សង្គ្រាមអ៊ុយក្រែន ៖ កាលពីថ្ងៃទី១៣ មករា កងទ័ពរុស្ស៊ីបន្តវាយប្រហារខ្លាំងក្លាលើអ៊ុយក្រែន ដែលបណ្ដាលឲ្យមនុស្សស្លាប់យ៉ាងតិច៤នាក់នាពេលយប់ ហើយបណ្ដាលឲ្យមានការដាច់ភ្លើងពេលរដូវរងា ចំណែកនាវាដឹកប្រេងក្រិក២គ្រឿងរងការវាយប្រហារដោយដ្រូនក្នុងសមុទ្រខ្មៅ ។ កងទ័ពអាកាសអ៊ុយក្រែនប្រកាសថា…
សង្គ្រាមអ៊ុយក្រែន ៖ កាលពីថ្ងៃទី១៣ មករា កងទ័ពរុស្ស៊ីបន្តវាយប្រហារខ្លាំងក្លាលើអ៊ុយក្រែន ដែលបណ្ដាលឲ្យមនុស្សស្លាប់យ៉ាងតិច៤នាក់នាពេលយប់ ហើយបណ្ដាលឲ្យមានការដាច់ភ្លើងពេលរដូវរងា ចំណែកនាវាដឹកប្រេងក្រិក២គ្រឿងរងការវាយប្រហារដោយដ្រូនក្នុងសមុទ្រខ្មៅ ។
កងទ័ពអាកាសអ៊ុយក្រែនប្រកាសថា តំបន់ក្រុងគៀវ ក្រុងខាគៀវ ក្រុងហ្សាប៉ូរីហ្ស៊ីយ៉ា និងក្រុងឌីនីប្រូប៉េក្រូវស្ក៍ រងការវាយប្រហារនាពេលយប់ ដោយគ្រាប់មីស៊ីល២៥គ្រាប់ និងដ្រូន២៩៣គ្រឿង ។ ការវាយប្រហារទ្រង់ទ្រាយធំបែបនេះរបស់រុស្ស៊ីធ្វើឡើង៤ថៃ្ង បន្ទាប់ពីការវាយប្រហារប្រហាក់ប្រហែលគ្នានោះដែរ ។
ប្រធានាធិបតីអ៊ុយក្រែន លោកវ៉ូឡូឌីមៀរ ហ្សេឡេនស្គី ក្នុងសារមួយនាវេលាល្ងាចទទួលស្គាល់ថា ថ្ងៃទី១៣ មករា ក៏ជាថ្ងៃដ៏លំបាកបំផុតមួយដែរ ដោយលោកគូសបញ្ជាក់ថា ការវាយប្រហារដ៏ខ្លាំងមួយរបស់រុស្ស៊ីកើតមានឡើង ជាមួយការបាញ់មីស៊ីលបាលីស្ទិកដល់១៨គ្រាប់ នៅមិនទាន់គិតដល់បណ្ដាដ្រូនប្រយុទ្ធផងទេ ។ ដ្រូនអត្តឃាតSHAHIDអ៊ីរ៉ង់៦៤គ្រឿងត្រូវបានបាញ់ទម្លាក់ ។
ព្រឹកថ្ងៃទី១៣ មករា ពេលដែលសីតុណ្ហភាពត្រជាក់ខ្លាំង ធ្លាក់ដល់១៥អង្សាសេក្រោមសូន្យ រុស្ស៊ីបានវាយប្រហារផ្នែកថាមពលអ៊ុយក្រែន ដើម្បីឲ្យមនុស្សរងការដាច់ភ្លើង ទឹកនិងឧបករណ៍កម្ដៅ ។
តាមអភិបាលតំបន់ក្រុងខាគៀវថា ការវាយប្រហាររបស់រុស្ស៊ីនៅទីនោះ បណ្ដាលឲ្យមនុស្សស្លាប់យ៉ាងតិច៤នាក់ និងរបួស៦នាក់ ។ ប្រធានាធិបតីអ៊ុយក្រែនបានបរិហារការវាយប្រហារនោះថា គ្មានគោលដៅយោធាណាមួយឡើយ ដោយវាយចំឃ្លាំង និងបណ្ដាទីតាំងថាមពល បណ្ដាលឲ្យមនុស្សច្រើនរយពាន់គ្រួសាររងការដាច់ភ្លើងនៅតំបន់ក្រុងគៀវ ។
