ខេត្តព្រះវិហារ ៖ ក្នុងស្មារតីមនុស្សធម៌ «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា ដោយមិនទុកនរណាម្នាក់ចោល» នាថ្ងៃទី២១ ខែធ្នូ ឆ្នាំ២០២៥ ឯកឧត្តម…
ខេត្តព្រះវិហារ ៖ ក្នុងស្មារតីមនុស្សធម៌ «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា ដោយមិនទុកនរណាម្នាក់ចោល» នាថ្ងៃទី២១ ខែធ្នូ ឆ្នាំ២០២៥ ឯកឧត្តម ថង សាវុន ប្រធានគណៈកម្មាធិការសាខាកាកបាទក្រហមកម្ពុជា ខេត្តមណ្ឌលគិរី បានដឹកនាំសហការី រួមមានអនុប្រធាន ហិរញ្ញិក លេខាធិការ សមាជិកគណៈកម្មាធិការសាខាយុវជនកាកបាទក្រហម និងក្រុមការងារអនុសាខាស្រុក ចុះសួរសុខទុក្ខ និងនាំយកអំណោយសង្គ្រោះបន្ទាន់ ចែកជូនបងប្អូនប្រជាពលរដ្ឋដែលជាភៀសសឹកចំនួន ១៩៥គ្រួសារ ។
ពិធីសំណេះសំណាល និងចែកអំណោយនេះ បានប្រព្រឹត្តទៅនៅមណ្ឌលសុវត្ថិភាព ស្ថិតក្នុងស្រុកឆែប ខេត្តព្រះវិហារ ។ ក្នុងឱកាសនោះ ឯកឧត្តម ថង សាវុន បាននាំនូវប្រសាសន៍សាកសួរសុខទុក្ខយ៉ាងជ្រាលជ្រៅពីសំណាក់ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាល សម្ដេចតែងតែយកចិត្តទុកដាក់ខ្ពស់ចំពោះសុខទុក្ខ និងជីវភាពរស់នៅរបស់បងប្អូនប្រជាពលរដ្ឋដែលជួបការលំបាក និងរងគ្រោះដោយគ្រោះមហន្តរាយផ្សេងៗ ។
ឯកឧត្តមប្រធាន បានសម្ដែងនូវការសោកស្ដាយ និងចូលរួមរំលែកទុក្ខលំបាកជាមួយបងប្អូនដែលរងផលប៉ះពាល់ពីស្ថានភាពសឹក ហើយបានលើកទឹកចិត្តឱ្យបងប្អូនខិតខំថែរក្សាសុខភាព និងមានក្តីសង្ឃឹមក្នុងជីវិត។
គ្រួសារនីមួយៗទទួលបាននូវ «ឃីតមនុស្សធម៌» ដែលរួមមានគ្រឿងឧបភោគបរិភោគចាំបាច់ និងសម្ភារប្រើប្រាស់ប្រចាំថ្ងៃ ដើម្បីជួយសម្រាលបន្ទុកជីវភាពបានមួយកម្រិត ក្នុងអំឡុងពេលស្នាក់នៅមណ្ឌលសុវត្ថិភាព។សកម្មភាពនេះមិនត្រឹមតែបង្ហាញពីការយកចិត្តទុកដាក់របស់រដ្ឋបាលខេត្តមណ្ឌលគិរីប៉ុណ្ណោះទេ ប៉ុន្តែវាគឺជាសក្ខីភាពនៃការសាមគ្គីភាពរវាងខេត្ត និងខេត្ត ក្នុងនាមជាមហាគ្រួសារខ្មែរតែមួយ ក្រោមការដឹកនាំដ៏ខ្ពង់ខ្ពស់របស់កាកបាទក្រហមកម្ពុជា ។
បងប្អូនប្រជាពលរដ្ឋដែលទទួលបានអំណោយ បានសម្ដែងនូវក្ដីរំភើប និងអំណរគុណយ៉ាងជ្រាលជ្រៅចំពោះថ្នាក់ដឹកនាំគ្រប់លំដាប់ថ្នាក់ ជាពិសេស សាខាកាកបាទក្រហមកម្ពុជា ខេត្តមណ្ឌលគិរី ដែលមិនបានបោះបង់ពួកគេចោលក្នុងគ្រាដ៏លំបាកនេះឡើយ ៕
ចែករំលែកព័តមាននេះ