ទីក្រុងហាណូយ ៖ យោងតាមការិយាល័យស្ថិតិទូទៅវៀតណាម បានឱ្យដឹងថា ប្រទេសនៅអាស៊ីអាគ្នេយ៍មួយនេះ បានស្វាគមន៍ភ្ញៀវទេសចរបរទេសសរុបចំនួន ២១,២ លាននាក់ក្នុងឆ្នាំ ២០២៥ ពោលកើនឡើង…
ទីក្រុងហាណូយ ៖ យោងតាមការិយាល័យស្ថិតិទូទៅវៀតណាម បានឱ្យដឹងថា ប្រទេសនៅអាស៊ីអាគ្នេយ៍មួយនេះ បានស្វាគមន៍ភ្ញៀវទេសចរបរទេសសរុបចំនួន ២១,២ លាននាក់ក្នុងឆ្នាំ ២០២៥ ពោលកើនឡើង ២០,៤% បើធៀបនឹងឆ្នាំមុន ហើយក៏ជាកំណត់ត្រាខ្ពស់បំផុតមិនធ្លាប់មានពីមុនមករបស់ខ្លួនផងដែរ។ នេះបើតាមប្រភពពីសារព័ត៌មានវៀតណាម VnExpress ចេញផ្សាយកាលពីថ្ងៃទី៥ ខែមករា ឆ្នាំ២០២៦។
ចិនដីគោក គឺជាប្រភពភ្ញៀវទេសចរបរទេសធំជាងគេរបស់ប្រទេសវៀតណាម កាលពីឆ្នាំមុន ដោយមានចំនួន ៥,២ លាននាក់ កើនឡើង ៤១% ធៀបនឹងឆ្នាំមុន បន្ទាប់មកគឺកូរ៉េខាងត្បូង ៤,៣ លាននាក់ និងតៃវ៉ាន់ ១,២៣ លាននាក់។ សហរដ្ឋអាមេរិកនៅចំណាត់ថ្នាក់លេខ ៤ ដោយមានចំនួន ៨៤៨ ០០០ នាក់ បន្ទាប់មកគឺជប៉ុន ៨១៤ ០០០ នាក់ឥណ្ឌា ៧៤៦ ០០០ នាក់ រុស្ស៊ី ៦៨៩ ០០០ នាក់ កម្ពុជា ៦៨៧ ០០០ នាក់ ម៉ាឡេស៊ី ៥៧៣ ០០០ នាក់) និងអូស្ត្រាលី ៥៤៨ ០០០ នាក់ ដែលស្ថិតក្នុងចំណាត់ថ្នាក់កំពូលទាំង ១០ (Top 10)។
បណ្តាអ្នកជំនាញក្នុងឧស្សាហកម្មទេសចរណ៍វៀតណាមបានសន្មតថា ការសម្រេចបានលទ្ធផលដ៏រឹងមាំរបស់វៀតណាម ដោយសារតែកំណែទម្រង់គោលនយោបាយទិដ្ឋាការ។ ជាក់ស្តែង កាលពីខែមីនា ឆ្នាំ២០២៥ រដ្ឋាភិបាលបានសម្រេចបន្តការលើកលែងទិដ្ឋាការរហូតដល់ឆ្នាំ ២០២៨ សម្រាប់ពលរដ្ឋប្រទេសចំនួន ១២ រួមមាន ដាណឺម៉ាក ហ្វាំងឡង់ បារាំង អាល្លឺម៉ង់ អ៊ីតាលី ជប៉ុន ន័រវែស រុស្ស៊ី កូរ៉េខាងត្បូង អេស្ប៉ាញ ស៊ុយអែត និងចក្រភពអង់គ្លេស។
កាលពីខែសីហា ឆ្នាំ២០២៥ រដ្ឋាភិបាលក៏បានលើកលែងតម្រូវការទិដ្ឋាការស្នាក់នៅរហូតដល់ ៤៥ ថ្ងៃ សម្រាប់ពលរដ្ឋប្រទេសចំនួន ១២ បន្ថែមទៀត គឺ បែលហ្ស៊ិក ប៊ុលហ្គារី ក្រូអាស៊ី (ក្រូអាត) សាធារណរដ្ឋឆែក ហុងគ្រី លុចសំបួ ហូឡង់ ប៉ូឡូញ រ៉ូម៉ានី ស្លូវ៉ាគី ស្លូវេនី និងស្វីស។ ទាំងនេះបានពង្រីកបញ្ជីលើកលែងទិដ្ឋាការឯកតោភាគីដល់ ២៤ ប្រទេស និងចំនួនសរុបរួមទាំងការលើកលែងទ្វេភាគីដល់ ៣៩ ប្រទេស។
កាលពីថ្មីៗនេះ រដ្ឋាភិបាលបានបន្ថែមច្រកព្រំដែនអន្តរជាតិចំនួន ៤១ បន្ថែមទៀត ដែលភ្ញៀវបរទេសអាចប្រើប្រាស់ទិដ្ឋាការអេឡិចត្រូនិក (e-Visa) សម្រាប់ការចូល និងចេញ ដែលនាំឱ្យចំនួនសរុបនៃច្រកបែបនេះ កើនឡើងដល់ ៨៣ ច្រក។
បន្ទាប់ពីបង្កើតកំណត់ត្រាចំនួនភ្ញៀវទេសចរបរទេសដ៏ច្រើនបំផុត កាលពីឆ្នាំមុនហើយនោះ នៅឆ្នាំ ២០២៦ នេះ ប្រទេសវៀតណាមបានកំណត់គោលដៅទទួលស្វាគមន៍ភ្ញៀវទេសចរបរទេសចំនួន ២៥ លាននាក់ ដើម្បីបំបែកកំណត់ត្រាចាស់៕
ចែករំលែកព័តមាននេះ