សុខភាព៖ យោងតាមការស្រាវជ្រាវនិងការផ្សាយរបស់សារព័ត៌មានបរទេសផ្នែកសុខភាពនិងអាហារូបត្ថម្ភ បានបង្ហាញថា ការចម្អិនម្ហូបតាមវិធី “ខ” ទោះបីជាមានរសជាតិឆ្ងាញ់ដិតមាត់ ប៉ុន្តែវាជាវិធីសាស្ត្រដែលផ្ដល់ហានិភ័យខ្ពស់ដល់សុខភាពតម្រងនោមជាងការឆា ស្ងោរ ឬចំហុយ។

មូលហេតុចម្បងគឺដោយសារការរំងាស់ក្នុងរយៈពេលយូរធ្វើឱ្យសាច់ជ្រាបទឹកគ្រឿងទេសចូលទៅក្នុងយ៉ាងជ្រៅ ដែលបណ្ដាលឱ្យរាងកាយទទួលបានជាតិសូដ្យូមពីអំបិល ទឹកត្រី និងទឹកស៊ីអ៊ីវលើសកម្រិតកំណត់។ នៅពេលរាងកាយលើសជាតិសូដ្យូម វានឹងរក្សាជាតិទឹកកាន់តែច្រើន ធ្វើឱ្យសម្ពាធឈាមកើនឡើង និងបង្ខំឱ្យតម្រងនោមត្រូវប្រឹងធ្វើការខ្លាំងលើសពីសមត្ថភាពធម្មតាដើម្បីបញ្ចេញជាតិពុលទាំងនោះ។

ក្រៅពីបញ្ហាជាតិប្រៃ ការថែមស្ករច្រើនក្នុងមុខម្ហូបខដើម្បីយកពណ៌និងរសជាតិ ក៏ជាប្រភពនៃជំងឺធាត់ និងជំងឺថ្លើមផងដែរ។ យោងតាមការណែនាំរបស់អង្គការសុខភាពពិភពលោក យើងគួរទទួលទានអំបិលត្រឹមតែ ៤ ទៅ ៥ ក្រាមប៉ុណ្ណោះក្នុងមួយថ្ងៃ។ ដើម្បីការពារតម្រងនោម អ្នកគួរកាត់បន្ថយការញ៉ាំម្ហូបដែលមានរសជាតិដិតខ្លាំង រួចងាកមកប្រើគ្រឿងទេសធម្មជាតិដូចជា ខ្ទឹម ខ្ញី ឬស្លឹកគ្រៃដើម្បីបង្កើនរសជាតិជំនួសវិញ និងត្រូវយកចិត្តទុកដាក់បំផុតលើការកម្រិតជាតិស្ករ អំបិល និងប្រេងនៅក្នុងរបបអាហារប្រចាំថ្ងៃ។

សូមបញ្ជាក់៖ នេះគ្រាន់តែជាការចែករំលែកចំណេះដឹងសុខភាពបឋមប៉ុណ្ណោះ។ បើមានបញ្ហាសុខភាពខុសធម្មតា សូមស្វែងរកការប្រឹក្សាពីគ្រូពេទ្យជំនាញ ដើម្បីសុវត្ថិភាព និងការព្យាបាលទាន់ពេលវេលា៕

​