ខេត្តកំពង់ស្ពឺ ៖ បុរសចំនួន២នាក់បានស្លាប់ភ្លាមៗនៅកន្លែងកើតហេតុ ខណៈដែលជិះម៉ូតូស៊េរីទំនើបឌុបគ្នា ហើយត្រូវបានរថយន្តមិនស្គាល់ម៉ាកបុកចំពីមុខពេញទំហឹង រួចអ្នកបើកបររថយន្តបានបន្ថែមល្បឿនបើកគេចខ្លួនបាត់ស្រមោល។
ហេតុការណ៍រថយន្តមិនស្គាល់ម៉ាកបើកលឿនបុកម៉ូតូបណ្តាលឱ្យស្លាប់មនុស្ស០២នាក់បានកើតឡើងកាលពីវេលាម៉ោង៩និង៣០នាទីយប់ថ្ងៃទី១១ ខែមករា ឆ្នាំ២០២៦ នៅតាមបណ្តោយផ្លូវជាតិលេខ៤ ចន្លោះបង្គោលគីឡូម៉ែត្រលេខ៣៦ទៅលេខ៣៧ ត្រង់ចំណុចភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបាននិយាយឱ្យដឹងថា នៅមុនពេលកើតហេតុមានរថយន្តមួយគ្រឿង មិនស្គាល់ម៉ាក អ្នកបើកបរមិនស្គាល់អត្តសញ្ញាណ បានបើកបរតាមបណ្តោយផ្លូវជាតិលេខ៤ ពីទិសខាងកើតទៅទិសខាងលិច លុះពេលធ្វើដំណើរមកដល់ចំណុចកើតហេតុខាងលើបានបុកជាមួយម៉ូតូស៊េរីទំនើប មួយគ្រឿងម៉ាក ហុងដា ឃ្លីច ពណ៌ខ្មៅ ពាក់ផ្លាកលេខ បាត់ដំបង 1AY-6465 អ្នកបើកបរមានឈ្មោះ សែន ប៊ុនធឿន ភេទប្រុស អាយុ៣២ឆ្នាំ រស់នៅក្នុងភូមិទួលជ្រៃ ឃុំសំពៅលូន ស្រុកសំពៅលូន ខេត្តបាត់ដំបង បានឌុបឈ្មោះ វុធ ចាន់ធី ភេទប្រុស អាយុ៣៤ឆ្នាំ រស់នៅក្នុងភូមិមុខខេត្ត សង្កាត់រកាធំ ក្រុងច្បារមន ខេត្តកំពង់ស្ពឺដែលកំពុងបើកបរ ពីទិសខាងលិចទៅទិសខាងកើត ចំពីមុខយ៉ាងពេញទំហឹងបណ្ដាលឱ្យអ្នកជិះម៉ូតូស្លាប់ភ្លាមៗនៅកន្លែងកើតហេតុ ពេលឃើញដូចនោះអ្នកបើកបររថយន្តបានបន្ថែមល្បឿន បើករថយន្តរត់គេចខ្លួនក្រោយពេលកើតហេតុរួច។
នគរបាលស្រុកសំរោងទងបាននិយាយឱ្យដឹងថា ក្រោយកើតហេតុនគរបាលជំនាញបានចុះធ្វើការវាស់វែងនៅកន្លែងកើតហេតុសពជនរងគ្រោះទាំង០២នាក់ឈ្មោះ (សែន ប៊ុនធឿន និងឈ្មោះ វុធ ចាន់ធី) រថយន្តសាមុយដឹកយកទៅតម្កល់នៅមន្ទីរពេទ្យបង្អែកខេត្តកំពង់ស្ពឺរង់ចាំសាច់ញាតិក្រុមគ្រួសារទទួលយកទៅធ្វើបុណ្យតាមប្រពៃណី។
នគរបាលស្រុកសំរោងទងបានបន្តឱ្យដឹងទៀតថា ករណីខាងលើនេះរងការខូចខាតម៉ូតូមួយគ្រឿងកំរិតធ្ងន់។ នគរបាលបានដឹកយកទៅរក្សាទុកនៅប៉ុស្តិ៍នគរបាលរដ្ឋបាលឃុំត្រពាំងគងបណ្តោះអាសន្នសិន។
ចំណែកអ្នកបើកបររថយន្តនិងរថយន្ត សមត្ថកិច្ចជំនាញកំពុងធ្វើការស្រាវជ្រាវស្វែងរក និងកសាងសំណុំរឿង ដើម្បីចាត់ការបន្តតាមនិតិវិធី៕
ចែករំលែកព័តមាននេះ