ក្រសួងថាមពលអ៊ុយក្រែនរៀបរាប់ពីការដាច់ភ្លើងថ្មីក្នុងរដ្ឋធានីគៀវនិងតំបន់ជុំវិញមកពីការវាយប្រហារលើបណ្ដាហេដ្ឋារចនាសម្ព័ន្ធអគ្កិសនី ក្នុងពេលដែលលក្ខខណ្ឌឧតុនិយមកំពុងអាក្រក់បំផុត ។ ក្នុងទីក្រុងនោះ ដែលសីតុណ្ហភាពធ្លាក់ត្រជាក់ដល់រវាងពី៧ ទៅ១៥អង្សាសេក្រោមសូន្យ គេឃើញមនុស្សម្នានាំគ្នាដើរទាំងងងឹត ទៅហាងទំនិញរកទិញរបស់ប្រើប្រាស់ហូបចុក ដោយហាងមួយចំនួននៅដំណើរការដោយប្រើអាគុយសម្រាប់បំភ្លឺ ។
នៅក្រុងកំពង់ផែអូដេសាជាប់សមុទ្រខ្មៅ មនុស្សជាង៤៧.០០០គ្រួសាររងការដាច់ភ្លើង មកពីរុស្ស៊ីវាយប្រហារទីតាំងថាមពល២កន្លែង ។ ចំណែកមនុស្ស៦នាក់រងរបួស ក្នុងការវាយប្រហារដោយដ្រូន២លើក លើកណ្ដាលក្រុងអូដេសាប៉ះចំបណ្ដាអគារជនស៊ីវិល ។ រីឯការវាយប្រហារនៅតំបន់ក្រុងឌីនីប្រូប៉េក្រូវស្ក៍ បណ្ដាលឲ្យនារីម្នាក់និងបុរសម្នាក់រងរបួស។
ក្រសួងការពារប្រទេសរុស្ស៊ីអះអាង នាថ្ងៃទី១៣ មករា ថា កងទ័ពខ្លួនវាយប្រហារតែលើបណ្ដាគោលដៅទាក់ទិននឹងកងទ័ពអ៊ុយក្រែន ដែលក៏វាយប្រហារដែរ លើបណ្ដាហេដ្ឋារចនាសម្ព័ន្ធរុស្ស៊ី ។ ក្រសួងនោះនិយាយថា ក្នុងថ្ងៃជាមួយគ្នានេះ កងទ័ពអ៊ុយក្រែនបានវាយប្រហាររោងចក្រផលិតដ្រូនមួយនៅណូវ៉ូតាហ្គានរ៉ូស ក្នុងតំបន់ព្រំដែនរ៉ូស្តូវ ព្រមទាំងលើគោលដៅយោធាជាច្រើនស្ថិតក្នុងដែនដីអ៊ុយក្រែនដែលរុស្ស៊ីកាន់កាប់ ។
រីឯនាវាដឹកប្រេងក្រិក២គ្រឿង១គ្រឿងដោតទង់ជាតិម៉ាល់តា និង១គ្រឿងទៀតដោតទង់ជាតិលីបេរីយ៉ា រងការវាយប្រហារដោយដ្រូន២គ្រឿងនៅជិតកំពង់ផែរុស្ស៊ីណូវ៉ូរ៉ូសស៊ីអ៊ីស្ក៍នៅសមុទ្រខ្មៅ តែមិនបណ្ដាលឲ្យមានការខូចខាតធ្ងន់ធ្ងរឡើយ ។ អាមេរិកកាលពីថ្ងៃទី១២ មករា នៅអ.ស.ប បានបរិហាររុស្ស៊ី ដែលវាយប្រហារអ៊ុយក្រែន ដោយមីស៊ីលបាលីស្ទិកជំនាន់ចុងក្រោយORECHNIK មានសមត្ថភាពនុយក្លេអ៊ែរ ដោយថានោះជាការបង្កើនគ្រោះថ្នាក់មិនអាចពន្យល់បានឡើយ ៕
ចែករំលែកព័តមាននេះ