ខេត្តស្ទឹងត្រែង ៖ ខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានបង្ហាញលទ្ធផលក្នុងការអនុវត្តច្បាប់ជលផល ដោយបានបង្ក្រាបបទល្មើសនេសាទខុសច្បាប់ជាច្រើនករណី និងឃាត់ខ្លួនជនសង្ស័យ ៨នាក់…
ខេត្តស្ទឹងត្រែង ៖ ខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង បានបង្ហាញលទ្ធផលក្នុងការអនុវត្តច្បាប់ជលផល ដោយបានបង្ក្រាបបទល្មើសនេសាទខុសច្បាប់ជាច្រើនករណី និងឃាត់ខ្លួនជនសង្ស័យ ៨នាក់ បញ្ជូនទៅអយ្យការអមសាលាដំបូងខេត្ត ដើម្បីចាត់ការតាមនីតិវិធី នៅក្នុងរយៈពេលមួយឆ្នាំ គិតត្រឹមឆ្នាំ២០២៥ ។
យោងតាមរបាយការណ៍របស់លោក ស្រី សំវិចិត្រ នាយខណ្ឌរដ្ឋបាលជលផលស្ទឹងត្រែង កាលពីថ្ងៃទី៦ ខែមករា ឆ្នាំ២០២៦ បានឱ្យដឹងថា ក្នុងឆ្នាំ២០២៥ កន្លងទៅនេះ កម្លាំងជំនាញបានសហការជាមួយប្រជាសហគមន៍នេសាទ ឆ្នាំទន្លេ ប៉ុស្តិ៍នគរបាលរដ្ឋបាល និងមន្ត្រីពាក់ព័ន្ធ ចុះប្រតិបត្តិការទប់ស្កាត់ និងបង្ក្រាបបទល្មើសនេសាទជាច្រើនលើក។
ជនសង្ស័យចំនួន ៨នាក់ ត្រូវបានឃាត់ខ្លួន និងបញ្ជូនទៅតុលាការខេត្ត និងបានសម្រេចឃុំខ្លួនបណ្ដោះអាសន្ននៅពន្ធនាគារខេត្តស្ទឹងត្រែង។ ឧបករណ៍នេសាទខុសច្បាប់ និងហាមឃាត់ជាច្រើនប្រភេទត្រូវបានដកហូត រួមមាន ៖ មង ប្រវែងសរុប ៣៣,៤៩០ ម៉ែត្រ។ សន្ទូចរនង ចំនួន ១២,២៧៧ ផ្លែ (ដកហូតពីតំបន់អភិរក្សសត្វផ្សោត និងតំបន់ហាមឃាត់)។ ទូក ចំនួន ២៩ គ្រឿង និងម៉ាស៊ីន ចំនួន ២៩ គ្រឿង។ ឧបករណ៍ឆក់ អាគុយ ១៦ គ្រឿង, ក្បាលឆក់ ១៥ គ្រឿង, និងដងឆក់ ០១ គ្រឿង។ឧបករណ៍ផ្សេងៗ ដាយបិទអូរ ១០ មាត់, របាំងស្បៃមុង ២៤០ ម៉ែត្រ, លូស្បៃមុង ៨ មាត់, សាច់អួន២២៩ម៉ែត្រ, កាំភ្លើងកែច្នៃ ០១ ដើម ជាដើម។ ការអប់រំ និងណែនាំ ប្រជានេសាទចំនួន ៦៩ នាក់ ត្រូវបានធ្វើកិច្ចសន្យាបញ្ឈប់សកម្មភាពនេសាទខុសច្បាប់ ហើយប្រជាពលរដ្ឋសរុប ២៥៧ នាក់ ត្រូវបានផ្សព្វផ្សាយ-អប់រំ ណែនាំ អំពីច្បាប់ជលផល ។
ជាមួយគ្នានេះមន្ត្រីរដ្ឋបាលជលផលខេត្តរួមជាមួយឆ្មាំទន្លេ សហគមន៍នេសាទ បានលែងត្រីមេពូជ និងត្រីកំពុងរងគ្រោះថ្នាក់ ប្រមាណ ៥០ គីឡូក្រាម ចូលទៅក្នុងទន្លេវិញ។
សកម្មភាពចុះបង្ក្រាប និងដកហូតឧបករណ៍នេសាទល្មើសច្បាប់នេះ បានឆ្លុះបញ្ចាំងពីការប្តេជ្ញាចិត្តរបស់អាជ្ញាធរខេត្តស្ទឹងត្រែង ក្នុងការការពារធនធានជលផល និងជីវៈចម្រុះក្នុងដែនសមត្ថកិច្ចរបស់ខ្លួន ពិសេសនៅក្នុងតំបន់ការពារ និងតំបន់អភិរក្សសំខាន់ៗ ៕
ចែករំលែកព័តមាននេះ