រដ្ឋមន្ត្រីក្រសួងទេសចរណ៍និងអភិបាលខេត្ត ទទួលភ្ញៀវទេសចរនាវា DIAMOND PRINCESS
- ព្រះសីហនុ
ខេត្តព្រះសីហនុ ៖ នាព្រឹកថ្ងៃទី២៩ ខែធ្នូ ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម…
ខេត្តព្រះសីហនុ ៖ នាព្រឹកថ្ងៃទី២៩ ខែធ្នូ ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តម ម៉ាង ស៊ីណេត អភិបាលខេត្ត បានអញ្ជើញទទួលស្វាគមន៍ភ្ញៀវទេសចរបរទេស ដែលអញ្ជើញមកតាមនាវា DIAMOND PRINCESS ដែលបាននាំភ្ញៀវទេសចរបរទេសចម្រុះជាតិសាសន៍ជិត ៣ ០០០នាក់ ចូលចតធ្វើទស្សនកិច្ចនៅព្រះរាជាណាចក្រកម្ពុជា តាមច្រកកំពង់ផែសមុទ្រទឹកជ្រៅខេត្តព្រះសីហនុ ។
តាមមន្ត្រីនគរបាលអន្តោប្រវេសន៍ច្រកទ្វារកំពង់ផែស្វយ័តក្រុងព្រះសីហនុ បានឱ្យដឹងថា នាវា
ទេសចរណ៍ DIAMOND PRINCESS សញ្ជាតិ BERMUDA បានចូលសំចតនៅកំពង់ផែស្វយ័តក្រុងព្រះសីហនុ នៅព្រឹកថ្ងៃទី២៩ ខែធ្នូ ឆ្នាំ២០២៥ វេលាម៉ោង៧ព្រឹក ដែលមានភ្ញៀវទេសចរបរទេសចម្រុះជាតិសាសន៍ចំនួន ២ ៨៥០នាក់(ស្រី ១ ៥៦៦នាក់) ស្មើនឹង ៥២សញ្ជាតិ និងមាននាវិកសរុបចំនួន ១ ០៥៩នាក់(ស្រី ២៤៥នាក់) ស្មើនឹង ៥៩សញ្ជាតិ ។
នាវា DIAMOND PRINCESS មានបណ្តោយ ២៨៨,៣៣ម៉ែត្រ ទទឹង ៣៧,៥០ម៉ែត្រ ជម្រៅទឹក ៨,៥ម៉ែត្រ បាននាំភ្ញៀវទេសចរមកពីប្រទេសវៀតណាម ចូលចតនៅកំពង់ផែស្វយ័តក្រុងព្រះសីហនុ វេលាម៉ោង៧ព្រឹកថ្ងៃទី២៩ ខែធ្នូ ឆ្នាំ២០២៥ ។ នាវានេះមានគម្រោងចាកចេញពីដែនទឹកនៃរះរាជាណាចក្រកម្ពុជានៅវេលាម៉ោង៤រសៀលថ្ងៃដដែល ឆ្ពោះទៅកាន់ប្រទេសថៃ ។ ភ្ញៀវទេសចរដែលមានសញ្ជាតិច្រើនជាងគេមានដូចជា អូស្ត្រាលី ៨២៤នាក់សហរដ្ឋអាមេរិក ៧៩៧នាក់ ក្រៅពីនោះមានសញ្ជាតិផ្សេងទៀត ក្នុងនោះភ្ញៀវមកពីខេត្តសៀមរាប ចេញតាមនាវាមានចំនួន ៤នាក់ (ស្រី ២នាក់) ស្មើ ២សញ្ជាតិ ។
ឯកឧត្តមរដ្ឋមន្ត្រី ហួត ហាក់ មានប្រសាសន៍ថា ការចូលចតរបស់នាវា DIAMOND PRINCESS ស្របពេលដែលប្រទេសកម្ពុជា និងរាជរដ្ឋាភិបាលកំពុងរៀបចំប្រារព្ធទិវាសន្តិភាពដែលជាខួបលើកទី២៧ឆ្នាំ ដែលសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីកម្ពុជា និងបច្ចុប្បន្នជាប្រធានព្រឹទ្ធសភា កាលពី២៨ឆ្នាំមុន សម្តេចតេជោបានដាក់ចេញនូវគោលនយោបាយឈ្នះ ឈ្នះ ។
