ទីក្រុងបាងកក ៖ កិច្ចព្រមព្រៀងពាណិជ្ជកម្មរបស់ប្រទេសថៃជាមួយនឹងសហរដ្ឋអាមេរិក កំពុងស្ថិតក្នុងហានិភ័យនៃការលុបចោល ខណៈដែលការប៉ះទង្គិចគ្នាតាមព្រំដែនជាមួយប្រទេសកម្ពុជា កាន់តែធ្ងន់ធ្ងរឡើង។ នេះបើយោងតាមប្រភពពីសារព័ត៌មានថៃ Thai Examiner បានចេញផ្សាយកាលពីថ្ងៃទី១៦…
ទីក្រុងបាងកក ៖ កិច្ចព្រមព្រៀងពាណិជ្ជកម្មរបស់ប្រទេសថៃជាមួយនឹងសហរដ្ឋអាមេរិក កំពុងស្ថិតក្នុងហានិភ័យនៃការលុបចោល ខណៈដែលការប៉ះទង្គិចគ្នាតាមព្រំដែនជាមួយប្រទេសកម្ពុជា កាន់តែធ្ងន់ធ្ងរឡើង។ នេះបើយោងតាមប្រភពពីសារព័ត៌មានថៃ Thai Examiner បានចេញផ្សាយកាលពីថ្ងៃទី១៦ ខែធ្នូ ឆ្នាំ២០២៥។
ការភ័យខ្លាចខ្លាំងនោះថា ប្រធានាធិបតីអាមេរិក លោក ដូណាល់ ត្រាំ (Donald Trump) អាចនឹងលុបចោលការចរចា និងដំឡើងពន្ធគយជាការដាក់ទណ្ឌកម្មលើថៃ ហើយនេះជាការរំពឹងទុកដ៏គួរឱ្យព្រួយបារម្ភខ្លាំងបំផុតជាពិសេសសម្រាប់បណ្តាក្រុមហ៊ុននាំចេញថៃ។ ប្រទេសថៃអាចនឹងលេងជាមួយភ្លើង ខណៈដែលខ្លួនកំពុងពិចារណាលើការរឹតបន្តឹងចក្រឈូងសមុទ្រថៃដើម្បីបញ្ឈប់ការដឹកជញ្ជូនប្រេង និងសម្ភារៈយោធាមកប្រទេសកម្ពុជា។ សង្គ្រាមថៃ និងកម្ពុជា ដែលកំពុងរីករាលដាលខ្លាំងឥឡូវនេះ ប្រឈមនឹងហានិភ័យនៃការឆ្លើយតបធ្ងន់ៗ ដោយផ្ទាល់ពីរដ្ឋាភិបាលសហរដ្ឋអាមេរិក។ នេះបើតាមចេញពីផ្សាយ Thai Examiner ។
កាសែតអាមេរិក Wall Street Journal បានរាយការណ៍ថា បន្ទាប់ពីការអំពាវនាវរបស់លោក ត្រាំ ជាមួយមេដឹកនាំកម្ពុជា និងថៃ កាលពីថ្ងៃសុក្រសប្តាហ៍មុននោះ ប្រធានាធិបតីអាមេរិកបានទទូចថា លោកបានព្រមានប្រទេសទាំងពីរថា លោកនឹងលុបចោលការចរចាពាណិជ្ជកម្ម ព្រមទាំងដំឡើងពន្ធថែមទៀត ដោយលោកពណ៌នាពន្ធគយថាជាឧបករណ៍ដ៏មានប្រសិទ្ធភាពនៃគោលនយោបាយការបរទេស សម្រាប់រដ្ឋបាលរបស់លោក។
ទោះយ៉ាងណាក៏ដោយ បន្ទាប់ពីការកត់សម្គាល់របស់លោក ទាក់ទងនឹងការគំរាមដំឡើងពន្ធ នាយករដ្ឋមន្ត្រីថៃ លោក អានុទីន ចាន់វីរៈគុល (Anutin Charnvirakul) ឯណោះ បានជំទាស់នឹងបទឈប់បាញ់ ដោយនិយាយថា លោកមិនដែលយល់ព្រមលើបទឈប់បាញ់នោះទេ។
ផ្ទុយទៅវិញ លោកបានប្រកាសថា ប្រទេសថៃមិនបានធ្វើការប្តេជ្ញាចិត្តជាផ្លូវការណាមួយនោះឡើយ។ ស្របពេលដែលជំហរនេះ ត្រូវបានគាំទ្រដោយក្រសួងការបរទេសរបស់ថៃ ។ ជាពិសេស អនុរដ្ឋមន្ត្រីការបរទេសថៃ លោក ស៊ីហាសក្តិ ភួងកេតកែវ (Sihasak Phuangketkeow) ក៏បានបញ្ជាក់ពីរបាយការណ៍នេះផងដែរ។ ដោយលោកបាននិយាយថា លោកមានវត្តមានអំឡុងពេលការសន្ទនាទូរស័ព្ទជាមួយលោក ត្រាំ។ ជាលទ្ធផល នាយករដ្ឋមន្ត្រីថៃបានបដិសេធរាល់ទំនាក់ទំនងណាមួយរវាងកិច្ចព្រមព្រៀងពាណិជ្ជកម្ម និងលក្ខខណ្ឌបទឈប់បាញ់។ ចាប់តាំងពីយប់នៃកិច្ចសន្ទនាតាមទូរស័ព្ទជាមួយលោក ត្រាំ រួចមក ប្រទេសថៃបានលើកឡើងថា លក្ខខណ្ឌបែបនេះ គឺដូចជាការបង្ខិតបង្ខំ។
ជាមួយគ្នាដែរ កាលពីថ្ងៃទី១៦ ខែធ្នូ តាមការចេញផ្សាយពីកាសែតថៃ Khaosod បានឱ្យដឹងថា រដ្ឋមន្ត្រីក្រសួងពាណិជ្ជកម្មថៃ លោកស្រី Suphajee Suthamphan បានទទួលស្គាល់ថា ការចរចាពន្ធគយជាមួយអាមេរិក មិនបានបង្ហាញភាពរីកចម្រើននោះទេ ដែលនេះគឺជាក្តីបារម្ភមួយផ្សេងទៀត សម្រាប់បណ្តាក្រុមហ៊ុននាំចេញរបស់ថៃ៕
ចែករំលែកព័តមាននេះ