ខេត្តកំពង់ស្ពឺ៖ ក្រុមក្មេងទំនើងចំនួន៤នាក់ត្រូវបានកម្លាំងនគរបាលស្រុកបសេដ្ឋធ្វើការស្រាវជ្រាវឃាត់ខ្លួនបាន ធ្វើកិច្ចសន្យាអប់រំ និងកោសក់សញ្ញាជើងក្អែក ខណៈដែលក្រុមក្មេងទំនើងខាងលើធ្វើសកម្មភាពបង្ហោះម៉ូតូថតចែកចាយតាមបណ្តាញសង្គមហ្វេកប៊ុកកាលពីពេលកន្លងទៅ។
ការស្រាវជ្រាវឃាត់ក្រុមក្មេងទំនើងបង្ហោះម៉ូតូ ធ្វើកិច្ចសន្យាអប់រំនិងកោសក់ ធ្វើឡើងកាលពីថ្ងៃទី១៤ ខែមករា ឆ្នាំ២០២៦។
នគរបាលស្រុកបសេដ្ឋបាននិយាយឱ្យដឹងថានៅមុនធ្វើការឃាត់ខ្លួនក្រុមក្មេងទំនើងខាងលើ គឺនៅវេលាម៉ោង០១និង៤០នាទីរសៀលថ្ងៃទី៧ ខែមករា ឆ្នាំ២០២៦ នៅចំណុចលើផ្លូវជាតិលេខ៤១ ចន្លោះបង្គោលគីឡូលេខ៤២ទៅលេខ៤៣ ស្ថិតនៅក្នុងភូមិព្រៃរំដួលខាងជើង ឃុំបសេដ្ឋ ស្រុកបសេដ្ឋ ខេត្តកំពង់ស្ពឺ ។
នគរបាលស្រុកបសេដ្ឋបានបន្តឱ្យដឹងថា បើយោងតាមអាខោនហ្វេសប៊ុកឈ្មោះ Pu riya បានផុសក្នុងបណ្តាញសង្គមពីសកម្មភាពក្រុមក្មេងទំនើង០១ក្រុមបង្ហោះម៉ូតូ០១គ្រឿងម៉ាកហុងដាសេ១២៥ ស៊េរីឆ្នាំ២០១៧ ពណ៌ក្រហម តាមបណ្តោយផ្លូវជាតិលេខ៤១ ស្ថិតក្នុងភូមិ/ឃុំខាងលើ ពីទិសជើងទៅទិសខាងត្បូង បង្ករភាពអសន្តិសុខក្នុងសង្គម និងបង្ករឱ្យមានភាពវឹកវរតាមដងផ្លូវអាចបណ្តាលឱ្យមានគ្រោះជាយថាហេតុដល់ប្រជាពលរដ្ឋ និងអ្នកធ្វើដំណើរ ។
លុះរហូតដល់ថ្ងៃទី១៤ ខែមករា ឆ្នាំ២០២៦ កំលាំងជំនាញព្រហ្មទណ្ឌស្រុកបសេដ្ឋ បានធ្វើការស្រាវជ្រាវស្វែងរកមុខសញ្ញាក្រុមក្មេងទំនើងរហូតឈានដល់ធ្វើការនាំខ្លួនចំនួន០៤នាក់ និងវត្ថុតាងម៉ូតូ០១គ្រឿង ដែលធ្វើសកម្មភាពបង្ហោះនោះ÷ ទី១/ឈ្មោះ សុខ ពន្លឺ ភេទប្រុស អាយុ១៨ឆ្នាំ រស់នៅក្នុងភូមិដីក្រហម ឃុំនិទាន ស្រុកបសេដ្ឋ
ទី២/ឈ្មោះ ង៉ាន់ សុខហេង ភេទប្រុស អាយុ១៦ឆ្នាំ រស់នៅក្នុងភូមិត្រពាំងស្តៅ ឃុំនិទាន ស្រុកបសេដ្ឋ (០២នាក់ខាងលើជាអ្នកធ្វើសកម្មភាពបង្ហោះម៉ូតូ)
ទី៣/ឈ្មោះ យាន គឹមស៊ន ភេទប្រុស អាយុ១៧ឆ្នាំ រស់នៅក្នុងភូមិដីក្រហម ឃុំនិទាន ស្រុកបសេដ្ឋ និងទី៤/ឈ្មោះ រី សុភក្ត្រ ភេទប្រុស អាយុ១៦ឆ្នាំ រស់នៅក្នុងភូមិសាឡាំ ឃុំពោធិម្រាល ស្រុកបសេដ្ឋ ខេត្តកំពង់ស្ពឺ យកមកសួរនាំនៅអធិការដ្ឋានស្រុកបសេដ្ឋ (០២នាក់ជាអ្នកជិះបិតគូទ និងថតវីដេអូពីសកម្មភាពបក្ខពួកខ្លួនបង្ហោះម៉ូតូចែកចាយក្នុងបណ្តាញសង្គមហ្វេកប៊ុក) ។
នគរបាលស្រុកបសេដ្ឋបានបន្ថែមទៀតថា ចំពោះមុខសញ្ញាក្រុមក្មេងទំនើងទាំង០៤នាក់ក្រោយឃាត់ខ្លួន បានសារភាពថាពួកខ្លួនពិតជាបានធ្វើសកម្មភាពបង្ហោះម៉ូតូកាលពីថ្ងៃទី៧ ខែមករា ឆ្នាំ២០២៦ តាមផ្លូវជាតិលេខ៤១ពិតប្រាកដមែន ។
បច្ចុប្បន្នក្រុមក្មេងទំនើងខាងលើកំលាំងជំនាញព្រហ្មទណ្ឌបានធ្វើការអប់រំ កិច្ចសន្យា ឱ្យអាណាព្យាបាល ធានាយកទៅអប់រំបន្ត បានកោរសក់ ត្រលប់ទៅមូលដ្ឋានវិញហើយ ចំណែកវត្ថុតាងម៉ូតូត្រូវបានរក្សាទុកចំនួន០៣ខែ ឬ ស្មើនឹង៩០ថ្ងៃ៕
ចែករំលែកព័តមាននេះ