រោងចក្រផលិតសំបកកង់រថយន្ត WANLI TIRE តម្លៃជិត៣០០លានដុល្លារ ដាក់ឱ្យដំណើរការ នៅស្រុកចន្ទ្រា
ខេត្តស្វាយរៀង ៖ រោងចក្រផលិតសំបកកង់រថយន្ត ដែលមានតម្លៃជិត ៣០០លានដុល្លារ របស់ក្រុមហ៊ុន វ៉ាន់លី ថាយអឺរ WANLI TIRE…
ខេត្តស្វាយរៀង ៖ រោងចក្រផលិតសំបកកង់រថយន្ត ដែលមានតម្លៃជិត ៣០០លានដុល្លារ របស់ក្រុមហ៊ុន វ៉ាន់លី ថាយអឺរ WANLI TIRE (CAMBODIA) CO., LTD បានបើកសម្ពោធដាក់ឱ្យដំណើរការដំណាក់កាលទី១ នៅព្រឹកថ្ងៃទី១២ ខែមករា ឆ្នាំ ២០២៦ ក្រោមវត្តមានលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សា អភិវឌ្ឍន៍កម្ពុជា។រោងចក្រផលិតសំបកកង់រថយន្ត វ៉ាន់លី ថាយអឺរ មានទីតាំងស្ថិតក្នុងតំបន់ សេដ្ឋកិច្ចពិសេស ស៊ីនបាវិត ក្នុងស្រុកចន្ទ្រា ដែលមានទំហំផ្ទៃដី ៣២ហិកតា និងអាចផ្ដល់ការងារប្រមាណ ៦០០កន្លែង ។ ការសម្ពោធដាក់ឱ្យដំណើរការជាផ្លូវការនូវក្រុមហ៊ុនផលិត សំបកកង់រថយន្ត វ៉ាន់លី ថាយអឺរ គឺជាសក្ខីភាពសបញ្ជាក់ឱ្យឃើញ ពីសមិទ្ធផល ដ៏ថ្លៃថ្លាថ្មីមួយទៀត ដែលកើតចេញពីចំណងកិច្ចសហប្រតិបត្តិការដ៏រឹងមាំ រវាងកម្ពុជា និងសាធារណរដ្ឋប្រជាមានិតចិន ។ ទន្ទឹមនេះ ពិធីនេះក៏បង្ហាញយ៉ាងជាក់ច្បាស់ អំពីការផ្តល់សេចក្តីទុកចិត្តរបស់វិស័យឯកជន មកលើសក្តានុពលដែលមាននៅកម្ពុជា ។
លោក ម៉ែន សុភក្តិ ប្រធានសមាគមអភិវឌ្ឍន៍ កៅស៊ូ មានប្រសាសន៍ថា វត្តមានរោងចក្រផលិតសំបកកង់រថយន្តនៅកម្ពុជា បានជួយស្រូបទាញ ជ័រកៅស៊ូក្នុងស្រុកកាន់តែច្រើន ។
លោក ម៉ែន សុភក្ដិ មានប្រសាសន៍ថា ៖ «ពីមុន យើងលក់កៅស៊ូ នាំចេញទៅក្រៅប្រទេស ឥឡូវ មានរោងចក្រកង់ឡាន ដែលគេមកផលិតដោយ ប្រើកៅស៊ូធម្មជាតិ ផ្នែក នៃគ្រឿងផ្សំផលិតកង់ឡាន គឺទិញកៅស៊ូធម្មជាតិ ក្នុងស្រុក ហើយយើងលក់កៅស៊ូក្នុងស្រុក យើងអត់ចំណាយ លើការដឹក ជញ្ជូនសេវាផ្សេងៗ» ។
នៅក្នុងឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគលើរោងចក្រផលិតសំបកកង់រថយន្ត ចំនួន០៤ ជាមួយទុនវិនិយោគ ៧៧៤លានដុល្លារ ស្ថិតនៅតំបន់សេដ្ឋកិច្ចពិសេស ISI ខេត្តព្រះសីហនុ និងតំបន់សេដ្ឋកិច្ចពិសេស ស្ថិតក្នុងខេត្តស្វាយរៀង ។
កម្ពុជា រកចំណូលបានជាង ១,២ពាន់លានដុល្លារ ពីការនាំចេញសំបកកង់រថយន្តនៅក្នុងរយៈពេល ១១ខែ ឆ្នាំ២០២៥ កើនឡើង ៥៧,៨៨% ធៀប នឹង រយៈពេលដូចគ្នា នៅឆ្នាំ២០២៤ ខណៈតម្រូវការជ័រកៅស៊ូ ក្នុងស្រុក កើនឡើងខ្ពស់ ៕
ចែករំលែកព័តមាននេះ