ខេត្តត្បូងឃ្មុំ - កំពង់ចាម ៖ រថយន្តមួយគ្រឿងម៉ាកសាំយ៉ុងដឹកសាច់បង្កកពេញចេញពីប្រទេសវៀតណាមត្រូវបានកម្លាំងជំនាញពេទ្យសត្វដេញស្ទាក់ចាប់បាននៅចំណុចដងផ្លូវមួយកន្លែងក្នុងស្រុកកោះសូទិន ខេត្តកំពង់ចាម ។ គិតរហូតមកដល់ល្ងាចថ្ងៃទី ១៤ ខែមករា…
ខេត្តត្បូងឃ្មុំ - កំពង់ចាម ៖ រថយន្តមួយគ្រឿងម៉ាកសាំយ៉ុងដឹកសាច់បង្កកពេញចេញពីប្រទេសវៀតណាមត្រូវបានកម្លាំងជំនាញពេទ្យសត្វដេញស្ទាក់ចាប់បាននៅចំណុចដងផ្លូវមួយកន្លែងក្នុងស្រុកកោះសូទិន ខេត្តកំពង់ចាម ។ គិតរហូតមកដល់ល្ងាចថ្ងៃទី ១៤ ខែមករា ឆ្នាំ ២០២៦ គេមិនទាន់ស្រាវជ្រាវដឹងថា រថយន្តដឹកសាច់បង្កកនោះជារបស់ឈ្មួញណាម្នាក់នោះឡើយ ។
បើតាមលោក ជឿន ចិត្ត ប្រធានការិយាល័យផលិតកម្ម និងបសុព្យាបាលខេត្តត្បូងឃ្មុំ បានប្រាប់ឲ្យដឹងថា ការស្រាវជ្រាវរថយន្តដឹកសាច់បង្កកនោះ គឺចេញពីប្រទេសវៀតណាម ចូលតាមច្រកដូនរ័ត្ន ស្រុកមេមត់ នៅពេលយប់ហើយត្រូវបានកម្លាំងមន្ត្រីក្រោមឱវាទរបស់លោកបានបើករថយន្តដេញតាមពីក្រោយ ដោយរថយន្តដឹកបទល្មើសនោះមិនឱ្យវ៉ានោះទេ ។ ទីបំផុតរថយន្តដឹកសាច់បង្កក ត្រូវបានដេញតាមទាន់នៅព្រំប្រទល់ជាប់ស្រុកកោះសូទិនខេត្តកំពង់ចាម ។
ប្រធានការិយាល័យពេទ្យសត្វរូបនេះបានបន្តឲ្យដឹងទៀតថា អ្នកបើករថយន្តដឹកបទល្មើសនោះ គឺមានភាពសាហាវធ្វើឲ្យមន្ត្រីរបស់លោកពិបាកក្នុងការបង្ក្រាប សាច់បង្កកកន្លងទៅធ្លាប់ត្រូវបានគេហាមមិនឱ្យនាំចូលរយៈពេល ៦ខែតែក្រោយមកទៀតគេអនុញ្ញាតឱ្យនាំចូលបានតែផ្នែកខ្លះនោះទេ ។
លោកថានៅចម្ងាយប្រមាណ ១៥គីឡូម៉ែត្រ ពីព្រំដែនស្រុកមេមត់ គឺមានរោងចក្រកែច្នៃសាច់មាន់របស់វៀតណាម សម្រាប់នាំចេញទៅអារ៉ាប់ ។ ដូច្នេះសាច់បង្កកភាគច្រើនប្រភេទជើងមាន់ និងភ្លៅជ្រូក ដែលក្រុមឈ្មួញបានដឹកចរាចរណ៍យកមកលក់ហើយបើតាមការប៉ានស្មានសាច់បង្កកមួយរថយន្តអាចមានទម្ងន់ពីរទៅបីតោន ។ ក្នុងការបង្ក្រាបបទល្មើសបើសិនជាមានតែពេទ្យសត្វមួយអង្គភាពនោះ គឺពិបាកក្នុងការបង្ក្រាបបទល្មើសដូច្នេះមានតែការចូលរួមសហការពីកម្លាំងសមត្ថកិច្ចទើបមានប្រសិទ្ធភាព ។
មន្ត្រីពេទ្យសត្វមួយរូបបានប្រាប់ឲ្យដឹងថា ក្រោយពីទទួលបានព័ត៌មានពីកម្លាំងសម្ងាត់ភ្លាមៗនោះបានបើករថយន្តដេញតាមរថយន្តសាំយ៉ុងដែលដឹកសាច់បង្កកអ្នកបើករថយន្តនោះអាចប្រើប្រាស់គ្រឿងញៀនបើកកៀររថយន្តរបស់ពេទ្យសត្វមិនឲ្យវ៉ាដើម្បីចាប់រថយន្តដឹកបទល្មើសនោះទេ ។
ទីបំផុតរថយន្តដឹកសាច់បង្កកមួយគ្រឿងនេះត្រូវបានទាល់ច្រកបើកតាមទាន់នៅចំណុចកន្លែងមួយតាមដងផ្លូវជាប់ព្រំប្រទល់ជាមួយស្រុកកោះសូទិន ខេត្តកំពង់ចាមនៅវេលាម៉ោង ១ និង ៣០នាទីយប់រំលងអាធ្រាតឈានចូលព្រឹកថ្ងៃទី ១៣ ខែមករា ឆ្នាំ ២០២៦ ។ កម្លាំងពេទ្យសត្វបានបើករថយន្តនាំមុខចម្ងាយប្រមាណ ៣០ ម៉ែត្រ ចំណែករថយន្តដឹកបទល្មើសបើកតាមពីក្រោយដល់ត្រង់ស្ពានទួលឃ្លាំងរថយន្តនោះបានបើកបត់ក្រោយ គោលដៅឆ្លងស្ពានព្រែកតាមាក់ឆ្ពោះទៅកាន់រាជធានីភ្នំពេញ ។
ព័ត៌មានបន្តនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