ខេត្តកំពង់ស្ពឺ៖ កាលពីថ្ងៃទី១០ ខែធ្នូ ឆ្នាំ២០២៥ រដ្ឋបាលខេត្តកំពង់ស្ពឺ បានចេញសេចក្តីជូនដំណឹង ស្តីពី វិធានការទប់ស្កាត់សកម្មភាពបំផ្លិចបំផ្លាញធនធានជលផលធម្មជាតិ និងហាមឃាត់ការប្រើឧបករណ៍នេសាទខុសច្បាប់។ បើយោងតាម…
ខេត្តកំពង់ស្ពឺ៖ កាលពីថ្ងៃទី១០ ខែធ្នូ ឆ្នាំ២០២៥ រដ្ឋបាលខេត្តកំពង់ស្ពឺ បានចេញសេចក្តីជូនដំណឹង ស្តីពី វិធានការទប់ស្កាត់សកម្មភាពបំផ្លិចបំផ្លាញធនធានជលផលធម្មជាតិ និងហាមឃាត់ការប្រើឧបករណ៍នេសាទខុសច្បាប់។
បើយោងតាម សេចក្តីជូនដំណឹងរបស់រដ្ឋបាលខេត្តកំពង់ស្ពឺ មានកិត្តិយសសូមជម្រាបជូនដំណឹងដល់សាធារណៈជន អាជ្ញាធរមានសមត្ថកិច្ច ជាពិសេស បងប្អូនប្រជាពលរដ្ឋដែលប្រកបមុខរបរនេសាទក្នុងក្របខណ្ឌទូទាំងខេត្តកំពង់ស្ពឺ ជ្រាបថា កន្លងទៅរដ្ឋបាលខេត្តបានសង្កេត ឃើញផលធនធានជលផលរបស់ខេត្តកំពង់ស្ពឺ នៅតាមដែនទឹកធម្មជាតិ (ទំនប់ បឹង ស្ទឹង អាងទឹកធារាសាស្ត្រតូច ធំ ស្រះ ត្រពាំង ប្រឡាយ និងវាលស្រែ) មានបរិមាណផលថយចុះ ដែលមូលហេតុនេះ អាចបណ្តាលមកពីការប្រើប្រាស់ឧបករណ៍នេសាទ ខុសច្បាប់គ្រប់ប្រភេទ។
ក្នុងន័យនេះ ដើម្បីចូលរួមចំណែកថែរក្សា លើកកម្ពស់ផលស្តុកធនធានជលផលធម្មជាតិឱ្យមាននិរន្តរភាពសម្រាប់ សន្តិសុខស្បៀង និងជីវភាពរស់នៅប្រចាំថ្ងៃរបស់ប្រជាពលរដ្ឋទូទៅ រដ្ឋបាលខេត្ត សូមដាក់ចេញនូវវិធានការច្បាប់ហាមឃាត់ការ ប្រើប្រាស់ឧបករណ៍នេសាទមួយចំនួនដូចខាងក្រោម៖ -ឧបករណ៍ឆក់ត្រី ឧបករណ៍ស្បៃមុង គ្រឿងផ្ទុះ និងសារធាតុពុល
-ការប្រើឧបករណ៍នេសាទបង្កើតថ្មី ឬរបៀបនេសាទបែបថ្មីដែលបំផ្លាញធនធានជលផល ឬប្រព័ន្ធអេកូឡូស៊ី ផលផល
-ការប្រើឧបករណ៍ឡុក សាង ស្ឋ និងឧបករណ៍បាញ់ព្រួញ រួមផ្សំកែវឆ្លុះនៅតំបន់អន្លង់មេពូជវារីសត្វ
-ការប្រើឧបករណ៍នេសាទដោយមងដែលមានក្រឡាតូចជាង១,៥សង់ទីម៉ែត្រ និងមងគ្រប់ប្រភេទដែលមានក្រឡាធំ
ជាង១៥សង់ទីម៉ែត្រ និង ឧបករណ៍នេសាទស្បៃមុងគ្រប់ប្រភេទ
-សកម្មភាពដែលបំផ្លាញធនធានជលផល ឬបង្កការខូចខាតដល់បរិស្ថាន និងប្រព័ន្ធអេកូឡូស៊ីផលផល
-ហាមឃាត់ការផលិត ការទិញ ការលក់ ការដឹកជញ្ជូន ការរក្សាទុកឧបករណ៍ឆក់ត្រី ទុកឧបករណ៍ឆក់ត្រី និងឧបករណ៍នេសាទស្បៃមុង
-ហាមឃាត់ការចាក់ចោល ការបោះចោល ការបង្ហូរ ឬការបាចពង្រាយទៅក្នុងតំបន់គ្រប់គ្រងជលផលនូវភាក សំណល់រឹង រាវ និងសារធាតុពុលទៅក្នុងតំបន់គ្រប់គ្រងជលផលផងដែរ៕
ចែករំលែកព័តមាននេះ