កំណត់ត្រាថ្មី! តម្លៃមាសអន្តរជាតិហក់ឡើងដល់ ៥ ៣០០ដុល្លារ/តម្លឹងជាលើកដំបូង
បរទេស ៖ នៅថ្ងៃទី២២ ខែធ្នូ ឆ្នាំ២០២៥ តម្លៃមាសអន្តរជាតិបានហក់ឡើងលើសពី ៤ ៤០០ ដុល្លារក្នុង១អោន ឬ…
បរទេស ៖ នៅថ្ងៃទី២២ ខែធ្នូ ឆ្នាំ២០២៥ តម្លៃមាសអន្តរជាតិបានហក់ឡើងលើសពី ៤ ៤០០ ដុល្លារក្នុង១អោន ឬ ៥ ៣០១ដុល្លារក្នុងតម្លឹងជាលើកដំបូងនៅក្នុងប្រវត្តិសាស្ត្រ ដោយផ្អែកលើការរំពឹងទុកកាន់តែខ្លាំងឡើង នៃការកាត់បន្ថយអត្រាការប្រាក់បន្ថែមទៀតរបស់ធនាគារកណ្តាលសហរដ្ឋអាមេរិក (Fed) ព្រមទាំងតម្រូវការដ៏រឹងមាំនៃលោហៈធាតុដ៏មានតម្លៃមួយនេះ ដើម្បីធ្វើឱ្យតម្លៃឈានដល់កម្រិតខ្ពស់បំផុតគ្រប់ពេល។ នេះបើយោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
តម្លៃមាសអន្តរជាតិភ្លាមៗ បានហក់ឡើង ១,៤% ដល់ ៤ ៤០០ដុល្លារក្នុង១អោន ឬ ៥ ៣០១ដុល្លារក្នុង១តម្លឹង ដែលជាតម្លៃកំណត់ត្រា គិតត្រឹមម៉ោង ១២:០០នាទីថ្ងៃត្រង់ ថ្ងៃទី២២ ខែធ្នូ ឆ្នាំ២០២៥ (ម៉ោងនៅកម្ពុជា) ។
នៅឆ្នាំ ២០២៥ តម្លៃមាសបានកើនឡើង ៦៧% ហើយរហូតមកដល់ពេលនេះ ដោយបំបែកកំណត់ត្រាជាច្រើនលើកច្រើនសារ និងបានទម្លាក់រនាំងតម្លៃ ៣ ០០០ ដុល្លារ និង ៤ ០០០ដុល្លារក្នុង១អោនជាលើកដំបូងផងដែរ។ មិនតែប៉ុណ្ណោះ តម្លៃមាសបានត្រៀមខ្លួនជាស្រេចសម្រាប់ការកើនឡើងប្រចាំឆ្នាំខ្ពស់បំផុត ចាប់តាំងពីឆ្នាំ ២៩៧៩។
ជាប្រពៃណីទៅហើយ មាសត្រូវបានចាត់ទុកជាទ្រព្យសកម្មមានសុវត្ថិភាពបំផុត។ តម្លៃមាសកើនឡើងនៅពេលភាពតានតឹងផ្នែកភូមិសាស្ត្រនយោបាយ និងពាណិជ្ជកម្មកាន់តែខ្លាំងឡើង គួបផ្សំនឹងការទិញចូលរបស់ធនាគារកណ្តាលនៅលើពិភពលោក និងការរំពឹងទុកនៃអត្រាការប្រាក់ទាបនៅឆ្នាំក្រោយផងដែរ។ កម្សោយប្រាក់ដុល្លារអាមេរិកបានធ្វើឱ្យមាសមានតម្លៃថោកជាង សម្រាប់អ្នកទិញនៅបរទេស។
ជាមួយគ្នានោះ ទីផ្សារសកលកំពុងតាមដាន និងកំណត់តម្លៃក្នុងការកាត់បន្ថយអត្រាការប្រាក់ ២ លើករបស់ធនាគារកណ្តាលអាមេរិកនៅឆ្នាំក្រោយ ទោះបីជាធនាគារកណ្តាលសហព័ន្ធបានព្រមានយ៉ាងណាក៏ដោយ៕
ចែករំលែកព័តមាននេះ