ប្រតិបត្តិករទាំងអស់ ដែលដឹកនាំដោយសម្តេចតេជោ បានរួមគ្នាអនុវត្តគោលនយោបាយទទួលបានជោគជ័យ ធ្វើឱ្យរទេសកម្ពុជាមានសុខសន្តិភាព ស្ថិរភាពនយោបាយពេញផ្ទៃប្រទេស ។ យើងមានឱកាសអភិវឌ្ឍព្រះរាជាណាចក្រកម្ពុជាលើគ្រប់វិស័យ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ហើយក្នុងរយៈពេលពីរឆ្នាំកន្លងមកនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បន្តវេនដឹកនាំរាជរដ្ឋាភិបាលកម្ពុជា ដើម្បីរក្សាសន្តិភាព ស្ថិរភាពនយោបាយ និងការអភិវឌ្ឍប្រទេសជាតិលើគ្រប់វិស័យ ឆ្ពោះទៅកាន់ចក្ខុវិស័យកម្ពុជាឆ្នាំ២០៥០ ជាប្រទេសដែលមានចំណូលកម្រិតខ្ពស់ ។
ការចូលចតរបស់នាវា DIAMOND PRINCESS ថ្ងៃនេះ មិនមែនជារឿងចៃដន្យនោះទេ គឺជាដំណើរមួយ ដែលជាសារនិងរូបភាពបង្ហាញឱ្យពិភពលោកឃើញថា ប្រទេសកម្ពុជាមានសុខសន្តិភាព ស្ថិរភាពនយោបាយ ។ ប្រទេសកម្ពុជាមានការរីកចម្រើនលើគ្រប់វិស័យ ជាពិសេសប្រទេសកម្ពុជាក្រោមការដឹកនាំរបស់រាជរដ្ឋាភិបាល និងក្រោមព្រះបូជនីយកិច្ចរបស់ព្រះមហាក្សត្រខ្មែរ ធ្វើឱ្យកម្ពុជាមានលទ្ធភាពផ្តល់ឱកាស ផ្តល់សុវត្ថិភាពដល់វិនិយោគិនក្នុងស្រុក និងវិនិយោគិនបរទេស គ្រប់ពេលវេលា និងគ្រប់ទីកន្លែង ។
ឯកឧត្តមរដ្ឋមន្ត្រីបានបន្តថា ការចូលចតនៃនាវា DIAMOND PRINCESS នាពេលនេះ ដែលមានភ្ញៀវទេសចរចម្រុះជាតិសាសន៍ជាង៥០សញ្ជាតិ និងមានភ្ញៀវជិត ៣ ០០០នាក់ សបញ្ជាក់ថា ប្រទេសកម្ពុជាមានសន្តិភាព និងស្ថិរភាពនយោបាយ ។ ជាពិសេសសក្តានុពលទេសចរណ៍របស់ខេត្តព្រះសីហនុ ក៏ដូចសក្តានុពលទេសចរណ៍របស់ប្រទេសកម្ពុជា ធ្វើឱ្យភ្ញៀវទេសចរបរទេសមកកាន់កម្ពុជា ជួយដល់សេដ្ឋកិច្ចប្រទេសជាតិ សេដ្ឋកិច្ចរបស់ខេត្តព្រះសីហនុ និងសេដ្ឋកិច្ចគ្រួសារ ព្រោះនេះជាផលប្រយោជន៍សេដ្ឋកិច្ចជាច្រើនសម្រាប់កម្ពុជា ។
ក្នុងឱកាសនោះ ឯកឧត្តម ម៉ាង ស៊ីណេតអភិបាលខេត្ត បានថ្លែងថា ខេត្តព្រះសីហនុ ក៏ជាខេត្តដែលមានសក្តានុពលខាងវិស័យទេសចរណ៍ ហើយមិនត្រឹមតែវិស័យទេសចរណ៍មួយមុខប៉ុណ្ណោះទេ ។ ខេត្តព្រះសីហនុ ជាខេត្តឧស្សាហកម្ម ពាណិជ្ជកម្ម ទេសចរណ៍ និងការដឹកជញ្ជូន ។ ជាពិសេស កំពង់ផែស្វយ័តទឹកជ្រៅក្រុងព្រះសីហនុ ដែលរាជរដ្ឋាភិបាលកំពុងធ្វើការអភិវឌ្ឍកំពង់ផែទឹកជ្រៅជា៣ដំណាក់កាល ចាប់ពីឆ្នាំ២០២៤ដល់ឆ្នាំ២០៣០ ឱ្យមានជម្រៅទឹករហូតដល់១៧,៥០ម៉ែត្រ អាចឱ្យនាវានៅលើពិភពលោកចូលចតនៅទីនេះបាន ។
និយាយជារួម ខេត្តព្រះសីហនុ ជាតំបន់ប៉ូលសេដ្ឋកិច្ចរបស់កម្ពុជា ដែលរាជរដ្ឋាភិបាលកម្ពុជាបច្ចុប្បន្នកំពុងរៀបចំផែនការមេ អភិវឌ្ឍខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង ។ ការមកដល់របស់ភ្ញៀវទេសចរថ្ងៃនេះ បញ្ជាក់ឱ្យឃើញថា ខេត្តព្រះសីហនុ ក៏ដូចព្រះរាជាណាចក្រកម្ពុជាទាំងមូល គឺមានសុខសន្តិភាព ស្ថិរភាពនយោបាយល្អ និងមានការអភិវឌ្ឍលើគ្រប់វិស័យ ៕
ចែករំលែកព័តមាននេះ