ប្រទេសសិង្ហបុរី ៖ យោងតាមរបាយការណ៍ចុងក្រោយបង្អស់របស់ Henley អំពីសន្ទស្សន៍លិខិត ឆ្លងដែនមានឥទ្ធិពលបំផុតលើពិភពលោក បង្ហាញថា ចំណាត់ថ្នាក់កំពូលទាំង ៣ ត្រូវបានកាន់កាប់ដោយប្រទេសនៅអាស៊ីទាំងអស់…
ប្រទេសសិង្ហបុរី ៖ យោងតាមរបាយការណ៍ចុងក្រោយបង្អស់របស់ Henley អំពីសន្ទស្សន៍លិខិត ឆ្លងដែនមានឥទ្ធិពលបំផុតលើពិភពលោក បង្ហាញថា ចំណាត់ថ្នាក់កំពូលទាំង ៣ ត្រូវបានកាន់កាប់ដោយប្រទេសនៅអាស៊ីទាំងអស់ ដោយសិង្ហបុរីឈរកំពូលតារាង តាមពីក្រោយដោយជប៉ុន និងកូរ៉េខាងត្បូងនៅចំណាត់ថ្នាក់លេខ ២ ស្ទួន។
ពលរដ្ឋសិង្ហបុរីកំពុងរីករាយនឹងការធ្វើដំណើរទៅកាន់ប្រទេស និងដែនដីចំនួន ១៩២ ដោយមិនតម្រូវទិដ្ឋាការ នៅក្នុងចំណោមប្រទេស និងដែនដីសរុបចំនួន ២២៧ លើពិភពលោក។ ចំណែកជប៉ុន និងកូរ៉េខាងត្បូង ស្ថិតនៅចំណាត់ថ្នាក់លេខ ២ ស្ទួន ដោយអាចធ្វើដំណើរទៅកាន់គោលដៅចំនួន ១៨៨ ដោយមិនតម្រូវទិដ្ឋាការ។
ប្រទេសនៅអឺរ៉ុបចំនួន ៥ ជាប់ចំណាត់ថ្នាក់លេខ ៣ ស្ទួន រួមមាន ដាណឺម៉ាក លុចសំបួ អេស្ប៉ាញ ស៊ុយអែត និងស្វីស ដែលអាចធ្វើដំណើរទៅគោលដៅចំនួន ១៨៦ ដោយមិនតម្រូវទិដ្ឋាការ។ ចំណាត់ថ្នាក់លេខ ៤ ក៏ជាប្រទេសនៅអឺរ៉ុបផងដែរ រួមមាន អូទ្រីស បែលហ្ស៊ិក ហ្វាំងឡង់ បារាំង អាល្លឺម៉ង់ ក្រិក អៀរឡង់ អ៊ីតាលី ហូឡង់ និងន័រវែស ទៅកាន់គោលដៅចំនួន ១៨៥ ។ ចំណែកចំណាត់ថ្នាក់លេខ ៥ ជាមួយគោលដៅចំនួន ១៨៤ រួមមានប្រទេសហុងគ្រី ព័រទុយហ្គាល់ ស្លូវ៉ាគី ស្លូវេនី និងអារ៉ាប់រួម។
ចំណាត់ថ្នាក់លេខ ៦ រួមមាន ក្រូអាស៊ី សាធារណរដ្ឋឆែក អេស្តូនី ម៉ាល់តា នូវែលសេឡង់ និងប៉ូឡូញ ជាមួយគោលដៅ ១៨៣។ ចំណាត់ថ្នាក់លេខ ៧ រួមមាន អូស្ត្រាលី ឡេតូនី លិចតិនស្តាញ និងចក្រភពអង់គ្លេស ជាមួយគោលដៅ ១៨២។ កាណាដា អ៊ីស្លង់ និងលីទុយអានី ជាប់ចំណាត់ថ្នាក់លេខ ៨ ជាមួយគោលដៅ ១៨១ ដ្បិតម៉ាឡេស៊ីជាប់នៅចំណាត់ថ្នាក់លេខ ៩ ដោយមាន ១៨០ គោលដៅ ខណៈដែលសហរដ្ឋអាមេរិកជាប់នៅចំណាត់ថ្នាក់លេខ ១០ ជាមួយគោលដៅ ១៧៩។
បើតាមលោក Misha Glenny នាយកវិទ្យាស្ថានមនុស្សសាស្ត្រទីក្រុងវីយែន (Vienna) ប្រទេសអូទ្រីស បានលើកឡើងថា ឥទ្ធិពលលិខិតឆ្លងដែនឆ្លុះបញ្ចាំងដោយផ្ទាល់ពីកម្រិតនៃស្ថិរភាពនយោបាយ អានុភាពការទូត និងសមត្ថភាពនៅក្នុងការផ្លាស់ខ្លួនស្របទៅតាមច្បាប់អន្តរជាតិ។
សូមជម្រាបថា សន្ទស្សន៍លិខិតឆ្លងដែន Henley គឺជាចំណាត់ថ្នាក់សកលរបស់ប្រទេសនានា យោងតាមសេរីភាពក្នុងការធ្វើដំណើរ ដែលត្រូវបានអនុញ្ញាតដោយលិខិតឆ្លងដែនធម្មតារបស់ប្រទេសទាំងនោះ សម្រាប់ពលរដ្ឋរបស់ពួកគេ។ ចាប់តាំងពីធ្វើបច្ចុប្បន្នភាពសន្ទស្សន៍លិខិតឆ្លងដែនជាលើកដំបូងក្នុងឆ្នាំ ២០១៨ រហូតមកទល់ពេលនេះ Henley បានធ្វើសន្ទស្សន៍លិខិតឆ្លងដែនប្រទេស និងដែនដីសរុបចំនួន ១៩៩ លើពិភពលោកជារៀងរាល់ឆ្នាំ តាមរយៈចំនួនដែលលិខិតឆ្លងដែនទាំងនោះអាចធ្វើដំណើរទៅកាន់ប្រទេស និងដែនដីផ្សេង ដោយមិនតម្រូវទិដ្ឋាការ៕
ចែករំលែកព័តមាននេះ