ខេត្តសៀមរាប ៖ លោកឧត្តមសេនីយ៍ត្រី សឿន សេន ស្នងការរងនគរបាលខេត្ត ទទួលផែនការងារនគរបាលប្រឆាំងបទល្មើសសេដ្ឋកិច្ចបានឱ្យដឹងតាមតេឡេក្រាមថា កាលពីវេលាម៉ោងប្រមាណ៧ និង៤០នាទីយប់ថ្ងៃទី៩ ខែមករា…
ខេត្តសៀមរាប ៖ លោកឧត្តមសេនីយ៍ត្រី សឿន សេន ស្នងការរងនគរបាលខេត្ត ទទួលផែនការងារនគរបាលប្រឆាំងបទល្មើសសេដ្ឋកិច្ចបានឱ្យដឹងតាមតេឡេក្រាមថា កាលពីវេលាម៉ោងប្រមាណ៧ និង៤០នាទីយប់ថ្ងៃទី៩ ខែមករា ឆ្នាំ២០២៦ កន្លងទៅ លោកបានដឹកនាំកម្លាំងផែនការងារនគរបាលប្រឆាំងបទល្មើសសេដ្ឋកិច្ច សហការជាមួយកម្លាំងនគរបាលស្រុក ដោយមានការសម្របសម្រួលនីតិវិធីពីឯកឧត្តម សៀង សុខ ព្រះរាជអាជ្ញានៃអយ្យការអមសាលាដំបូងខេត្ត បានចុះបង្ក្រាបរថយន្តដឹកជញ្ជូនលៀសគ្មានលិខិតអនុញ្ញាតចំនួន២ករណី រួចប្រគល់ឱ្យមន្ត្រីខណ្ឌរដ្ឋបាលជលផល ។
ក្រោយពីការចាប់ឃាត់រថយន្តដឹកលៀសទាំង២គ្រឿង ព្រមទាំងជនសង្ស័យម្នាក់់ ត្រូវបានកសាងសំណុំរឿងបញ្ជូនទៅកាន់ស្ថាប័នអយ្យការអមសាលាដំបូងខេត្ត ដើម្បីអនុវត្តទៅតាមច្បាប់ស្តីពីជលផល ។ ការឃាត់រថយន្តដឹកលៀសនេះ បានធ្វើឡើងនៅព្រែកឃ្លាំង មុខវត្តស្តី ភូមិព្រែកស្រមោច និងភូមិតាច្រនៀង ឃុំកំពង់ឃ្លាំង ស្រុកសូទ្រនិគម ។
សមត្ថកិច្ចបានចាប់ឃាត់ខ្លួនជនម្នាក់ ឈ្មោះ ភី សុភ័ក្ត្រ ភេទប្រុស អាយុ៣៦ឆ្នាំ ជាអ្នកដឹកជញ្ជូនលៀសដោយគ្មានលិខិតអនុញ្ញត ជាមួយនឹងរថយន្តម៉ាកសាំយ៉ុង ពណ៌បៃតង ពាក់ផ្លាកលេខភ្នំពេញ ២H-៣៤៦០ ដឹកលៀសចំនួន ១៥០បាវស្មើនឹង ៧ ៥០០គីឡូក្រាម ។ ជននេះរស់នៅក្នុងភូមិក្រចាប់ សង្កាត់ព្រៃខ្លា ស្រុកស្វាយអន្ទរ ខេត្តព្រៃវែង ។ ចំណែកជនម្នាក់ទៀតរត់គេចខ្លួនបាត់ បើកបររថយន្ត អ៊ីស៊ុយហ្ស៊ុយ ពណ៌ផ្ទៃមេឃ ពាក់ផ្លាកលេខ ចង្កូតស្តាំ KCHH.០០៥៦ ដឹកលៀសគ្មានលិខិតអនុញ្ញាតចំនួន ២១ ២៥០គីឡូក្រាម។
រថយន្តនេះ មានផ្លាកលេខមិនប្រក្រតីមួយគូទៀតនៅលើរថយន្ត ភ្នំពេញ ៣B-០៩៣០ ។ ជាសរុប លៀសដែលត្រូវបានចាប់ឃាត់ទាំង២រថយន្តមានទម្ងន់ ២៨ ៧៥០គីឡូក្រាម ត្រូវបានចាក់ចូលទៅក្នុងបឹងទន្លេសាបវិញ នៅព្រែកឃ្លាំងមុខវត្តស្តី ភូមិព្រែកស្រមោច និងភូមិតាច្រនៀង ឃុំកំពង់ឃ្លាំង ស្រុកសូទ្រនិគម ៕
ចែករំលែកព័តមាននេះ