ទីក្រុងតូក្យូ ៖ គណៈប្រតិភូពាណិជ្ជករជប៉ុនចំនួន ២០០ នាក់ បានពន្យារពេលដំណើរទស្សនកិច្ចអាជីវកម្មប្រចាំឆ្នាំទៅកាន់ប្រទេសចិនជាលើកដំបូង នៅក្នុងរយៈពេលជាង១០ឆ្នាំកន្លងមកនេះ ដោយសារភាពតានតឹងកំពុងបន្តកើតមានរវាងប្រទេសទាំងពីរ។ កាសែត South…
ទីក្រុងតូក្យូ ៖ គណៈប្រតិភូពាណិជ្ជករជប៉ុនចំនួន ២០០ នាក់ បានពន្យារពេលដំណើរទស្សនកិច្ចអាជីវកម្មប្រចាំឆ្នាំទៅកាន់ប្រទេសចិនជាលើកដំបូង នៅក្នុងរយៈពេលជាង១០ឆ្នាំកន្លងមកនេះ ដោយសារភាពតានតឹងកំពុងបន្តកើតមានរវាងប្រទេសទាំងពីរ។
កាសែត South China Morning Post បានរាយការណ៍ថា សមាគមសេដ្ឋកិច្ចជប៉ុន-ចិន (JCEA) បានប្រកាសនៅថ្ងៃទី១ ខែមករា ឆ្នាំ២០២៦ ថា ខ្លួនកំពុងពន្យារពេលដំណើរទស្សនកិច្ចអាជីវកម្មរយៈពេល ៤ ថ្ងៃទៅកាន់ទីក្រុងប៉េកាំង ដោយគណៈប្រតិភូនៃថ្នាក់ដឹកនាំពាណិជ្ជករជប៉ុន ដែលគ្រោងនឹងចេញដំណើរនៅថ្ងៃទី២០ ខែមករា ដោយសារតែការលំបាកក្នុងការរៀបចំកិច្ចប្រជុំជាមួយថ្នាក់ដឹកនាំចិន និងលទ្ធភាពទាបនៃការសម្រេចបានលទ្ធផលវិជ្ជមាន។ JCEA បានពន្យល់ទាក់ទងនឹងការពន្យារពេលនេះថា «ទោះបីជាយើងបានខិតខំធ្វើឱ្យដំណើរទស្សនកិច្ចកើតឡើង ក្រោមកាលៈទេសៈបច្ចុប្បន្នក៏ដោយ ក៏យើងនៅតែប្រឈមមុខនឹងការលំបាកក្នុងការរៀបចំកិច្ចប្រជុំជាមួយមន្ត្រីចិន ពិសេសកិច្ចប្រជុំកម្រិតខ្ពស់»។
យោងតាមរបាយការណ៍ គណៈប្រតិភូត្រូវបានគេរំពឹងថានឹងរួមបញ្ចូលនាយកប្រតិបត្តិមកពីក្រុមហ៊ុន Mitsubishi និង Panasonic រួមជាមួយតំណាងមកពីក្រុមអ្នកតស៊ូមតិអាជីវកម្មធំៗចំនួន ៣ រួមមាន សហព័ន្ធពាណិជ្ជកម្មជប៉ុន, សមាគមសេដ្ឋកិច្ចជប៉ុន-ចិន និងសភាពាណិជ្ជកម្ម និងឧស្សាហកម្មជប៉ុន។ បើតាមសេចក្តីព្រាងកាលវិភាគបង្ហាញថា គណៈប្រតិភូជប៉ុនចង់ជួបជាមួយប្រធានាធិបតីចិន លោក ស៊ី ជីនពីង (Xi Jinping) និងនាយករដ្ឋមន្ត្រី លី ឈាំង (Li Qiang)។
ដំណើរទស្សនកិច្ចទៅទីក្រុងប៉េកាំង គឺជាដំណើរទស្សនកិច្ចប្រចាំឆ្នាំរបស់គណៈប្រតិភូពាណិជ្ជករជប៉ុនមានតាំងពីឆ្នាំ ១៩៧៥ ដែលត្រូវបានរំខានដោយជំងឺរាតត្បាតកូវីដ-១៩ និងនៅឆ្នាំ ២០១២ នៅពេលដែលទំនាក់ទំនងទ្វេភាគីកាន់តែយ៉ាប់យ៉ឺន បន្ទាប់ពីជម្លោះលើកោះសេនកាគុ (Senkaku) ជាភាសាជប៉ុន ឬ កោះតាវយូ (Diaoyu) ជាភាសាចិននៅសមុទ្រចិនខាងកើត។
យ៉ាងណាមិញ នៅឆ្នាំ ២០២៦ ដំណើរទស្សនកិច្ចដ៏សំខាន់មួយនេះ ត្រូវបានពន្យារពេល ដោយសារការឡើងកម្តៅការទូតរវាងចិន និងជប៉ុន ដែលកើតចេញពីការលើកឡើងរបស់នាយកមន្ត្រីជប៉ុន លោកស្រី សាណាអេ តាកាអ៊ីឈី (Sanae Takaichi) ជុំវិញបញ្ហាកោះតៃវ៉ាន់។ កាលពីខែវិច្ឆិកា ឆ្នាំ២០២៥ លោកស្រីបានថ្លែងថា ករណីមានការវាយប្រហារលើកោះតៃវ៉ាន់ ប្រទេសជប៉ុនអាចពិចារណាដាក់ពង្រាយកងកម្លាំងការពារ ប្រសិនបើជម្លោះបែបនេះ គំរាមកំហែងដល់សន្តិសុខជាតិរបស់ខ្លួន។ ការលើកឡើងនេះធ្វើឱ្យចិនក្តៅសន្លឹកត្រចៀកយ៉ាងខ្លាំង។
សូមជម្រាបថា ប្រទេសចិន គឺជាដៃគូពាណិជ្ជកម្មធំបំផុតមួយរបស់ប្រទេសជប៉ុន ដែលមានចំនួនប្រហែល ២០% នៃទំហំពាណិជ្ជកម្មសរុបរបស់ជប៉ុនក្នុងឆ្នាំ២០២៤៕ ដកស្រង់ ៖ South China Morning Post និង Znews
ចែករំលែកព័តមាននេះ