សម្តេច ប៉ាប អំពាវនាវឱ្យបញ្ឈប់ការបា.ញ់ប្រហារគ្នាជាបន្ទាន់ តាមព្រំដែនកម្ពុជា និងថៃ
បុរីវ៉ាទីកង់ ៖ សម្តេច ប៉ាប លីអូ ទី១៤ (Pope Leo XIV) កាលពីថ្ងៃទី១០…
បុរីវ៉ាទីកង់ ៖ សម្តេច ប៉ាប លីអូ ទី១៤ (Pope Leo XIV) កាលពីថ្ងៃទី១០ ខែធ្នូ ឆ្នាំ២០២៥ បានអំពាវនាវឱ្យបញ្ចប់ជាបន្ទាន់នូវអរិភាពឡើងវិញ នៅតាមព្រំដែនកម្ពុជា និងថៃ ដែលមានការប៉ះទង្គិចគ្នាថ្មីៗនេះ បានបណ្តាលឱ្យមានអ្នកស្លាប់ និងរបួស រួមទាំងជនស៊ីវិល និងបង្ខំឱ្យមនុស្សរាប់ពាន់នាក់រត់គេចខ្លួនចេញពីផ្ទះសម្បែងពួកគេ។ នេះបើតាមប្រភពពីសារព័ត៌មានវ៉ាទីកង់ (Vatican News) បានចេញផ្សាយ។
ថ្លែងទៅកាន់ហ្វូងអ្នកស្មោះស្ម័គ្រនៅក្នុងអង្គប្រជុំសាធារណៈ សម្តេចប៉ាបបានសម្តែងការសោកសៅយ៉ាងខ្លាំង ចំពោះរបាយការណ៍អំពីបញ្ហានៅអាស៊ី ដោយទ្រង់មានព្រះបន្ទូលថា «ខ្ញុំមានការសោកសៅយ៉ាងខ្លាំងចំពោះដំណឹងនៃជម្លោះឡើងវិញតាមបណ្តោយព្រំដែនរវាងប្រទេសថៃ និងកម្ពុជា។ មានអ្នកស្លាប់ និងរបួស រួមទាំងក្នុងចំណោមជនស៊ីវិលផងដែរ ហើយមនុស្សរាប់ពាន់នាក់ត្រូវបានបង្ខំឱ្យចាកចេញពីផ្ទះរបស់ពួកគេ។ ខ្ញុំសូមបង្ហាញពីភាពស្និទ្ធស្នាលរបស់ខ្ញុំក្នុងការអធិស្ឋានដល់ប្រជាជនជាទីស្រឡាញ់ទាំងនេះ»។
ថ្លែងនៅចុងបញ្ចប់នៃអង្គប្រជុំនោះ សម្តេច ប៉ាប លីអូ ទី១៤ បានសោកស្តាយចំពោះការកើតឡើងវិញនៃភាពតានតឹងនៃប្រទេសទាំងពីរ ហើយទ្រង់ក៏បានស្នើសុំឱ្យភាគីទាំងពីរ បញ្ឈប់ការបាញ់ប្រហារជាបន្ទាន់ និងបន្តការសន្ទនាឡើងវិញ៕
ចែករំលែកព័តមាននេះ