ខេត្តស្វាយរៀង៖ប្រជាពលរដ្ឋភូមិឬស្សីជួរជាច្រើនគ្រួសារលើកគ្នាតវ៉ា សូមឲ្យអាជ្ញាធរខេត្តស្វាយរៀងជួយអន្តរាគមន៍ដោះស្រាយបញ្ហាក្រុមហ៊ុនជីករណ្តៅដីលក់១ក្រុមមកពីស្រុកកំពង់ត្របែកខេត្តព្រៃវែងបានយកគ្រឿងចក្រមកជីកដីស្រែប្រាំងរបស់ពួកគាត់នៅចំណុចព្រែកភូមិឬស្សីជួរឃុំក្រោលគោស្រុកស្វាយជ្រំដោយអយុត្តិធម៌ គឺជីករាលដាលតាមចិត្តចង់បាន ។
ប្រជាពលរដ្ឋលើកគ្នាតវ៉ានេះកើតឡើងនៅវេលាម៉ោង១០និង៣០នាទីព្រឹកថ្ងៃទី៧មករា២០២៦នៅភូមិឬស្សីជួរឃុំក្រោលគោស្រុកស្វាយជ្រំ។
បើតាមស្ត្រីម្នាក់តំណាងឲ្យប្រជាពលរដ្ឋភូមិឬស្សីជួរ បានប្រាប់អ្នកសារព័ត៌មានយើងថា នេះជាលើកទី២ហើយដែលប្រជាពលរដ្ឋលើកគ្នាមកតវ៉ា លើកទី១ ប្រជាពលរដ្ឋមកតវ៉ា ឲ្យក្រុមហ៊ុនជីករណ្តៅដៅលក់ដែលមានឈ្មោះជិន មានទីលំនៅភូមិព្រៃឈរ ឃុំព្រៃឈរ ស្រុកំពង់ត្របែកដែលជាមេការក្រុមហ៊ុន ផ្អាកសកម្មភាពគ្រឿងចក្រ រង់ចាំការដោះស្រាយ ដោយមានសមត្ថកិច្ចនគបាលឃុំក្រោលគោនិងក្រុមប្រឹក្សាឃុំក្រោលគោ មកហាមឃាត់ដែរ ។ ក៏ប៉ុន្តែក្រុមហ៊ុនជីករណ្តៅដីលក់នេះគេមិនព្រមស្តាប់ទេ សង្ស័យអាងខ្នងយក្ស ហើយនៅតែបន្តសកម្មភាព ដោយពួកគេសួររកលិខិតហាមឃាត់ពីអាជ្ញាធរឃុំស្រុក ។
ចំណែកលោកមេឃុំក្រោលគោ លោកមានប្រសាសថា ឲ្យប្រជាពលរដ្ឋទៅរារាំងនិងឃាត់គ្រឿងចក្រខ្លួនឯងទៅ លោកពុំមានសមត្ថកិច្ចចេញលិខិតហាមឃាត់ទេ ចាំលោករាយការណ៍ទៅលោកអភិបាលស្រុកស្វាយជ្រំដើម្បីមានវិធានការដោះស្រាយ។បើតាមលោកក្រុមប្រឹក្សាឃុំក្រោលគោ បានឲ្យដឹងថា ព្រែកនេះជាអូរធម្មជាតិទទឹង២០ម៉ែត្រមានចំណីព្រែកគឺទទឹងសងខាងកន្លែងខ្លះ៣០ម៉ែត្រកន្លែងខ្លះ៦០ម៉ែត្រនិងកន្លែងខ្លះ១០០ម៉ែត្រលាតសន្ធឹងចាប់ពីថ្នល់ជាតិលេខ១ត្រង់ចំណុចស្ពានខាងលិចផ្សារក្រោលគោពីត្បូងទៅជើងហើយជាប់ព្រំប្រទល់គ្នា ខាងលិចគឺជាប់ភូមិល្បែងឃុំព្រៃឈ ស្រុកកំពង់ត្របែកខេត្តព្រៃវែង ខាងកើតជាប់ភូមិឬស្សីជួរឃុំក្រោលគោស្រុកស្វាយជ្រំខេត្តស្វាយរៀង ។ បើគិតតាមរដ្ឋបាលខេត្តគឺចែកពាក់កណ្តាលព្រែកឬអូរនេះហើយនៅតាមបណ្តោយចំណីព្រែកទាំងសងខាងគឺប្រជាពលរដ្ឋបានគ្រប់គ្រងអាស្រ័យផល ធ្វើស្រែប្រាំងតាំងពីឆ្នាំ៧៩ឆ្នាំ៨០រហូតបច្ចុប្បន្ន។
ទើបតែនៅដើមខែ១១ឆ្នាំ២០២៥ មានក្រុមហ៊ុនជីករណ្តៅដី នៅឃុំព្រៃឈរស្រុកកំពង់ត្របែកយកគ្រឿងចក្រមកធ្វើសកម្មភាពជីកយកអាចម៍ដី ដឹកទៅស្រុកកំពង់ត្របែក ។ ពេលអាជ្ញាធរឃុំទៅសួរក្រុមហ៊ុនប្រាប់ថា គេជីកស្តារព្រែក ។
ក៏ប៉ុន្តែនៅពាក់កណ្តាលខែធ្នូ២០២៥ស្រាប់តែជីកចូលមកដីចំណីព្រែកដែលជាដីស្រែរបស់ប្រជាពលរដ្ឋភូមិឬស្សីជួរឃុំក្រោលគោគ្រប់គ្រងអាស្រ័យផល ទទឹង៥០ ទៅ១០០ម៉ែត្របណ្តោយ២០០ម៉ែត្រ និងកំពុងជីកទៅមុខទៀតទើបប្រជាពលរដ្ឋភូមិឬស្សីជួរឃុំក្រោលគោផ្ទុះការតវ៉ា។
មានន័យថាក្រុមហ៊ុនជីករណ្តៅដីយកអាចម៌ដីលក់នៅស្រុកកំពង់ត្របែកខេត្តព្រៃវែងជីករណ្តៅដីរំលោភយកដីប្រជាពលរដ្ឋឃុំក្រោលគោស្រុកស្វាយជ្រំខេត្តស្វាយរៀង។ទាក់ទិនករណីនេះដែរមិនអាចរកការបំភ្លឺពីលោកអភិបាលស្រុកស្វាយជ្រំបានទេរហូតដល់រសៀលថ្ងៃទី៨មករា២០២៦នេះ ។
ព័ត៌មានបន្ថែមនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