វិញ្ញាបនបត្រសម្គាល់ម្ចាស់អចលនវត្ថុជិត ១ពាន់ក្បាលដី ត្រូវបានចែកជូនប្រជាពលរដ្ឋនៅឃុំកោះស្រឡាយ
ខេត្តស្ទឹងត្រែង ៖ នៅព្រឹកថ្ងៃទី១៤ ខែមករា ឆ្នាំ២០២៦ លោក សរ សុពុត្រា អភិបាល នៃគណៈអភិបាលខេត្តស្ទឹងត្រែង…
ខេត្តស្ទឹងត្រែង ៖ នៅព្រឹកថ្ងៃទី១៤ ខែមករា ឆ្នាំ២០២៦ លោក សរ សុពុត្រា អភិបាល នៃគណៈអភិបាលខេត្តស្ទឹងត្រែង អមដំណើរដោយលោក សាយ ព្រលឹង សមាជិកក្រុមប្រឹក្សាខេត្ត បានអញ្ជើញជាអធិបតីក្នុងពិធីប្រគល់វិញ្ញាបនបត្រសម្គាល់ម្ចាស់អចលនវត្ថុ (បណ្ណកម្មសិទ្ធិដីធ្លី) ចំនួន ៩៦១ក្បាលដី ជូនដល់ប្រជាពលរដ្ឋមកពីភូមិស្មាកោះ និងភូមិកាំងដែក។ ពិធីនេះ ត្រូវបានរៀបចំឡើងនៅក្នុងបរិវេណវត្តសិលារតនារាម ស្ថិតក្នុងឃុំកោះស្រឡាយ ស្រុកសៀមបូក ។
លោក សរ សុពុត្រា បានលើកឡើងថា ការផ្ដល់បណ្ណកម្មសិទ្ធិនាពេលនេះ គឺជាការចូលរួមចំណែកយ៉ាងសំខាន់ជាមួយរាជរដ្ឋាភិបាល នីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត ក្នុងការអនុវត្តយុទ្ធសាស្ត្របញ្ចកោណ ដំណាក់កាលទី១ ។ លោកបានបញ្ជាក់ថា រយៈពេលជាងពាក់កណ្តាលអាណត្តិកន្លងទៅនេះ រាជរដ្ឋាភិបាលបានធានាយ៉ាងរឹងមាំនូវសុខសន្តិភាព ស្ថិរភាពនយោបាយ និងការអភិវឌ្ឍសេដ្ឋកិច្ចសង្គមលើគ្រប់វិស័យ ។
លោកអភិបាលខេត្តបានសង្កត់ធ្ងន់ថា៖ «វិញ្ញាបនបត្រ ដែលបងប្អូនទទួលបាននៅថ្ងៃនេះ គឺជាឯកសារគតិយុត្តដ៏មានសារៈសំខាន់បំផុត ដែលបញ្ជាក់ពីសិទ្ធិស្របច្បាប់ជាម្ចាស់លើក្បាលដី។ ចាប់ពីពេលនេះតទៅ បងប្អូននឹងមានសុវត្ថិភាពក្នុងការកាន់កាប់ ប្រើប្រាស់ អាស្រ័យផល និងមានសិទ្ធិចាត់ចែងដីធ្លីរបស់ខ្លួនបានយ៉ាងទូលំទូលាយតាមផ្លូវច្បាប់» ។
បច្ចុប្បន្នភាព នៃដីធ្លី និងស្ថិតិការចែកបណ្ណ ក្នុងខេត្តយោងតាមរបាយការណ៍ពីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត សម្រាប់ភូមិស្នាកោះ និងភូមិកាំងដែក ក្រុមការងារវាស់វែងសម្រេចបានសរុប១,៤៩៧ក្បាលដី។ ក្នុងនោះ បណ្ណដែលត្រូវចែកជូននាពេលនេះមានចំនួន ៩៦១បណ្ណ (កម្មសិទ្ធិឯកជន ៩៣៩ក្បាលដី និងដីសាធារណៈរបស់រដ្ឋ ២២ក្បាលដី) ។
ដោយឡែក ចំពោះក្បាលដីដែលមិនទាន់អាចចេញបណ្ណបានចំនួន ៥៣៦ក្បាលដីទៀតនោះ គឺដោយសារ៖១. ក្បាលដីស្ថិតក្នុងផែនទីគម្របព្រៃឈើឆ្នាំ២០០២ របស់ក្រសួងកសិកម្ម ។ ២. ម្ចាស់ក្បាលដីមួយចំនួនខកខាន មិនបានចូលរួមបំពេញទិន្នន័យជាមួយមន្ត្រីជំនាញ។
គួរបញ្ជាក់ថា គិតមកទល់ពេលនេះ នៅទូទាំងខេត្តស្ទឹងត្រែង រដ្ឋបាលខេត្តបានប្រកាសតំបន់វិនិច្ឆ័យបានចំនួន ១១១ ភូមិ (ក្នុងចំណោម ១៣៧ភូមិសរុប)។ ក្នុងនោះ រដ្ឋបាលសុរិយោដីបានចេញបណ្ណកម្មសិទ្ធិសរុបចំនួន ៣៧,៨៩២បណ្ណ និងបានចែកជូនដល់ដៃប្រជាពលរដ្ឋរួច
រាល់ចំនួន ៣១,៤០៩បណ្ណហើយដែរ ៕
ចែករំលែកព័តមាននេះ