រាជធានីភ្នំពេញ ៖ រថយន្តធុនធ្ងន់និងដឹកទំនិញសំពីងសំពោងរាបសិបគ្រឿង ដែលល្មើសច្បាប់ចូលក្នុងរាជធានីភ្នំពេញមុនម៉ោងអនុញ្ញាត ត្រូវបានកម្លាំងនគរបាល ចរាចរណ៍នៃស្នងការដ្ឋាននគរបាលរាជធានីភ្នំពេញចុះចាប់និងឃាត់យកមកប្រមូលផ្ដុំគ្នាចតត្រៀបត្រា នៅតាមដងផ្លូវ ឌីប៉ូ ដែលស្ថិតនៅសង្កាត់ឃ្មួញ ខណ្ឌសែនសុខ…
រាជធានីភ្នំពេញ ៖ រថយន្តធុនធ្ងន់និងដឹកទំនិញសំពីងសំពោងរាបសិបគ្រឿង ដែលល្មើសច្បាប់ចូលក្នុងរាជធានីភ្នំពេញមុនម៉ោងអនុញ្ញាត ត្រូវបានកម្លាំងនគរបាល ចរាចរណ៍នៃស្នងការដ្ឋាននគរបាលរាជធានីភ្នំពេញចុះចាប់និងឃាត់យកមកប្រមូលផ្ដុំគ្នាចតត្រៀបត្រា នៅតាមដងផ្លូវ ឌីប៉ូ ដែលស្ថិតនៅសង្កាត់ឃ្មួញ ខណ្ឌសែនសុខ រាជធានីភ្នំពេញ។
ការឃាត់រថយន្តដឹកទំនិញសំពីងសំពោងនេះធ្វើឡើងបន្ទាប់ពីស្នងការដ្ឋាននគរបាលរាជធានីភ្នំពេញបានបើកយុទ្ធនាការចុះផ្សព្វផ្សាយ អប់រំ ណែនាំដល់អ្នកបើកបររថយន្តធុនធ្ងន់ទាំងនោះ ហាម ចូលរាជធានីភ្នំពេញនៅពេលថ្ងៃអស់រយៈពេលប្រមាណជិត ៣ខែកន្លងមកហើយ។
តាមស្នងការដ្ឋាននគរបាលរាជធានីភ្នំពេញបានឲ្យដឹងទោះបីជាមានការអប់រំអស់ជាច្រើនខែ តែម្ចាស់យាន្ត និងបណ្តាក្រុមហ៊ុនមួយចំនួន នៅតែបណ្តោយឲ្យរថយន្តដឹកជញ្ជូនធុនធំរបស់ខ្លួន ធ្វើលំហូរចរាចរចូលក្នុងភូមិសាស្ត្ររាជធានីភ្នំពេញ មុនម៉ោងអនុញ្ញាតយ៉ាងច្រើនដដែល ។
ស្នងការដ្ឋាននគរបាររាជធានីភ្នំពេញបានឲ្យដឹងទៀតថា ដោយអនុវត្តតាមបទបញ្ជា និងលការណ៍ណែនាំរបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅថ្ងៃទី១២ ខែមករា ឆ្នាំ២០២៦ កម្លាំងនគរបាលការិយាល័យចរាចរណ៍ផ្លូវគោក ដឹកនាំដោយលោកឧត្តមសេនីយ៍ទោ ហេង រតនា ស្នងការរងទទួលផែនការងារនគរបាលចរាចរណ៍ បានបន្តចុះអនុវត្តន៍ការរឹតបន្តឹងច្បាប់ តាមរយៈការចាប់ឃាត់រាល់រថយន្តធុនធំទាំងឡាយ ដែលនៅតែបន្តល្មើសបើកបរចូលក្នុងភូមិសាស្ត្ររាជធានីភ្នំពេញ មុនម៉ោងពេលអនុញ្ញាត ពោលមុនម៉ោង២១យប់ យកមកធ្វើកិច្ចសន្យាអប់រំណែនាំ ។
កម្លាំងសមត្ថកិច្ចបានចាប់ឃាត់រថយន្តធុនធំជាច្រើនគ្រឿង នៅតាមបណ្តាគោលដៅទាំងអស់របស់សមត្ថកិច្ចក្នុងរាជធានីភ្នំពេញ ដោយក្នុងនោះ សមត្ថកិច្ចក៏បានបន្តចាប់ឃាត់រថយន្តធុនធំដែលធ្លាប់បានល្មើសការចរាចរចូលខុសម៉ោង និងធ្លាប់បានធ្វើកិច្ចសន្យាម្តងរួចមកហើយដែរ ពោលគឺម្ចាស់យាន្តមិនស្តាប់ និងគោរពតាមការណែនាំរបស់សមត្ថកិច្ច ។
ការអនុវត្តន៍របស់កម្លាំងសមត្ថកិច្ចនេះ គឺមានគោលដៅខ្ពស់សំដៅធានាសុខសុវត្ថិភាពលើដងផ្លូវសាធារណៈ និងកាត់បន្ថយបានពីគ្រោះថ្នាក់ចរាចរណ៍ ដែលជាកត្តាចម្បងក្នុងការបំផ្លាញទ្រព្យសម្បត្តិ និងសម្លាប់អាយុជីវិតពលរដ្ឋ ។
លោកឧត្តមសេនីយ៍ទោ ហេង រតនា ស្នងការរងទទួលផែនការងារនគរបាលចរាចរណ៍បានធ្វើបទបង្ហាញឲ្យដឹងថា រថយន្តដែលសមត្ថកិច្ចឃាត់នោះសុទ្ធតែមានឡូហ្គោនិងសុទ្ធតែឡានម្ចាស់ដដែលៗដែលសមត្ថកិច្ចធ្លាប់ធ្វើកិច្ចសន្យា ហើយរថយន្តខ្លះទំរាំយកពីច្រមុះជ្រូកស្ទឹងមានជ័យមកបានអស់រយះពេល ប្រមាណ១ម៉ោង ដោយចាំម្ចាស់ឡូហ្គោនិងមេការមក។
លោកឧត្តមសេនីយ៍ទោ ហេង រតនា ស្នងការរងបើថ្ងៃនេះរថយន្តទាំងចូលក្រុងបានវាមិនមានសុវត្តិភាពសុវត្តិភាពសម្រាប់ប្រជាពលរដ្ឋនោះទេករណីចរាចរណ៍នឹងកើតឡើងដែលក្នុងថ្ងៃនេះអាចកើតមានគ្រោះថ្នាក់ប្រមាណ៤ទៅ៥ករណី។
លោកស្នងការរងក្នុងនាមនគរបាលចរាចរណ៍ក៍បានអំពាវនាវ ម្តងហើយម្តងទៀត ដល់បងប្អូននិងក្រុមហ៊ុនមានធំសូមកុំ ចូលរាជធានីភ្នំពេញខុសម៉ោងខុសពេលទៀតព្រោះយើងបានធ្វើការណែនាំអប់រំអស់រយះពេលជិត៣ខែហើយ។ម្យ៉ាងទៀតការចរាចរណ៍ពេលថ្ងៃបង្កគ្រោះថ្នាក់ខ្លាំងណាស់សង្ឃឹមថា ម្ចាស់រថយន្តនិងម្ចាស់ក្រុមហ៊ុនណែនាំដល់អ្នកបើកបរបញ្ឍប់ចូលក្រុងនៅពេលថ្ងៃតទៅទៀត សមត្ថកិច្ចនឹងបន្តអប់រំតទៅទៀត៕
ចែករំលែកព័តមាននេះ