ខេត្តពោធិ៍សាត់ ៖ ព្រឹកថ្ងៃទី២៥ ខែធ្នូ ឆ្នាំ២០២៥ គណៈកម្មការទី៩ នៃរដ្ឋសភា ដឹកនាំដោយលោកជំទាវ និន សាផុន…
ខេត្តពោធិ៍សាត់ ៖ ព្រឹកថ្ងៃទី២៥ ខែធ្នូ ឆ្នាំ២០២៥ គណៈកម្មការទី៩ នៃរដ្ឋសភា ដឹកនាំដោយលោកជំទាវ និន សាផុន ប្រធានគណៈកម្មការ បាននាំយកអំណោយជាគ្រឿងឧបភោគ បរិភោគ និងថវិកា មកប្រគល់ជូនរដ្ឋបាលខេត្តពោធិ៍សាត់ ដើម្បីជួយផ្គត់ផ្គង់ដល់ប្រជាជនភៀសសឹក ដែលរត់គេចពីសង្គ្រាម និងវីរកងទ័ពជួរមុខ ដែលកំពុងប្រយុទ្ធតទាំងជាមួយចោរសៀមឈ្លានពានទឹកដី។
លោកជំទាវ និន សាផុន បានពាំនាំ នូវការផ្ដាំផ្ញើរសួរសុខទុក្ខ ពីសំណាក់សម្ដេចមហារដ្ឋសភាធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា និងគោរពអរគុណ ដឹងគុណ ចំពោះបងប្អូនវីរកងទ័ពជួរមុខ ដែលកំពុងជាប់ដៃប្រយុទ្ធ តតាំងជាមួយចោរសៀមឈ្លានពានទឹកដី បង្កឲ្យបាត់បង់អាយុជីវិតកងទ័ព និងប្រជាជនស្លូតត្រង់ ព្រមទាំងបំផ្លាញសម្បត្តិបិតិកភ័ណ្ឌពិភពលោក ដែលជាប្រាសាទដូនតាខ្មែរ និងហេដ្ឋារចនាសម្ព័ន្ធជាច្រើនទៀត ដូចជាសាលារៀន វត្តអារាម មន្ទីរពេទ្យ អគារពាណិជ្ជកម្ម ផ្លូវថ្នល់ ស្ពាន និងផ្ទះសម្បែងប្រជាពលរដ្ឋជាច្រើនទៀត ។
គណៈកម្មការទី៩ នៃរដ្ឋសភា ដែលជាសមរភូមិក្រោយ ក្នុងនាមឈាមជ័រជាខ្មែរ ខ្មែរជួយខ្មែរ ខ្មែរស្រលាញ់សន្តិភាព ស្អប់ណាស់សង្គ្រាម បាននាំយកអំណោយមួយចំនួន ក្នុងនោះសម្រាប់វីរកងទ័ព រួមមាន ៖ អង្ករ០៥តោន ត្រីខ ៥០០យួរ មីជាតិ៥០០កែស អំបុក៥០០ដប ទឹកបរិសុទ្ធ៥០០កែស ឆៃពៅ៥០០គក្រ និងថវិកា៦០លានរៀល ។
សម្រាប់ប្រជាជនភៀសសឹកចំនួន៩០០គ្រួសារ ក្នុងមួយគ្រួសារទទួលបាន អង្ករ១០គក្រ ទឹកបរិសុទ្ធ០១កែស ថវិកា៥០.០០០រៀល និងឃីតមួយស្បោង ដែលក្នុងនោះមានគ្រឿងឧបភោគបរិភោគ និងសម្ភារៈប្រើប្រាស់ជាច្រើមមុខទៀត។
លោក ខូយ រីដា អភិបាល នៃគណៈអភិបាលខេត្តពោធិ៍សាត់ បានថ្លែងអំណរគុណយ៉ាងជ្រាលជ្រៅចំពោះប្រតិភូគណៈកម្មការទី៩ នៃរដ្ឋសភា និងមូលនិធិសប្បុរសធម៌ប៊ែលធី ដែលបាននាំយកនូវគ្រឿងឧបភោគបរិភោគ សម្ភារៈប្រើប្រាស់ និងថវិកា មកប្រគល់ជូនរដ្ឋបាលខេត្ត សម្រាប់ចូលរួមជួយឧបត្ថម្ភដល់ប្រជាជនភៀសសឹក និងវីរកងទ័ពជួរមុខរបស់យើង ដែលមានស្មារតីអង់អាចក្លាហាន មុះមុត ខិតខំតស៊ូការពារបូរណភាពទឹកដី ប្រឆាំងនឹងសត្រូវឈ្លានពានថៃ ដែលនេះសបញ្ជាក់ឱ្យឃើញថា បងប្អូនខ្មែរគ្រប់ស្រទាប់វណ្ណៈ បានសាមគ្គីគ្នាជាធ្លុងមួយ ក្លាយជាខឿនការពារជាតិ គឺសមរភូមិក្រោយជួយសមរភូមិមុខ និងបងប្អូនប្រជាពលរដ្ឋ ដែលត្រូវបានជម្លៀសខ្លួនមកកាន់មណ្ឌលសុវត្ថិភាពនានា ។
លោកអភិបាលខេត្តបានសន្យាថា សម្ភារៈ និងថវិកាទាំងអស់នេះ រដ្ឋបាលខេត្តពោធិ៍សាត់ នឹងរៀបចំចាត់ចែងជូនដល់ប្រជាជនភៀសសឹក និងវីរកងទ័ពជួរមុខឲ្យបានត្រឹមត្រូវបំផុត មិនឲ្យសប្បុរសជនមានការថ្នាំងថ្នាក់នោះឡើយ ។
លោកសូមបួងសួងដល់គុណព្រះរតនត្រ័យកែវទាំងបី សូមព្រះអង្គជួយប្រោះព្រំ ប្រសិទ្ធពរជ័យ បវរសួស្តី មហាប្រសើរ ជួយថែរក្សាដល់សប្បុរសជនទាំងអស់ ទទួលបាននូវពុទ្ធពរទាំងបួនប្រការគឺ ៖ អាយុ វណ្ណៈ សុខៈ ពលៈ កុំបីឃ្លាងឃ្លាតឡើយ ៕
ចែករំលែកព័តមាននេះ