ខេត្តស្វាយរៀង ៖ ប្រជាពលរដ្ឋឃុំព្រះពន្លា មានការព្រួយបារម្ភបាត់បង់ដីចំណីព្រែក និងដីអូរសាធារណៈ ដោយក្រុមហ៊ុនជីករណ្តៅដីយកអាចម៌ដីលក់មកជីកយកអាចម៌ដីដឹកទៅចាក់លប់អូរលប់ព្រែកធម្មជាតិនិងលប់ប្រឡាយបង្កឲ្យស្ទះទឹកជន់លិចស្រូវនៅរដូវវង្សា។ ប្រជាពលរដ្ឋលើកឡើងនេះនៅរសៀលថ្ងៃទី២១ ធ្នូ ឆ្នាំ២០២៥ នៅភូមិត្រពាំងលាច…
ខេត្តស្វាយរៀង ៖ ប្រជាពលរដ្ឋឃុំព្រះពន្លា មានការព្រួយបារម្ភបាត់បង់ដីចំណីព្រែក និងដីអូរសាធារណៈ ដោយក្រុមហ៊ុនជីករណ្តៅដីយកអាចម៌ដីលក់មកជីកយកអាចម៌ដីដឹកទៅចាក់លប់អូរលប់ព្រែកធម្មជាតិនិងលប់ប្រឡាយបង្កឲ្យស្ទះទឹកជន់លិចស្រូវនៅរដូវវង្សា។
ប្រជាពលរដ្ឋលើកឡើងនេះនៅរសៀលថ្ងៃទី២១ ធ្នូ ឆ្នាំ២០២៥ នៅភូមិត្រពាំងលាច ឃុំព្រះពន្លា ស្រុកកំពង់រោទ៌ ។
បើតាមប្រជាពលរដ្ឋប្រាប់ឲ្យដឹងថា កាលរដូវវស្សាកន្លងទៅមានក្រុមឈ្មូញធ្វើអាជីវកម្មជីករណ្តៅដី ទប់ទឹកព្រែកត្រពាំងលាចបិទផ្លូវទឹកបង្កឲ្យលិចស្រូវរបស់ប្រជាពលរដ្ឋម្តងមកហើយនៅចំណុចខាងក្រោយវត្តត្រពាំងលាចនេះ ។ ខណៈនោះប្រជាពលរដ្ឋបានលើកគ្នាមករារាំងតវ៉ា អាជ្ញាធរបានមកឃាត់ដកគ្រឿងចក្រចេញ ។ ក៏ប៉ុន្តែបច្ចុប្បន្នមានក្រុមអាជីវកម្មជីករណ្តៅដី០១ក្រុមផ្សេងទៀតបានយកគ្រឿងចក្រមកជីកដីចំណីព្រែកម្តង រួចយកអាចម៌ដីទៅលក់យកប្រាក់ផ្ទាល់ខ្លួនធ្វើឲ្យបាត់បង់ដីចំណីព្រែក ដែលសម្រាប់ឃ្វាលគោក្របីនៅរដូវវស្សា ។ ហើយអនាគត់នៅចំណុចភូមិត្រពាំងលាច និងភូមិជាច្រើនក្នុងឃុំព្រះពន្លា គឺគ្មានផ្លូវទឹកហូទេនៅរដូវវស្សា ដោយសាតែក្រុមហ៊ុន គេចាក់ដីលប់អូរលប់ព្រែកយកធ្វើជាកម្មសិទ្ធិបិទផ្លូវទឹក ពេលប្រជាពលរដ្ឋតវ៉ាក្រុមហ៊ុនប្រាប់ថា ចាំគេដាក់លូបង្ហូរទឹកចូលក្នុងរណ្តៅដី ក្នុងតំបន់សេដ្ឋកិច្ចពិសេស ។
ទាក់ទិនករណីនេះដែរ អាជ្ញាធរស្រុកកំពង់រោទិ៍ បានប្រាប់អ្នកសារព័ត៌មានយើងថា រដ្ឋបាលខេត្តសម្របសម្រួលឲ្យក្រុមហ៊ុនធ្វើអាជីវកម្មជីករណ្តៅដី យកអាចម៌ដីលក់ឬយកអាចម៌ដីទៅចាក់លំនៅឋានឬតាមរោងចក្រ អនុញ្ញាតឲ្យស្តារព្រែកនិងស្តារអូរធម្មជាតិដើម្បីយកទឹកសម្រាប់ស្រោចស្រពស្រែនៅរដូវវស្សា និងរដូវប្រាំង ហើយចំពោះព្រែកឬអូរមួយចំនួនដែលកាត់តាមតំបន់សេដ្ឋកិច្ចពិសេស ខេត្តសម្រួលឲ្យលប់ ក៏ប៉ុន្តែឲ្យក្រុមហ៊ុនដាក់លូ ជីកស្រះស្តុកទឹកនិងជីកប្រឡាយវាង គឺមិនបិទផ្លូវទឹកទេសូមកុំឲ្យប្រជាពលរដ្ឋព្រួយបារម្ភ ។ ចំណែកម្ចាស់គ្រឿងចក្រដែលជីកដីចំណីព្រែកនោះបានឲ្យដឹងថា ខ្លួនរស់នៅក្នុងភូមិអង្គក្តួច ឃុំព្រះពន្លា បានទិញដីមាត់ព្រែកនេះទំហំ៤០អាក្នុងតម្លៃ៩,០០០ដុល្លារ ពីអ្នកភូមិត្រពាំងលាច។
ក្នុងករណីនេះដែរលោកប៉ាត់ សាក់ មន្ត្រីនៃមន្ទីររ៉ែ ខេត្តស្វាយរៀង បានមានប្រសាសន៍ថា លោកមិនទាន់ទទួលព័ត៌មាននៅឡើយទេ បើមានករណីអាជីវករធ្វើអាជីវកម្មជីករណ្តៅដីជីកដីចំណីព្រែក ចំណុចខាងលិចវត្តត្រពាំងលាចនោះលោកនិងចុះទៅពិនិត្យមើល ដោយនៅចំណុចនោះមិនទាន់ឃើញមកសុំច្បាប់ធ្វើអាជីវកម្មទេ៕
ចែករំលែកព័តមាននេះ