ព្រះសង្ឃ អាជ្ញាធរ និងប្រជាពលរដ្ឋ នៅស្រុកសាមគ្គីមានជ័យ ធ្វើពិធីបួងសួង សុំសេចក្តីសុខសន្តិភាព
- កំពង់ឆ្នាំង
ខេត្តកំពង់ឆ្នាំង ៖ ក្រោមការដឹកនាំកម្មវិធី ដោយព្រះវិសាលសីលគុណ ឩម អៀន ព្រះគ្រូអនុគណ លោក ឈួន ចាន់ណា…
ខេត្តកំពង់ឆ្នាំង ៖ ក្រោមការដឹកនាំកម្មវិធី ដោយព្រះវិសាលសីលគុណ ឩម អៀន ព្រះគ្រូអនុគណ លោក ឈួន ចាន់ណា អភិបាលនៃគណៈអភិបាលស្រុកសាមគ្គីមានជ័យ និងព្រះគ្រូសិរីវឌ្ឍនៈសៀង សំណាង ព្រះគ្រូចៅអធិការវត្តក្បាលកោះ ហៅវត្តបឹង នៅយប់ថ្ងៃទី២៨ ខែធ្នូ ឆ្នាំ២០២៥ ក្នុងបរិវេណវត្តក្បាលកោះ ហៅវត្តបឹង ស្ថិតក្នុងឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មន្ត្រីរាជការ ព្រះសង្ឈ និងប្រជាពលរដ្ឋ លោកគ្រូ អ្នកគ្រូ សិស្សានុសិស្ស ជាច្រើនអង្គ/នាក់ នៅក្នុងស្រុកសាមគ្គីមានជ័យ នៃខេត្តកំពង់ឆ្នាំង បានរៀបចំធ្វើពិធីបួងសួង សុំសេចក្តីសុខសន្តិភាព និងផ្សាយមេត្តាធម៌ សមាធិចិត្ត បង្សុកូលជូនវីរៈកងទ័ព វីរៈនគរបាលដែលបានពលីក្នុងសមរភូមិ ដើម្បីការពារជាតិ ។
ព្រះគ្រូសិរីវឌ្ឍនៈសៀង សំណាង ព្រះគ្រូចៅអធិការវត្តក្បាលកោះ ហៅវត្តបឹង មានសង្ឈដីកាថា ពិធីបួងសួងសុំសុខសន្តិភាពនេះ គឺជានិមិត្តរូបនៃការគោរពបូជាទៅតាមប្រពៃណី និងទំនៀមទម្លាប់ខ្មែរ ដើម្បីឧទ្ទិសដល់វីរភាពរបស់បុព្វបុរស ដែលបានការពារជាតិមាតុភូមិឱ្យបានសន្តិភាព ពីការឈ្លានពាន។ ជាពិសេស ផ្សាយមេត្តាធម៌ សមាធិចិត្ត បង្សុកូលជូនវីរៈកងទ័ព វីរៈនគរបាល ដែលបានពលីក្នុងសមរភូមិ ដើម្បីការពារជាតិ ពីការឈ្លានពានរបស់បច្ចាមិត្ត សារៈសំខាន់នៃពិធីនេះ មិនត្រឹមតែជាការគោរពបូជាបុព្វបុរសប៉ុណ្ណោះទេ ថែមទាំងជាការផ្សារភ្ជាប់ស្មារតីស្នេហាជាតិ ឱ្យប្រជាពលរដ្ឋចងចាំពីវីរភាពរបស់វីរបុរសជាតិ និងរួមគ្នាការពារបូរណភាពទឹកដី។
លោកឈួន ចាន់ណា អភិបាលស្រុកសាមគ្គីមានជ័យ មានប្រសាសន៍ថា ទោះក្នុងកាលៈទេសៈណាក៏ដោយសូមឲ្យប្រជាពលរដ្ឋយើងត្រូវជឿជាក់លើរាជរដ្ឋាភិបាល ដែលមានសម្ដេចតេជោ និងសម្ដេចមហាបវរធិបតី ដើម្បីដឹកនាំនាវាកម្ពុជាយើងឱ្យមានសុខសន្តិភាព ដែលលោកតែងតែ នៅរួមសុខរួមទុក្ខជាមួយបងប្អូនប្រជាពលរដ្ឋជានិច្ច មិនដែលបោះបង់ចោលជាតិមាតុភូមិ និងប្រជាពរដ្ឋគ្រប់មួយជំហានណាឡើយទោះស្ថិតក្នុងកាលៈទេសៈណាក៏ដោយ។
