រឿងជាមួយបុរី ឡេង ណាវ៉ាត្រា មិនចេះចប់សោះ ! តើពេលណាចប់ ?
- ភ្នំពេញ
រាជធានីភ្នំពេញ ៖ ប្រជាពលរដ្ឋទិញដី និងផ្ទះបុរីឡេង ណាវ៉ាត្រា (គម្រោងជ្រែ ១០០) ប្រមាណជិត ១០០នាក់បានផ្ទុះការតវ៉ាដោយលើកគ្នាទៅក្រសួងរៀបចំដែនដី នគរូបនីយកម្ម…
រាជធានីភ្នំពេញ ៖ ប្រជាពលរដ្ឋទិញដី និងផ្ទះបុរីឡេង ណាវ៉ាត្រា (គម្រោងជ្រែ ១០០) ប្រមាណជិត ១០០នាក់បានផ្ទុះការតវ៉ាដោយលើកគ្នាទៅក្រសួងរៀបចំដែនដី នគរូបនីយកម្ម និងសំណង់បិទផ្លូវ ដើម្បីស្នើសុំទាមទារប្រាក់ត្រឡប់មកវិញ និងស្រែកថា អយុត្តិធម៌ ។ ការតវ៉ានេះផ្ទុះឡើងសារជាថ្មីកាលពីវេលាម៉ោង ៩ និង ៣០នាទីព្រឹកថ្ងៃទី ១៥ខែមករា ឆ្នាំ ២០២៦ ដោយពួកគេបានជួបប្រមូលផ្ដុំគ្នា និងបិទផ្លូវនៅក្រសួងរៀបចំដែនដី នគរូបនីយកម្ម និងសំណង់ ដែលស្ថិតនៅតាមវិថីអង្គរក្នុងភូមិឡកំបោរ សង្កាត់ ស្វាយប៉ាក់ ខណ្ឌឫស្សីកែវ រាជធានីភ្នំពេញ ។
ទន្ទឹមនឹងនោះ ប្រជាពលរដ្ឋដែលផ្ទុះការតវ៉ាចោទជាសំណួរថា តើថ្ងៃណា ពេលណា បានក្រុមហ៊ុនប្រគល់ដី និងផ្ទះជូនពួកគាត់ ។ បើពុំដូច្នេះទេសូមប្រគល់ប្រាក់ពួកគាត់ត្រឡប់មកវិញ ។ ប្រជាពលរដ្ឋក៏បានទទូចស្នើសុំដល់ក្រសួងរៀបចំដែនដី នគរូបនីយកម្ម និងសំណង់ ពន្លឿនការដោះស្រាយជូនពួកគាត់ និងទាមទារឲ្យ ឧកញ៉ា ឡេង ណារ៉ាត្រា ម្ចាស់បុរីកំណត់ពេលវេលាច្បាស់លាស់ជាលាយលក្ខណ៍អក្សរ ។ តាមប្រជាពលរដ្ឋដែលផ្ទុះការតវ៉ា បានស្នើសុំដល់ក្រុមហ៊ុន ឡេង ណាវ៉ាត្រា នូវ លក្ខខណ្ឌ ១. អោយចាប់ផ្ដើមបុកគ្រិះ, ២.ចាប់ផ្ដើមសាងសង់, ៣.បញ្ចប់ការសាងសង់ទាំងមូលនៅក្នុងប្លុក C E1RA ក្នុងឆ្នាំ 2026 ជាកំហិត, ៤. ប្រគល់ផ្ទះជូនអតិថិជន ប្លុក C E1RA ក្នុងឆ្នាំ 2026 ជាកំហិត និង ៥. សងលុយពួកគាត់វិញ ។
បន្ទាប់ពីមានការតវ៉ាបិទផ្លូវលោក ជិន ប៊ុនធឿន អភិបាលខណ្ឌឫស្សីកែវ និងលោកវរៈសេនីយ៍ឯក ហ៊ាង ថារ៉េត អធិការខណ្ឌឬឫស្សីកែវក៍បានចុះសម្រសម្រួលសុំអោយពលរដ្ឋបើកផ្លូវចរាចរណ៍ឡើងវិញ កុំអោយប៉ះពាល់ផ្លូវសាធារណៈ ។ លុះនៅវេលាម៉ោង ១១ ពលរដ្ឋដែលតវ៉ាក៏បានបើកផ្លូវចរាចរណ៍ឡើងវិញ ។
គួរបញ្ជាក់ថា ប្រជាពលរដ្ឋរាប់ពាន់គ្រួសារបានរងគ្រោះដោយសារទិញដី និងផ្ទះបុរី ឡេង ណាវ៉ាត្រាដែលស្ថិតក្នុងភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្តាល ដោយទិញដីមិនបានដី ទិញផ្ទះមិនបានផ្ទះ និងបានផ្ទុះការតវ៉ាបិទផ្លូវជាតិ ៦អា ជាបន្តបន្ទាប់ ។ ថ្មីៗទៀតសោតនៅក្នុងបណ្ដាញសង្គមក៏ផ្ទុះឡើងនៅពេលដែលមន្ត្រីយោធាម្នាក់បានក្រោកឈរ និងរៀបរាប់ពីទុក្ខលំបាករបស់ខ្លួនដែលយកលុយធនាគារមកទិញដី និងផ្ទះ ហើយមិនបានផ្ទះហើយត្រូវបានគេសម្លុតគំរាមកំហែងនៅក្នុងអង្គប្រជុំអោយអង្គុយចុះមិនឲ្យនិយាយ ។
ទោះបីជាយ៉ាងណាបន្ទាប់ពីផ្ទុះការរិះគន់នៅក្នុងបណ្ដាញសង្គម មន្ត្រីយោធារូបនោះក៏ត្រូវបានលោកឧកញ៉ា ឡេង ណាវ៉ាត្រា ដោះស្រាយ ។ តែប្រជាពលរដ្ឋរងគ្រោះរាប់ពាន់នាក់ទៀតនៅពុំទាន់មានដំណោះស្រាយក៏បន្តតវ៉ាស្រែកថា អយុត្តិធម៌ ៕
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព
ចែករំលែកព័តមាននេះ