ប្រទេសវៀតណាម ៖ អាជ្ញាធរទីក្រុងហូជីមិញ (Ho Chi Minh) បានបំបែកសំណុំរឿងស្តីពីសុវត្ថិភាពចំណីអាហារ ពាក់ព័ន្ធនឹងក្រុមហ៊ុនផលិតមីមួយកន្លែង ដែលប្រើសារធាតុគីមីបង្កគ្រោះថ្នាក់ ដើម្បីផលិតមីមានជាតិពុលរាប់រយតោនលក់នៅលើទីផ្សារ។…
ប្រទេសវៀតណាម ៖ អាជ្ញាធរទីក្រុងហូជីមិញ (Ho Chi Minh) បានបំបែកសំណុំរឿងស្តីពីសុវត្ថិភាពចំណីអាហារ ពាក់ព័ន្ធនឹងក្រុមហ៊ុនផលិតមីមួយកន្លែង ដែលប្រើសារធាតុគីមីបង្កគ្រោះថ្នាក់ ដើម្បីផលិតមីមានជាតិពុលរាប់រយតោនលក់នៅលើទីផ្សារ។ នេះបើតាមប្រភពពីសារព័ត៌មាន VietNamNet, Dan Tri និងគេហទំព័រ Man TV ចេញផ្សាយថ្ងៃទី១២ ខែមករា ឆ្នាំ២០២៦។
អស់រយៈពេល១០ឆ្នាំកន្លងមកហើយ ដែលអាជីវកម្មឈ្មោះ Chau Phat ស្ថិតក្នុងទីក្រុងហូជីមិញបានប្រើសារធាតុគីមីហាមឃាត់មកផលិតមី ដោយបានចែកចាយផលិតផលមីពុលរាប់រយតោនរបស់ខ្លួនចូលទៅក្នុងទីផ្សារ។
នៅក្នុងថ្ងៃទី១២ ខែមករា ឆ្នាំ២០២៦ នាយកដ្ឋានប៉ូលិសសេដ្ឋកិច្ចនៃទីក្រុងហូជីមិញបានប្រកាសថា ខ្លួនបានចាប់ផ្តើមនីតិវិធីផ្លូវច្បាប់ប្រឆាំងនឹងលោក វឿង លឿង ទួន (Vuong Luong Toan) អាយុ ៤៥ ឆ្នាំ ពីបទរំលោភលើបទប្បញ្ញត្តិសុវត្ថិភាពចំណីអាហារ។ បុរសរូបនេះ គឺជាម្ចាស់អាជីវកម្ម Chau Phat ផលិត និងលក់មី ដែលមានទីតាំងនៅផ្លូវ Luy Ban Bich សង្កាត់ Phu Thanh ទីក្រុងហូជីមិញ។
នៅពាក់កណ្តាលខែធ្នូ ឆ្នាំ២០២៥ មន្ត្រីប៉ូលិសសេដ្ឋកិច្ចបានឆ្មក់ចូលរោងចក្រ Chau Phat ដោយចាប់ខ្លួនកម្មករជាច្រើននាក់ ដែលកំពុងលាយសារធាតុគីមីចូលទៅក្នុងម្សៅមីក្រោមលក្ខខណ្ឌការងារមិនស្អាត និងគ្មានសុវត្ថិភាព។ ជាមួយគ្នានោះ អាជ្ញាធរក៏បានរឹបអូសមីផលិតរួចចំនួន ៨២០ គីឡូក្រាម ដែលក្រោយមកត្រូវបានរកឃើញថាមានផ្ទុកសារធាតុគីមីបន្ថែមដែលបង្កគ្រោះថ្នាក់។
ការស៊ើបអង្កេតបានបង្ហាញថា លោក ទួន ជាមេខ្លោងនៅពីក្រោយប្រតិបត្តិការនេះ ដោយដឹកនាំក្រុមការងារដែលមានជំនាញផលិតមីមានសារធាតុគីមី បន្ទាប់មកត្រូវបានលក់ទៅលើទីផ្សារ និងភោជនីយដ្ឋាននានាទូទាំងទីក្រុង។ លោក ទួន បានទទួលស្គាល់ថានៅក្នុងរយៈពេល១០ឆ្នាំមកនេះ គាត់បានប្រើសារធាតុខុសច្បាប់ជាច្រើនប្រភេទ រួមទាំង បូរ៉ាក់ (Borax), សូដា (Soda) និងសូដ្យូមស៊ីលីត (Sodium Silicate) ដើម្បីឱ្យមីស្អិត ទន់ និងមានពណ៌ទាក់ទាញ។ សារធាតុគីមីទាំងនេះ ត្រូវបានហាមឃាត់ក្នុងការផលិតម្ហូបអាហារ ដោយសារតែហានិភ័យសុខភាពធ្ងន់ធ្ងរដល់អ្នកទទួលទាន។
តាមប៉ូលិស រោងចក្ររបស់លោក ទួន បានផលិតមីមានសារធាតុគីមីប្រហែល ៦០០ ទៅ ៧០០ គីឡូក្រាមជារៀងរាល់ថ្ងៃ។ នៅក្នុងរយៈពេល ៣ ឆ្នាំមកនេះ មីដែលមានជាតិគីមីប្រហែល ៨០០ តោន ត្រូវបានលក់ក្នុងទីផ្សារ ហើយក្នុងរយៈពេល១០ឆ្នាំ ចំនួនសរុបនៃមីមានសារធាតុគីមីហាមឃាត់ដែលបានចរាចរលើទីផ្សារត្រូវបានគេជឿថាមានចំនួនដ៏ច្រើន។
បច្ចុប្បន្នអាជ្ញាធរកំពុងតែបន្តបង្កើន និងពង្រីកការស៊ើបអង្កេតរបស់ខ្លួន ដើម្បីកំណត់ការចូលរួមរបស់បុគ្គលផ្សេងទៀត ដែលជាប់ទាក់ទងនឹងប្រតិបត្តិការនេះ៕
ចែករំលែកព័តមាននេះ