លោកអភិបាលស្រុកបានបន្ថែមទៀតថា ក្រោមការយកចិត្តទុកដាក់របស់ឯកឧត្តម ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង អាជ្ញាធរស្រុកសាមគ្គីមានជ័យបានត្រៀមរួចជាស្រេច សម្រាប់ទីតាំងផ្ដល់ជូនជនភៀសសឹកស្នាក់នៅទីអារាមចំនួន៣ ដែលមានបន្ទប់ទឹកគ្រប់គ្រាន់ ទីធ្លាធំទូលាយ មានម្លប់ឈើត្រជាក់ ផ្ដល់ភាពងាយស្រួលក្នុងការរស់នៅ។
ក្នុងនោះអាជ្ញាធរ ក៏ដូចជាថ្នាក់ដឹកនាំក្នុងខេត្តកំពង់ឆ្នាំង តែងតែយកចិត្តទុកដាក់ខ្ពស់បំផុត ចំពោះបងប្អូនជនភៀសសឹក និងគ្រួសារកងទ័ពសមរភូមិមុខ បើមានបញ្ហាពាក់ព័ន្ធនឹងឯកសារ ផ្លាស់ប្ដូរទីលំនៅ ការស្នាក់នៅឬមានផលលំបាកអ្វីផ្សេងៗ សូមធ្វើការទំនាក់ទំនងជាមួយអាជ្ញាធរភូមិ/ឃុំ ដើម្បីជួយដោះស្រាយទាន់ពេលវេលា។ និងសូមថ្លែងអំណរគុណដល់ ក្រុមគ្រួសារកងទ័ព ដែលបានលះបង់ប្ដី លះបង់ឪពុក កូន និងក្មួយទៅធ្វើទាហាន ទប់ទល់ការឈ្លានពាននៅសមរភូមិមុខ ដែលនេះជាការលះបង់យ៉ាងធំធេងបំផុតមិនអាចបំភ្លេចបាន។
ជាពិសេសក៏សួរអំពាវនាវទៅដល់ក្រុមគ្រួសារវីរជនកងទ័ព វីរជនកងកម្លាំងនគរបាល ដែលនៅមូលដ្ឋានសុខសាមគ្គីមានជ័យ ជួបទុក្ខលំបាកសូមទំនាក់ទំនងតាមរយៈភូមិឃុំនិងស្រុក យើងនឹងធ្វើការដោះស្រាយរាល់ការងារលំបាកឲ្យបានទាន់ពេលវេលា។
ជាមួយគ្នានេះ លោក ឈួន ចាន់ណា ក្នុងនាមអាជ្ញាធរសូមអំពាវនាវបន្ថែម ជូនដល់ប្រជាពលរដ្ឋគ្រប់ស្រទាប់វណ្ណៈ បន្តចូលរួមឩបត្ថម្ភជាសម្ភារៈ ថវិកា ដើម្បីគាំទ្រ វីរភាពអង់អាចក្លាហាន វីរៈកងទ័ព វីរៈនគរបាល និងជនភៀសសឹក ជាបន្តទៀតអោយកាន់តែផុលផុស គឺជាការបង្ហាញនូវ សកម្មភាព សាមគ្គីភាពជាតិខ្មែរ មានភាពរឹងមាំ ជាធ្លុងមួយ មានស្មារតីជាតិនិយម ដើម្បីបង្ហាញទៅអន្តរជាតិថា ប្រជាជនកម្ពុជា ត្រូវការសន្តិភាពយ៉ាងពិតប្រកដ និង យូរអង្វែងជានិរន្តនិ៍៕
ចែករំលែកព័តមាននេះ