រាជធានីភ្នំពេញ ៖ រដ្ឋមន្ត្រីសុខាភិបាល ៖ «ជាតិ និងប្រជាជន នៅជាមួយកងទ័ពជានិច្ច ឯប្រព័ន្ធសុខាភិបាលទាំងមូលចលនាយ៉ាងពេញទំហឹង ក្នុងការសង្គ្រោះព្យាបាលគ្រប់វីរកងទ័ព»។ នេះបើយោងតាមក្រសួងសុខាភិបាលបានប្រកាសនាល្ងាចថ្ងៃទី១៧…
រាជធានីភ្នំពេញ ៖ រដ្ឋមន្ត្រីសុខាភិបាល ៖ «ជាតិ និងប្រជាជន នៅជាមួយកងទ័ពជានិច្ច ឯប្រព័ន្ធសុខាភិបាលទាំងមូលចលនាយ៉ាងពេញទំហឹង ក្នុងការសង្គ្រោះព្យាបាលគ្រប់វីរកងទ័ព»។ នេះបើយោងតាមក្រសួងសុខាភិបាលបានប្រកាសនាល្ងាចថ្ងៃទី១៧ ខែធ្នូ ឆ្នាំ២០២៥ ។
ជាក់ស្តែង នាព្រឹកថ្ងៃពុធ ទី១៧ ខែធ្នូ ឆ្នាំ២០២៥ លោក ឈាង រ៉ា រដ្ឋមន្ត្រីក្រសួងសុខាភិបាល និងថ្នាក់ដឹកនាំក្រសួងសុខាភិបាល បានបន្តអញ្ជើញចុះសួរសុខទុក្ខវីរកងទ័ព ដែលកំពុងសម្រាកព្យាបាលជំងឺ នៅមន្ទីរពេទ្យមិត្តភាពខ្មែរ-សូវៀត ។
លោករដ្ឋមន្ត្រី បានដឹកនាំការប្រជុំតាមដានវឌ្ឍនភាពនៃការថែទាំព្យាបាល ដោយក្រុមគ្រូពេទ្យឯកទេសពហុជំនាញមន្ទីរពេទ្យ ឈរលើការឆ្លុះបញ្ចាំងពីការធ្វើរោគវិនិច្ឆ័យ រហូតដល់ដំណើរវិវត្តន៍នៃជំងឺ និងប្រសិទ្ធភាពនៃការព្យាបាល ។
កិច្ចប្រជុំផ្តោតសំខាន់ផងដែរលើតម្រូវការផ្សេងៗជាជំនួយបច្ចេកទេស សមត្ថភាពដឹកនាំ គ្រប់គ្រង រាប់ពីការទទួលអ្នកជំងឺតាំងពីដំបូងរហូតការសម្រេចបញ្ជូន និងផ្តល់ការបម្រើថែទាំព្យាបាលកម្រិតពហុឯកទេស នៅមន្ទីរពេទ្យជាតិ ចំពោះករណីស្មុគស្មាញ ។
លោក បានឆ្លៀតពាំនាំនូវការផ្តាំផ្ញើសួរសុខទុក្ខជូនពរជ័យពីបងប្អូនសាធារណជន ក្រុមគ្រួសារអ្នកជំងឺដែលកំពុងសម្រាកក្នុងមន្ទីរពេទ្យដល់គ្រប់វីរយុទ្ធជនយើង ទាំងកំពុងទទួលការថែទាំព្យាបាលទាំងកំពុងឈរជើងជួរមុខ ។
លោករដ្ឋមន្ត្រី បានពាំនាំជាពិសេសនូវពរសព្ទសាធុការរបស់ប្រមុខរាជរដ្ឋាភិបាល សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ ដល់វីរយុទ្ធជនដែលកំពុងសម្រាកព្យាបាលគ្រប់ៗរូប ឆាប់ជាសះស្បើយ ៕
ចែករំលែកព័តមាននេះ