រាជធានីភ្នំពេញ ៖ នារសៀលថ្ងៃទី១៤ ខែមករា ឆ្នាំ២០២៦នេះ ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស លើជនជាប់ចោទអតីតថៅកែបុរី ម៉ន ដានី…
រាជធានីភ្នំពេញ ៖ នារសៀលថ្ងៃទី១៤ ខែមករា ឆ្នាំ២០២៦នេះ ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោស លើជនជាប់ចោទអតីតថៅកែបុរី ម៉ន ដានី ដាក់ពន្ធនាគារកំណត់ ១ឆ្នាំ ដោយជាប់ចោទពីបទ.ប្រើអំពើហិង្សាលើជនរងគ្រោះជាអ្នកកាន់កាប់អចលនវត្ថុដោយសុចរិត ។
សាលក្រមបានទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ បើសិនភាគីណាមួយមិនសុខចិត្តចំពោះការកាត់ក្តីនេះ ។
សមាសភាពចូលរួមពិធីប្រកាសសាលក្រមមានលោក ទីវ គឹមពិសាល ចៅក្រមជំនុំជម្រះ និងលោក លី គីមស៊ាន ព្រះរាជអាជ្ញារង ជាតំណាងអយ្យការអមសាលាដំបូងរាជធានីភ្នំពេញ ដោយចំពោះមុខជនជាប់ចោទឈ្មោះ ម៉ន ដានី ភេទស្រី អាយុ៤០ឆ្នាំ អតីតថៅកែបុរី ម៉ន ដានី និងមេធាវីការពារក្តី ដោយអាណត្តិ ព្រមទាំងមេធាវីការពារក្តីឲ្យភាគីខាងដើមបណ្តឹងផងដែរ ។
សាលក្រមបានបញ្ជាក់ថា អតីតថៅកែបុរី ម៉ន ដានី ជាប់ចោទពីបទ.ប្រើអំពើហិង្សា ទៅលើអ្នកកាន់កាប់អចលនវត្ថុ ដោយសុចរិត ប្រព្រឹត្តកាលពីថ្ងៃទី៧ ខែវិច្ឆិកា ឆ្នាំ២០២៣ នៅសង្កាត់ស្នោរ ខណ្ឌកំបូល រាជធានីភ្នំពេញ ដែលសំណុំរឿងនេះត្រូវបានចៅក្រមជំនុំជម្រះសាលាដំបូងរាជធានីភ្នំពេញ លើកយកមកបើកសវនា ការកាលពីថ្ងៃទី២៤ ខែធ្នូ ឆ្នាំ២០២៥ ដោយបានកំណត់យកថ្ងៃទី១៤ ខែមករា ឆ្នាំ២០២៦ ជាប្រកាសសាលក្រម ។
សូមរម្លឹកថា ៖ កាលពីថ្ងៃទី២៤ ខែកក្កដា ឆ្នាំ ២០២៥ កន្លងទៅ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសថៅកែបុរី ម៉ន ដានី មួយសំណុំរឿងដែរ ដោយដាក់ពន្ធនាគារកំណត់ ១ឆ្នាំ និងតម្រូវឲ្យប្រាក់ទៅដើមបណ្តឹងរដ្ឋប្បវេណី ករណីចេញសែកស្អុយប្រមាណ ៥ម៉ឺនដុល្លារអាមេរិក ។
សំណុំរឿងព្រហ្មទណ្ឌខាងលើនេះ សាលាដំបូងរាជធានីភ្នំពេញ បានបើកសវនាការនៅព្រឹកថ្ងៃទី១១ ខែកក្កដា ឆ្នាំ២០២៥ ពាក់ពន្ធថៅកែបុរី ម៉ន ដានី ចាយសែកស្អុយប្រមាណ៥ ម៉ឺនដុល្លារអាមេរិក ដែលសវនាការនោះបានធ្វើឡើងជាសាធារណៈ និងដឹកនាំដោយលោក ទីវ គឹមពិសាល ចៅក្រមជំនុំជម្រះសាលាដំបូងរាជធានីភ្នំពេញ ។
សវនាការបានធ្វើការសាកសួរដេញដោលទៅលើជនជាប់ចោទអស់រយៈពេលជាច្រើនម៉ោង តាមបណ្តឹងចោទប្រកាន់ពីរបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ពោលគឺចាយសែកស្អុយ ដែលមានសាច់ប្រាក់ប្រមាណ៥ ម៉ឺនដុល្លារអាមេរិក។ ក្នុងសវនាការមេធាវីការពារក្តីឲ្យជនជាប់ចោទ ម៉ន ដានី បានបញ្ជាក់ថា បណ្តឹងទឹកប្រាក់ ៥ម៉ឺនដុល្លារអាមេរិកនោះ កូនក្តីបានសងទៅដើមបណ្តឹងចំនួន ៣ម៉ឺនដុល្លាររួចហើយ នៅសល់តែ ២ម៉ឺនដុល្លារទេ និងសន្យាសងជាបន្តបន្ទាប់ ដូច្នោះមិនគួរត្រូវប្តឹងទៀតឡើយ គួរតែទុកពេលឲ្យកូនបំណុលរកប្រាក់ដោះរំលោះទៅតាមលទ្ធភាព ។
សូមបញ្ជាក់ទៀតថា អតីតថៅកែបុរី ម៉ន ដានី មានទីលំនៅផ្ទះ លេខបេ៤៨ ផ្លូវបេតុង ភូមិត្រពាំងអណ្តូង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ កាលពីរសៀលថ្ងៃទី១៦ ខែមករា ឆ្នាំ២០២៥ ត្រូវបានកម្លាំងសមត្ថកិច្ចនាយកដ្ឋាននគរបាលព្រហ្មទណ្ឌក្រសួងមហាផ្ទៃ សហការ ចាប់ខ្លួននៅច្រកព្រំដែនអូរស្មាច់ ខេត្តឧត្តរមានជ័យ ខណៈថៅកែស្រី ម៉ន ដានី កំពុងធ្វើដំណើរឆ្លងកាត់នៅទីនោះ ដែលការចាប់ខ្លួននោះសមត្ថកិច្ចបានធ្វើឡើងតាមដីកាបង្គាប់ឲ្យចាប់ខ្លួន របស់ចៅក្រមស៊ើបសួរសាលាដំបូងរាជធានីភ្នំពេញ ខណៈពេលចាប់ខ្លួនហើយសមត្ថកិច្ចក៏បញ្ជូនជនជាប់ចោទទៅតុលាការតាមនីតិវិធី លុះនៅថ្ងៃទី១៨ ខែមករា ឆ្នាំ២០២៥ ចៅស៊ើបសួរបានសម្រេចឃុំខ្លួនអតីតថៅកែបុរី ម៉ន ដានី ដាក់ពន្ធនាគារ(ម២) ព្រៃសបណ្តោះអាសន្ន ។
តាមប្រភពព័ត៌មានឲ្យដឹងថា ថៅកែបុរី ម៉ន ដានី នៅជាប់បណ្តឹងជាច្រើនករណីទៀត អាចរហូតដល់ទៅជាង៣០បណ្តឹងឯណោះ ពាក់ព័ន្ធករណីចេញសែកស្អុយ ឲ្យអតិថិជនរបស់ខ្លួន ទិញលក់គំរោងបុរី ផ្ទះល្វែង ដែលបណ្តឹងទាំងអស់នោះតុលាការ នឹងលើយកមកបើកសវនាការជាបន្តបន្ទាប់ ៕
ចែករំលែកព័តមាននេះ