រាជធានីភ្នំពេញ ៖ គិតមកដល់ថ្ងៃទី១២ ខែធ្នូ ឆ្នាំ២០២៥ គឺមានរយៈពេល៦ថ្ងៃហើយ ដែលយោធាថៃ បានធ្វើការរំលោភបទឈប់បាញ់ដោយបានរំលោភបំពានដែនអធិបតេយ្យកម្ពុជា និងធ្វើការបាញ់ប្រហារលើភូមិសាស្ត្រជនស៊ីវិលកម្ពុជា ហើយបណ្តាលឲ្យជនស៊ីវិលស្លាប់ចំនួន១១នាក់…
រាជធានីភ្នំពេញ ៖ គិតមកដល់ថ្ងៃទី១២ ខែធ្នូ ឆ្នាំ២០២៥ គឺមានរយៈពេល៦ថ្ងៃហើយ ដែលយោធាថៃ បានធ្វើការរំលោភបទឈប់បាញ់ដោយបានរំលោភបំពានដែនអធិបតេយ្យកម្ពុជា និងធ្វើការបាញ់ប្រហារលើភូមិសាស្ត្រជនស៊ីវិលកម្ពុជា ហើយបណ្តាលឲ្យជនស៊ីវិលស្លាប់ចំនួន១១នាក់ និងរងរបួសជាច្រើននាក់ នេះបើតាមអ្នកនាំពាក្យក្រសួងការពារជាតិកម្ពុជា ។
ថ្លែងក្នុងសន្នីសីទសារព័ត៌មានរសៀលថ្ងៃទី១២ ខែធ្នូ ឆ្នាំ២០២៥ លោកជំទាវ ម៉ាលី សុជាតា អ្នកានាំំពាក្យក្រសួងការពារជាតិបានបញ្ជាក់យ៉ាងដូច្នេះថា ៖ មកដល់ពេលនេះរយៈពេល៦ថ្ងៃ ហើយដែលយោធាថៃ បានធ្វើការរំលោភដែនអធិបតេយ្យភាពកម្ពុជានៅភូមិភាគទី៤ និងទី៥ និងបានរំលោភកិច្ចព្រមព្រៀងសន្តិភាពរវាងកម្ពុជា-ថៃ ដែលភាគីទាំងពីរបានចុះហត្ថលេខា កាលពីថ្ងៃទី២៦ ខែកក្កដា ឆ្នាំ២០២៥ ដោយបានធ្វើសកម្មភាព ដោយប្រដាប់អាវុធ ឈ្លានពានលើកដែនបូរណភាពទឹកដី ចាប់តាំងពីថ្ងៃទី៧ ដល់ថ្ងៃទី១២ធ្នូនេះ ។
លោកជំទាវ អ្នកនាំពាក្យ បានលើកឡើងថា ភាគីថៃ បានធ្វើការបាញ់ប្រហារលើកស្ថានការណ៍ជួរមុខ នៅសមរភូមិ ទិសយោធភូមិភាគទី៤ ភាគីថៃ បានបន្តបាញ់ប្រហារមកលើកម្ពុជា គិតចាប់ពីម៉ោង ១៣:០០នាទី ដល់ម៉ោង ១៥:០០នាទី ថ្ងៃទី១២ ខែធ្នូ ឆ្នាំ២០២៥ ៖ ម៉ោង ១៣:២៧នាទី យោធាថៃ បានប្រើប្រាស់យន្តហោះទម្លាក់គ្រាប់នៅភូមិសាស្ត្រវាលឥន្ទ្រី។ ចំពោះស្ថានការណ៍ នៅក្នុងភូមិសាស្ត្រផ្សេងទៀតមានសភាពស្ងប់ស្ងាត់។ និងស្ថានការណ៍ជួរមុខនៅសមរភូមិទិ សយោធភូមិភាគទី៥ ភាគីថៃ បានបន្តបាញ់ប្រហារមកលើកម្ពុជា៖ គិតចាប់ពីម៉ោង ១៣:០០នាទីព្រឹក ដល់ម៉ោង ១៥:០០នាទីរសៀល ថ្ងៃទី១២ ខែធ្នូ ឆ្នាំ២០២៥ – ម៉ោង ១៣:២៧នាទី យោធាថៃបានបាញ់ផ្លោងជ្រុំចូលភូមិសាស្ត្រភូមិព្រៃចាន់។ ម៉ោង ១៣:៤៥នាទី យោធាថៃបាញ់ផ្សែងពុលនៅភូមិសាស្ត្រភូមិព្រៃចាន់។ ម៉ោង ១៣:៥៨នាទី កម្លាំងថ្មើរជើងរបស់យោធាថៃ អមដោយរថក្រោះ បានរុលចូលភូមិសាស្ត្របឹងត្រកួន។ – ម៉ោង ១៤:១៩នាទី យោធាថៃ បានប្រើប្រាស់ដ្រូនស៊ើបការណ៍ហោះក្តាប់សភាពការណ៍ខាងក្រោយភូមិសាស្ត្រភូមិព្រៃចាន់។ ចំពោះស្ថានការណ៍នៅក្នុងភូមិសាស្ត្រផ្សេងទៀតមានសភាពស្ងប់ស្ងាត់ ។
លោកជំទាវ បានលើកឡើងថា ជាការគួរឱ្យកត់សម្គាល់ផងដែរថា នៅថ្ងៃទី១១ ខែធ្នូ ឆ្នាំ២០២៥ សកម្មភាពដ៏កំរោលរបស់យោធាថៃនេះ ជាការបើកការបាញ់ប្រហារដោយមិនរើសគោលដៅ បាញ់ចូលទីប្រជុំជនភូមិដ្ឋានរបស់ប្រជាពលរដ្ឋស៊ីវិលរស់នៅ ពិសេសជាសាលារៀនរបស់កុមារ និងបានបាញ់បំផ្លាញប្រាសាទតាក្របី, ប្រាសាទព្រះវិហារជាទីសក្ការៈរបស់កម្ពុជា និងបេតិកភណ្ឌរបស់មនុស្សជាតិ។ ទង្វើដ៏សាហាវនេះបង្ហាញពីភាពអសីលធម៌ ដែលបង្ហាញពីការប្រមាថមាក់ងាយដល់វប្បធម៌ អរិយធម៌ និងទីសក្ការៈ ដែលជាមរតក មនុស្សជាតិជា ពិសេស មរតកវប្បធម៌ ដែលដូនតាខ្មែរ បានកសាងបន្សល់ទុកមានតម្លៃមិនអាចកាត់ថ្លៃបាន ៕
ចែករំលែកព័តមាននេះ