធុនធំចរាចរចូលរាជធានីភ្នំពេញ ក្នុងម៉ោងហាមឃាត់នេះ ទោះបីជាកម្លាំងសមត្ថកិច្ចបើកការចុះរឹតបន្តឹងច្បាប់តាមរយៈការអប់រំណែនាំអស់ជាច្រើនខែកន្លងមកហើយ ក៏ដោយ ក៏មានម្ចាស់យាន្ត និងបណ្តាក្រុមហ៊ុនមួយចំនួន នៅតែពុំទាន់គោរពច្បាប់នៅឡើយនោះទេ ពោលគឺនៅតែមានការបំពានជារឿយៗ ។
ទន្ទឹមនឹងការមិនទាន់ចូលរួមគោរពច្បាប់យ៉ាងខ្ជាប់ខ្ជួននៅឡើយនេះ កម្លាំងសមត្ថកិច្ចក៏ពុំបានបន្ធូរបន្ថយដៃក្នុងការអនុវត្តនោះដែរ ពោលគឺនៅតែបង្កើនការរឹតបន្តឹង ដើម្បីធានាសុខសុវត្ថិភាពលើដងផ្លូវសាធារណៈ កាត់បន្ថយបានពីការកកស្ទះ និងកាត់បន្ថយបានពីគ្រោះថ្នាក់ចរាចរណ៍ ដែលជាកត្តាចម្បងក្នុងការបំផ្លាញទ្រព្យសម្បត្តិ និងសម្លាប់អាយុជីវិតពលរដ្ឋ ។
លោកឧត្តមសេនីយ៍ទោ ហេង រតនា ស្នងការរងទទួលការងារនគរបាលចរាចរណ៍ បានឱ្យដឹងថា រថយន្តដែល បំផ្លាញផ្លូវនោះមានចំណុះចំនួន៥ តោនតែម្ចាស់រថយន្តបានដឹកធុងហ្គាសរហូត២៧តោនហើយចូលរាជធានីភ្នំពេញនៅក្នុងម៉ោងហាមឃាត់និងផុងផ្លូវបំភ្លេចបំផ្លាញទ្រព្យសម្បត្តិសាធារណៈទៀត ៕
ចែករំលែកព័តមាននេះ