ទីក្រុងបាងកក ៖ ការិយាល័យសេដ្ឋកិច្ចកសិកម្ម ហៅកាត់ថា OAE នៃក្រសួងកសិកម្ម និងសហករណ៍ថៃ បានព្រមានបណ្តាក្រុមហ៊ុននាំចេញផ្លែទុរេនថៃ ឱ្យកែលម្អគុណភាពផលិតផល ដើម្បីបំពេញតាមច្បាប់សុវត្ថិភាពដ៏តឹងរឹងរបស់ប្រទេសចិន…
ទីក្រុងបាងកក ៖ ការិយាល័យសេដ្ឋកិច្ចកសិកម្ម ហៅកាត់ថា OAE នៃក្រសួងកសិកម្ម និងសហករណ៍ថៃ បានព្រមានបណ្តាក្រុមហ៊ុននាំចេញផ្លែទុរេនថៃ ឱ្យកែលម្អគុណភាពផលិតផល ដើម្បីបំពេញតាមច្បាប់សុវត្ថិភាពដ៏តឹងរឹងរបស់ប្រទេសចិន និងបង្កើនការប្រកួតប្រជែងពីគូប្រជែងក្នុងតំបន់ ។ នេះបើយោងតាមប្រភពពីសារព័ត៌មានសិង្ហបុរី The Straits Times ចេញផ្សាយ កាលពីថ្ងៃទី៦ ខែមករា ឆ្នាំ២០២៥។
លោក ភីរ៉ាផាន់ ខតុង (Piraphan Khorthong) អគ្គលេខាធិការ OAE បាននិយាយថា បណ្តាក្រុមហ៊ុននាំចេញទុរេនថៃ ប្រឈមមុខនឹងការប្រកួតប្រជែងកាន់តែខ្លាំងពីក្រុមហ៊ុនរបស់ប្រទេសវៀតណាម ម៉ាឡេស៊ី ហ្វីលីពីន និងកម្ពុជា រួមជាមួយតម្រូវការត្រួតពិនិត្យរបស់ប្រទេសចិនកាន់តែតឹងរ៉ឹង។ លោកថា ប្រទេសចិននឹងធ្វើតេស្តផ្លែទុរេនយ៉ាងម៉ត់ចត់ចំពោះសារធាតុហាមឃាត់ និងការបំពុល រួមទាំងសារធាតុ Basic Yellow 2 (BY2) ឬថ្នាំជ្រលក់ពណ៌លឿង និងកាដមីញ៉ូម (Cadmium)។
លោកបានបន្ថែមថា ក្រុមហ៊ុននាំចេញគួរតែទិញផ្លែទុរេនពីចម្ការដែលបំពេញតាមស្តង់ដារអនុវត្តកសិកម្មល្អ ខណៈដែលដំណើរការសម្អាត និងវេចខ្ចប់ត្រូវតែអនុវត្តតាមការអនុវត្តផលិតកម្មល្អ។ លោកបានគូសបញ្ជាក់ថា ទាំងចម្ការដាំដុះទុរេន និងទីតាំងវេចខ្ចប់នាំចេញ ត្រូវតែចុះបញ្ជីជាមួយក្រសួងកសិកម្ម ដើម្បីទទួលបានវិញ្ញាបនបត្រសម្រាប់ការនាំចេញទៅកាន់ប្រទេសចិន។
លើសពីនេះទៀត លោកក៏បានណែនាំក្រុមហ៊ុននាំចេញ ឱ្យពិចារណាប្រើប្រាស់ផ្លូវដែកល្បឿនលឿន «ឡាវ-ចិន» ជំនួសឱ្យការដឹកជញ្ជូនតាមផ្លូវគោក ដោយការដឹកជញ្ជូនតាមផ្លូវដែកអាចនាំផ្លែទុរេនទៅកាន់ទីក្រុងគុនមីង (Kunming) ខេត្តយូណាន (Yunnan) ភាគនិរតីប្រទេសចិន ក្នុងរយៈពេលត្រឹមតែ ២ ថ្ងៃប៉ុណ្ណោះ។
ទោះជាយ៉ាងណាក៏ដោយ លោកបានកត់សម្គាល់ថា ថ្លៃដឹកជញ្ជូនតាមផ្លូវដែកខ្ពស់ជាងការដឹកជញ្ជូនតាមផ្លូវគោកប្រហែល ១០% ទៅ ១៥ % ប៉ុន្តែការដឹកជញ្ជូនតាមផ្លូវដែកអនុញ្ញាតឱ្យមានការគ្រប់គ្រងសីតុណ្ហភាពកាន់តែប្រសើរឡើង ជួយរក្សាគុណភាពផ្លែទុរេនផងដែរ។ ទោះបីជាមានការប្រកួតប្រជែងខ្លាំងក្នុងតំបន់ក៏ដោយ ក៏លោក ភីរ៉ាផាន់ បាននិយាយថា ផលិតកម្មផ្លែទុរេនថៃ នៅឆ្នាំ ២០២៦ ត្រូវបានរំពឹងថានឹងកើនឡើង ១៥,៧១ % ធៀបនឹងឆ្នាំមុន ខណៈដែល OAE បានប៉ាន់ប្រមាណថាទិន្នផលទុរេនមានចំនួន ១,៧៨១ លានតោន។
សូមជម្រាបថា នៅឆ្នាំ ២០២៤ ប្រទេសថៃបាននាំចេញទុរេនសរុបចំនួន ៨៥៩ ១៥៧ តោន តម្លៃ ១៣៤,៨៥ ពាន់លានបាត ឬជាង ៤,៣ ពាន់លានដុល្លារអាមេរិក។ ការនាំចេញបានកើនឡើងដល់ ៩៨២ ០១៦ តោន នៅឆ្នាំ២០២៥ ប៉ុន្តែតម្លៃបានធ្លាក់ចុះមកត្រឹម ១២៥,៨៦៨ ពាន់លានបាត ឬ ៤,០២ ពាន់លានដុល្លារប៉ុណ្ណោះ៕
ចែករំលែកព័តមាននេះ