រាជធានីភ្នំពេញ ៖ សម្ភារជាកុំព្យូទ័រ កង្ហារដែលជាអំណោយរបស់អង្គការ Blooming Kids ប្រទេសអូស្ត្រាលី ត្រូវបានលោកស្រីហេ ឡែន ទីប្រឹក្សាច្បាប់អមទីស្តីការគណៈរដ្ឋមន្ត្រី និងជាជំនួយការផ្ទាល់លោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី នាំយកទៅប្រគល់ជូនដល់សាលារៀននៅសហគមន៍សង្កាត់ព្រែកលៀប ដើម្បីបំពេញតម្រូវការឱ្យក្មួយៗយុវជន កុមារក្រីក្រ និងកុមារកំព្រា ដែលកំពុងទទួលការបណ្តុះបណ្តាលដោយសាលាសង្កាត់ព្រែកលៀប ។
ពិធីប្រគល់ និងទទួលសម្ភារនេះ បានរៀបចំ ធ្វើឡើងកាលពីព្រឹកថ្ងៃទី២២ កក្កដា នៅសាលាសង្កាត់ព្រែកលៀប ខណ្ឌប្ញស្សីកែវ ដោយមានការចូលរួម និងប្រគល់ដោយលោកស្រីហេ ឡែន និងស្វាមី ព្រមទាំងតំណាងអង្គការ Blooming Kids និងទទួលដោយលោកព្រាប មុនី ចៅសង្កាត់ព្រែកលៀប លោកគ្រូ អ្នកគ្រូ និងមន្ត្រីជុំវិញសង្កាត់ ។ សម្ភារដែលឧបត្ថម្ភដល់ សាលារៀនសហគមន៍សង្កាត់ព្រែកលៀបក្នុង ឱកាសនោះ រួមមានកុំព្យូទ័រចំនួន៥គ្រឿង និងកង្ហារចំនួន៦គ្រឿងជាអំណោយរបស់អង្គការBlooming Kids ផ្តល់តាមរយៈលោកស្រីហេ ឡែន ។ នៅក្នុងឱកាសនោះ តំណាងអង្គការ Blooming Kids ក៏បានសន្យាជួយឧបត្ថម្ភលោកគ្រូចំនួន២នាក់ប្រចាំខែរយៈពេល១ឆ្នាំស្មើនឹងចំនួន១.២០០ដុល្លារផងដែរ ។
លោកព្រាប មុនី ចៅសង្កាត់ព្រែកលៀប បានថ្លែងថា ដោយមើលឃើញពីការខ្វះខាតសម្ភារសម្រាប់តម្រូវការដល់ក្មួយៗយុវជនកុមារក្រីក្រ និងកុមារកំព្រា ដែលកំពុងទទួលការបណ្តុះបណ្តាលដោយសាលាសង្កាត់ក្នុងថ្នាក់សហគមន៍ និងចង់ឱ្យក្មួយៗមានជំនាញកុំព្យូទ័រ លោកក៏បានស្នើសុំលោកស្រី ហេឡែន ទីប្រឹក្សាច្បាប់ អមទីស្តីការគណៈរដ្ឋមន្ត្រី និងជាជំនួយផ្ទាល់លោកបណ្ឌិតសភាចារ្យ សុខ អាន ហើយលោកស្រី ក៏នាំយកសម្ភារទាំងនោះមកប្រគល់ឱ្យនៅពេលនេះ ។ ក្នុងនាមលោកគ្រូ អ្នកគ្រូ អាណាព្យាបាល សិស្សានុសិស្ស និងអាជ្ញាធរសង្កាត់ព្រែកលៀប លោកព្រាប មុនី ក៏បានថ្លែងអំណរគុណយ៉ាងជ្រាលជ្រៅដល់លោកស្រីហេ ឡែន និងអង្គការ Blooming Kids ដែលបាន ជួយឧបត្ថម្ភសម្ភារដល់សាលារៀនក្នុងសហ គមន៍សង្កាត់ព្រែកលៀបនាពេលនេះ ។ នេះជាកាយវិការ និងទឹកចិត្តដ៏ល្អក្នុងការជួយជំរុញកុមារក្រីក្រកម្ពុជាឱ្យបំបាត់គ្រោះអវិជ្ជា ហើយឈានចាប់យកចំណេះដឹងដ៏ភ្លឺស្វាងសម្រាប់អនាគត ។
គួរបញ្ជាក់ថា ថ្នាក់រៀនសម្រាប់កុមារក្រីក្រ និងកុមារកំព្រា ត្រូវបានបង្កើតឡើងតាំងពីឆ្នាំ១៩៩៩ មកម្ល៉េះ ក្រោមការផ្តួចផ្តើមរបស់លោកព្រាប មុនី ចៅសង្កាត់ព្រែកលៀប ដើម្បីប្រមែប្រមូលក្មេងៗក្រីក្រ និងក្មេងកំព្រាដែលពុំមានលទ្ធភាពចូលរៀនទៅតាមសាលារដ្ឋឱ្យមកចូលរៀន ។ មុនដំបូង ការបង្រៀនបានធ្វើនៅក្រោមដើមឈើ និងផ្ទះប្រជាពលរដ្ឋ ។ នៅឆ្នាំ២០០៤ ក្រោមការផ្តួចផ្តើម និងជួយជ្រោមជ្រែងពីលោកព្រាប មុនី អគារសិក្សា១ខ្នងត្រូវបានបង្កើតឡើងក្នុងសាលាសង្កាត់ដោយធ្វើអំពីឈើប្រក់ស្បូវ ហើយនៅឆ្នាំ ២០០៩ ក៏ត្រូវបានលោកស្រីស៊ុង យុងចា ជាពាណិជ្ជករជនជាតិកូរ៉េខាងត្បូង ជួយកសាងជាអគារសិក្សាធ្វើអំពីថ្មមាន៣បន្ទប់ អស់ទឹកប្រាក់ចំនួន១២.០០០ដុល្លារ ដោយបើក ដំណើរការបង្រៀនភាសាខ្មែរ អង់គ្លេស និង តម្បាញ ។
លោកព្រាប មុនី បានឱ្យដឹងថា ចាប់តាំងពីសាលារៀននៅសហគមន៍សង្កាត់ព្រែកលៀបដំណើរការរហូតមកដល់បច្ចុប្បន្ន មានការជួយឧបត្ថម្ភពីរោងចក្រជូ ស៊ីង ដោយឧបត្ថម្ភជាអង្ករដល់សិស្សានុសិស្សក្នុង១ខែម្នាក់១០គីឡូក្រាម (គឺ១ខែ១តោន) , លោកឡោក ឆាយ ទីប្រឹក្សាសម្តេចអគ្គមហាធម្មពោធិសាល ជា ស៊ីម បានឧបត្ថម្ភ១ខែចំនួន៤០ម៉ឺនរៀល សម្រាប់គ្រូចំនួន៣នាក់ ។ ក្រៅពីនោះ ក៏មានការជួយឧបត្ថម្ភពីការិយាល័យអប់រំក្រៅប្រព័ន្ធនៃមន្ទីរអប់រំ យុវជន និងកីឡារាជធានីភ្នំពេញ និងសប្បុរសជនមួយចំនួន ព្រមទាំងសង្កាត់ព្រែកលៀបផងដែរ ៕
ចែករំលែកព័តមាននេះ