លោក គីម ជុងអ៊ុន សន្យាគាំទ្រដោយគ្មានលក្ខខណ្ឌ និងអចិន្ត្រៃយ៍ ចំពោះលោក ពូទីន
ទីក្រុងព្យុងយ៉ាង ៖ មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានសន្យាថានឹងគាំទ្រដោយគ្មានលក្ខខណ្ឌ…
ទីក្រុងព្យុងយ៉ាង ៖ មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានសន្យាថានឹងគាំទ្រដោយគ្មានលក្ខខណ្ឌ ចំពោះគោលនយោបាយ និងការសម្រេចចិត្តទាំងអស់របស់ប្រធានាធិបតីរុស្ស៊ី លោក វ្លាដឺមៀរ ពូទីន (Vladimir Putin)។ នេះបើតាមប្រព័ន្ធផ្សព្វផ្សាយរដ្ឋកូរ៉េខាងជើង ចេញផ្សាយនៅថ្ងៃទី៩ ខែមករា ឆ្នាំ២០២៦។
យោងតាមទីភ្នាក់ងារចារកម្មកូរ៉េខាងត្បូង និងលោកខាងលិច បានឱ្យដឹងថា កូរ៉េខាងជើងបានបញ្ជូនកងទ័ពរាប់ពាន់នាក់ទៅប្រយុទ្ធដើម្បីរុស្ស៊ី ខណៈដែលទីក្រុងមូស្គូកំពុងបន្តការឈ្លានពានលើអ៊ុយក្រែនរយៈពេលជិត៤ឆ្នាំមកហើយ។
នៅក្នុងលិខិតមួយដែលចែករំលែកដោយទីភ្នាក់ងារសារព័ត៌មានកណ្តាលកូរ៉េ (KCNA) ដែលគ្រប់គ្រងដោយរដ្ឋកូរ៉េខាងជើង លោក គីម បានបញ្ជាក់ថា លោកមានអារម្មណ៍ថា ទំនាក់ទំនងមិត្តភាពពិតប្រាកដផ្តល់ពីលោក ពូទីន ហើយបានចាត់ទុកទំនាក់ទំនងនេះថា ទំនាក់ទំនងដ៏មានតម្លៃបំផុត។
លោក គីម បានសរសេរថា «កិច្ចសហប្រតិបត្តិការយ៉ាងជិតស្និទ្ធរវាងប្រទេសទាំងពីរនឹងបន្តនៅក្នុងវិស័យផ្សេងៗនាពេលអនាគត»។ លោកបានបន្ថែមថា «ខ្ញុំនឹងគោរពដោយគ្មានលក្ខខណ្ឌ និងគាំទ្រដោយគ្មានលក្ខខណ្ឌចំពោះគោលនយោបាយ និងការសម្រេចចិត្តទាំងអស់របស់អ្នក (លោកពូទីន) ហើយខ្ញុំមានឆន្ទៈនៅជាមួយអ្នកជានិច្ច ដើម្បីជាប្រយោជន៍ដល់អ្នក និងប្រទេសរុស្ស៊ីរបស់អ្នក ហើយជម្រើសនេះនឹងស្ថិតស្ថេរ និងអចិន្ត្រៃយ៍»។
កំណត់ចំណាំនេះ ធ្វើឡើងជាការឆ្លើយតបទៅនឹងលិខិតមួយដែលបានផ្ញើដោយមេដឹកនាំរុស្ស៊ី នៅពេលដែលមេដឹកនាំទាំងពីរបានផ្លាស់ប្តូរសារក្នុងឱកាសឆ្នាំថ្មី ដោយលោក គីមបានលើកឡើងថា កូរ៉េខាងជើង និងរុស្ស៊ីបានចែករំលែក ឈាម ជីវិត និងសេចក្តីស្លាប់ នៅក្នុងសង្គ្រាមអ៊ុយក្រែន។ យោងតាមរបាយការណ៍ KCNA លោក ពូទីន បានសាទរចំពោះមិត្តភាពដែលមិនអាចយកឈ្នះបានរវាងប្រទេសទាំងពីរផងដែរ។
បណ្តាអ្នកវិភាគបានលើកឡើងថា កូរ៉េខាងជើងបានបង្កើនការធ្វើតេស្តមីស៊ីលក្នុងប៉ុន្មានឆ្នាំថ្មីៗនេះ ដែលមានគោលបំណងធ្វើឱ្យប្រសើរឡើងនូវសមត្ថភាពវាយប្រហារដោយភាពជាក់លាក់ ប្រកួតប្រជែងជាមួយសហរដ្ឋអាមេរិក និងកូរ៉េខាងត្បូង និងសាកល្បងអាវុធមុនពេលនាំចេញទៅរុស្ស៊ី។
ក្រៅពីការបញ្ជូនកងទ័ពទៅប្រយុទ្ធឱ្យរុស្ស៊ី កូរ៉េខាងជើងបានបញ្ជូនគ្រាប់កាំភ្លើងធំ មីស៊ីល និងប្រព័ន្ធរ៉ុក្កែតរយៈចម្ងាយឆ្ងាយផងដែរ។ បណ្តាអ្នកវិភាគនិយាយថា រុស្ស៊ីកំពុងបញ្ជូនជំនួយហិរញ្ញវត្ថុ បច្ចេកវិទ្យាយោធា ក៏ដូចជាការផ្គត់ផ្គង់ស្បៀងអាហារ និងថាមពលទៅឱ្យកូរ៉េខាងជើង៕ ប្រភព ៖ AFP
ចែករំលែកព័តមាននេះ