ខេត្តស្ទឹងត្រែង ៖ ក្នុងស្មារតីលើកកម្ពស់តម្លៃសេរីភាពសារព័ត៌មាន និងការពង្រឹងប្រសិទ្ធភាពនៃការបញ្ជ្រាបព័ត៌មានពិតទៅកាន់សាធារណជន រដ្ឋបាលខេត្តបានរៀបចំពិធីសំណេះសំណាលដ៏មានអត្ថន័យមួយជាមួយបណ្តាញអ្នកសារព័ត៌មាន អ្នកផលិតមាតិកា និងមន្ត្រីព័ត៌មានទូទាំងខេត្ត ក្រោមអធិបតីភាពឯកឧត្តម សរ សុពុត្រា…
ខេត្តស្ទឹងត្រែង ៖ ក្នុងស្មារតីលើកកម្ពស់តម្លៃសេរីភាពសារព័ត៌មាន និងការពង្រឹងប្រសិទ្ធភាពនៃការបញ្ជ្រាបព័ត៌មានពិតទៅកាន់សាធារណជន រដ្ឋបាលខេត្តបានរៀបចំពិធីសំណេះសំណាលដ៏មានអត្ថន័យមួយជាមួយបណ្តាញអ្នកសារព័ត៌មាន អ្នកផលិតមាតិកា និងមន្ត្រីព័ត៌មានទូទាំងខេត្ត ក្រោមអធិបតីភាពឯកឧត្តម សរ សុពុត្រា អភិបាលខេត្ត ។
ពិធីនេះ បានប្រព្រឹត្តទៅកាលពីថ្ងៃទី១៤ ខែមករា ឆ្នាំ២០២៦កន្លងទៅ មិនត្រឹមតែជាការជួបជុំបែបមិត្តភាពក្នុងឱកាសដើមឆ្នាំថ្មីប៉ុណ្ណោះទេ ប៉ុន្តែគឺជាការបោះជំហានឆ្ពោះទៅរករបត់ថ្មីមួយនៃកិច្ចសហការរវាងអាជ្ញាធរ និងអ្នកសារព័ត៌មាន ក្នុងគោលដៅរួមគឺ «ការអភិវឌ្ឍខេត្តស្ទឹងត្រែង» ។
ថ្លែងក្នុងបរិយាកាសដ៏ស្និទ្ធស្នាលនេះ ឯកឧត្តមអភិបាលខេត្ត បានគូសបញ្ជាក់ច្បាស់ថា អ្នកសារព័ត៌មាន និងអ្នកផលិតមាតិកា គឺជា«ដៃគូយុទ្ធសាស្ត្រដែលមិនអាចខ្វះបាន» របស់រដ្ឋបាលខេត្ត ។ អ្នកសារព័ត៌មាន គឺជាស្ពានចម្លងព័ត៌មានដ៏សំខាន់ ក្នុងការនាំយកសមិទ្ធផល ការអភិវឌ្ឍ និងគោលនយោបាយនានារបស់រាជរដ្ឋាភិបាល ទៅដល់មហាជនឱ្យបានយល់ដឹងកាន់តែទូលំទូលាយ ច្បាស់លាស់ និងមានលក្ខណៈវិទ្យាសាស្ត្រ ។
ទន្ទឹមនឹងការផ្តល់តម្លៃ ឯកឧត្តមអភិបាលខេត្ត ក៏បានផ្តល់អនុសាសន៍ជំរុញឱ្យអ្នក សារព័ត៌មានទាំងអស់ បន្តប្រកាន់ខ្ជាប់នូវសីលធម៌ វិជ្ជាជីវៈ ភាពទទួលខុសត្រូវខ្ពស់ និងសេចក្តីរាយការណ៍ដែលផ្អែកលើតុល្យភាពព័ត៌មាន ដើម្បីរួមចំណែកទប់ស្កាត់ព័ត៌មានមិនពិត ដែលអាចបង្កឱ្យមានភាពវឹកវរក្នុងសង្គម ។
ឯកឧត្តមអភិបាលខេត្ត ក៏បានបង្ហាញនូវទិដ្ឋភាពទូទៅនៃសក្ដានុពលសេដ្ឋកិច្ច និងភូមិសាស្ត្រដ៏មានតម្លៃរបស់ខេត្តស្ទឹងត្រែង ព្រមទាំងទិសដៅយុទ្ធសាស្ត្រដែលរដ្ឋបាលខេត្តកំពុងអនុវត្ត ។ ការបង្ហាញនេះ ក្នុងគោលបំណងផ្តល់ជាមូលដ្ឋានគ្រឹះដល់អ្នកសារព័ត៌មាន ក្នុងការផលិតព័ត៌មានឱ្យបានស៊ីជម្រៅ និងស្របតាមចរន្តនៃការអភិវឌ្ឍជាក់ស្តែង ។
គួរកត់សម្គាល់ថា នេះគឺជាលើកដំបូងហើយដែលៃរដ្ឋបាលខេត្តស្ទឹងត្រែង បានរៀបចំវេទិកាសំណេះសំណាលរវាងថ្នាក់ដឹកនាំខេត្ត ជាមួយអ្នកសារព័ត៌មាន អ្នកផលិតមាតិកាក្នុងខេត្ត ។សកម្មភាពនេះ ត្រូវបានគេមើលឃើញថា ជាការបើកចំហទូលំទូលាយនូវលំហសេរីភាពព័ត៌មាន និងជាសញ្ញាវិជ្ជមាន នៃការកសាង«ទំនុកចិត្ត»រវាងស្ថាប័នរដ្ឋ និងស្ថាប័នសារព័ត៌មាន ។
តាមរយៈជំនួបនេះ រដ្ឋបាលខេត្តស្ទឹងត្រែងរំពឹងទុកថា នឹងទទួលបាននូវកិច្ចសហការកាន់តែជិតស្និទ្ធ បង្កើនល្បឿននៃការផ្តល់ព័ត៌មានត្រឡប់ពីប្រជាពលរដ្ឋមកកាន់អាជ្ញាធរវិញ ដើម្បីដោះស្រាយរាល់បញ្ហាប្រឈមនៅមូលដ្ឋានបានទាន់ពេលវេលា សំដៅប្រែក្លាយខេត្តស្ទឹងត្រែងឱ្យក្លាយជាតំបន់ដែលមានការរីកចម្រើន ប្រកបដោយចីរភាព និងបរិយាបន្ន ៕
ចែករំលែកព័តមាននេះ