សហរដ្ឋអាមេរិក ៖ ភាគហ៊ុនក្នុងបណ្តាក្រុមហ៊ុនប្រេងអាមេរិកបានកើនឡើង ខណៈដែលវិនិយោគិនជឿថា ការចាប់ខ្លួនប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolás Maduro)…
សហរដ្ឋអាមេរិក ៖ ភាគហ៊ុនក្នុងបណ្តាក្រុមហ៊ុនប្រេងអាមេរិកបានកើនឡើង ខណៈដែលវិនិយោគិនជឿថា ការចាប់ខ្លួនប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolás Maduro) ដោយសហរដ្ឋអាមេរិក នឹងបើកឱកាសដើម្បីបូមយកប្រេងបម្រុងដ៏មហាសាលរបស់ប្រទេសនៅអាមេរិកខាងត្បួងមួយនេះ។
យោងតាមប្រភពពី BBC បានរាយការណ៍ថា ភាគហ៊ុនក្រុមហ៊ុន Chevron បានបើកការជួញដូរខ្ពស់ជាង ៤% បន្ទាប់ពីបានកើនឡើងដល់ជាង ៧% ក្នុងការជួញដូរមុន ខណៈដែលក្រុមហ៊ុនផ្សេងទៀត រួមទាំង ConocoPhillips និង Exxon ក៏ឃើញការកើនឡើងគួរឱ្យកត់សម្គាល់ផងដែរ។ ចំណែកតម្លៃមាសអន្តរជាតិ ព្រមទាំងភាគហ៊ុននៅក្នុងក្រុមហ៊ុនផលិតអាវុធអាមេរិកក៏បានកើនឡើងផងដែរ។
សញ្ញានេះ បានបង្កើនការព្រួយបារម្ភរបស់បណ្តាវិនិយោគិនអំពីហានិភ័យភូមិសាស្ត្រនយោបាយ។
គិតត្រឹមម៉ោង ១០ ព្រឹកថ្ងៃទី៦ ខែមករា (ម៉ោងនៅកម្ពុជា) តម្លៃមាសអន្តរជាតិ បានកើនឡើងប្រហែល ២,៨% នៅក្នុងតម្លៃ ៤ ៤៥៥ ដុល្លារក្នុង១អោន ឬ ៥ ៣៦៧ ដុល្លារក្នុង១តម្លឹង។ តម្លៃមាសត្រូវបានចាត់ទុកជាទ្រព្យសកម្មដ៏មានសុវត្ថិភាព ជារឿយៗកើនឡើងក្នុងគ្រានៃភាពមិនប្រាកដប្រជាភូមិសាស្ត្រនយោបាយ។ តម្លៃមាសបានឃើញការកើនឡើងប្រចាំឆ្នាំដ៏ល្អបំផុតរបស់ខ្លួន កាលពីឆ្នាំមុន ចាប់តាំងពីឆ្នាំ ១៩៧៩ ដោយបានកើនឡើងជាង ៦០% និងឈានដល់តម្លៃខ្ពស់បំផុតគ្រប់ពេល ៤ ៥៤៩ ដុល្លារ/អោន ឬ ៥ ៤៨០ ដុល្លារ/តម្លឹង កាលពីថ្ងៃទី២៦ ខែធ្នូ ឆ្នាំ២០២៥។
ការកើនឡើងទាំងនោះត្រូវបានជំរុញដោយកត្តាជាច្រើនរួមទាំង ការរំពឹងទុកនៃការកាត់បន្ថយអត្រាការប្រាក់បន្ថែមទៀត ដោយធានាគារកណ្តាលអាមេរិក (Fed) ការសម្រុកទិញមាសស្តុកទុកដោយបណ្តាធនាគារកណ្តាលលើពិភពលោក និងការព្រួយបារម្ភរបស់បណ្តាវិនិយោគិនអំពីភាពតានតឹងសកល និងភាពមិនប្រាកដប្រជាផ្នែកសេដ្ឋកិច្ច។
ដោយឡែក បើតាមប្រភពពីទីភ្នាក់ងារសារព័ត៌មាន Reuters បានរាយការណ៍ថា តម្លៃប្រេងឆៅអន្តរជាតិបានធ្លាក់ចុះ នៅថ្ងៃទី៦ ខែមករា ឆ្នាំ២០២៦ ខណៈដែលពាណិជ្ជករបានថ្លឹងថ្លែងពីការរំពឹងទុកនៃផលិតកម្មប្រេងឆៅរបស់វេណេស៊ុយអេឡាខ្ពស់ជាងមុន បន្ទាប់ពីការចាប់ខ្លួនលោក នីកូឡាស ម៉ាឌូរ៉ូ ដែលបន្ថែមទៅលើការរំពឹងទុកនៃការផ្គត់ផ្គង់សកលដ៏ច្រើននៅឆ្នាំនេះ ចំពេលមានកម្សោយតម្រូវការ។
គិតត្រឹមម៉ោង ១០ ព្រឹកថ្ងៃទី៦ ខែមករា (ម៉ោងនៅកម្ពុជា) កិច្ចសន្យាប្រេងឆៅនាពេលអនាគតរបស់ Brent បានធ្លាក់ចុះ ០.៤% នៅត្រឹម ៦១,៤៨ ដុល្លារក្នុង១បារ៉ែល ខណៈដែលប្រេងឆៅអាមេរិក West Texas Intermediate (WTI) តម្លៃ ៥៨ ដុល្លារ/បារ៉ែល ពោលធ្លាក់ចុះ ០.៥%។
ប្រធានាធិបតីអាមេរិក លោក ដូណាល់ ត្រាំ (Donald Trump ) បានសន្យារួចហើយថានឹងទាញយកផលប្រយោជន៍ពីប្រេងបម្រុងដ៏ច្រើនមហាសាលរបស់វ៉េណេស៊ុយអេឡា (បច្ចុប្បន្នជាប្រទេសមានប្រេងបម្រុងច្រើនជាងគេលើពិភពលោក) បន្ទាប់ពីការចាប់ខ្លួនលោក ម៉ាឌូរ៉ូ ហើយលោកក៏បានថ្លែងផងដែរថា សហរដ្ឋអាមេរិកនឹងគ្រប់គ្រងប្រទេសវ៉េណេស៊ុយអេឡា រហូតដល់មានការផ្លាស់ប្តូរប្រកបដោយសុវត្ថិភាព ត្រឹមត្រូវ និងយុត្តិធម៌ ហើយបណ្តាក្រុមហ៊ុនអាមេរិក នឹងចំណាយប្រាក់រាប់ពាន់លានដុល្លារ ដើម្បីវិនិយោគ និងជួសជុលហេដ្ឋារចនាសម្ព័ន្ធប្រេងរបស់វេណេស៊ុយអេឡា ដែលបាត់បង់សមត្ថភាព ចាប់តាំងពីដើមទសវត្សរ៍ឆ្នាំ ២០០០៕ ប្រភព ៖ BBC និង Reuters
ចែករំលែកព័តមាននេះ