រាជធានីភ្នំពេញ ៖ បើសិនគ្មានចំណាត់ការណាមួយ ដើម្បីឲ្យកងទ័ពថៃទទួលខុសត្រូវចំពោះទង្វើខុសច្បាប់របស់ខ្លួនថ្ងៃនេះនោះទេ កងទ័ពថៃឈ្លានពានកម្ពុជា ថ្ងៃស្អែកកងទ័ពថៃអាចនឹងធ្វើដូចគ្នាចំពោះប្រទេសដៃទៀត ដែលខ្សោយ និងតូចជាងខ្លួន។ នេះបើតាមការបញ្ជាក់របស់លោកជំទាវ ម៉ាលី…
រាជធានីភ្នំពេញ ៖ បើសិនគ្មានចំណាត់ការណាមួយ ដើម្បីឲ្យកងទ័ពថៃទទួលខុសត្រូវចំពោះទង្វើខុសច្បាប់របស់ខ្លួនថ្ងៃនេះនោះទេ កងទ័ពថៃឈ្លានពានកម្ពុជា ថ្ងៃស្អែកកងទ័ពថៃអាចនឹងធ្វើដូចគ្នាចំពោះប្រទេសដៃទៀត ដែលខ្សោយ និងតូចជាងខ្លួន។ នេះបើតាមការបញ្ជាក់របស់លោកជំទាវ ម៉ាលី សុជាតា អ្នកនាំពាក្យក្រសួងការពារជាតិ នៅក្នុងសន្និសីទសារព័ត៌មានព្រឹកថ្ងៃទី១១ ខែធ្នូ ឆ្នាំ២០២៥ នៅទីស្តីគណៈរដ្ឋមន្ត្រី ។
លោកជំទាវបានលើកឡើងថា កម្ពុជាស្នើឲ្យសហគមន៍អន្តរជាតិមានចំណាត់ការចំពោះទង្វើរបស់យោធាថៃ ព្រោះថាទង្វើបែបនេះនឹងធ្វើឲ្យប៉ះពាល់យ៉ាងធ្ងន់ធ្ងរចំពោះសន្តិភាព និងសន្តិសុខក្នុងតំបន់ទាំងមូល ។
លោកជំទាវ ម៉ាលីសុជាតា អ្នកនាំពាក្យក្រសួងការពារជាតិបានលើកឡើងថា ចាប់ពីរសៀលថ្ងៃទី១០ ខែធ្នូ ឆ្នាំ២០២៥ កងកម្លាំងយោធាថៃបានបាញ់ប្រហារជនស៊ីវិលស្លូតត្រង់បាត់បង់ជីវិតកើនឡើងរហូតដល់១០នាក់ ក្នុងនោះ មានទារកម្នាក់ផងដែ និងមានជនស្លូតត្រង់ ស៊ីវិលរងរបួសកើនឡើងរហូតដល់៦០នាក់ ។
ក្រសួងការពារជាតិកម្ពុជាបានសម្តែងការសោកស្តាយចំពោះទង្វើពុំមានភាពស្មោះត្រង់របស់ភាគីថៃ និងធ្វើការច្រានចោលទាំងស្រុងចំពោះការចោទប្រកាច់ មួលបង្កា្ច់ បំភ្លៃការពិត និងគ្មានមូលដ្ឋានម្តងហើយម្តងទៀតរបស់ភាគីថៃ ដែលក្លាយជាទម្លាប់របស់កងទ័ពថៃ ដើម្បីយកមកធ្វើជាលេសបម្រើមហិច្ឆតាឈ្លៀនពានរបស់ខ្លួនមកលើដែនអធិបតេយ្យភាពស្របច្បាប់របស់កម្ពុជា ។
លោកជំទាវបានលើកឡើងថា ចាប់តាំងពីការបើកវាយប្រហារយ៉ាងកំរោល និងខុសច្បាប់យោធា បានបំពានគ្រប់លក្ខខណ្ឌទាំងអស់នូវកិច្ចព្រមព្រៀងបទឈប់បាញ់ និងសេចក្តីថ្លែងការណ៍រួមស្តីពីកម្ពុជាថៃ បើទោះបីជាមានការអំពាវនាវយ៉ាងទទូចពីសំណាក់សហគមន៍អន្តរជាតិ ឲ្យប្រកាន់ភ្ជាប់នូវកិច្ចព្រមព្រៀងទាំងនេះ ភាគីថៃបានលែងទទួលស្គាល់កិច្ចព្រមព្រៀងទាំងនេះដោយឯកតោភាគី ។
ចំណែកភាគីកម្ពុជានៅតែបន្តប្តេជ្ញាចិត្ត ម្តងហើយម្តងទៀតអំពីការគោរពនៃកិច្ចព្រមព្រៀងទាំងនេះ ក៏ដូចជាកិច្ចព្រមព្រៀងដទៃទៀត ដែលសបញ្ជាក់ឲ្យឃើញថា តើកម្ពុជា ឬថៃដែលស្រឡាញ់សន្តិភាព និងចង់ដោះស្រាយជំម្លោះដោយសន្តិវិធីដោយពិតប្រាកដ? ។
លោកជំទាវបានលើកឡើងថា ជាក់ស្តែង យោធាថៃបានប្រព្រឹត្តិនូវអំពើដែលរំលោភបំពានច្បាប់អន្តរជាតិរាប់មិនអស់ ក្នុងនោះ មានការប្រើប្រាស់យន្តហោះចំម្បាំង F-16 ទម្លាក់គ្រាប់បែកទៅលើកន្លែងស៊ីវិល ការប្រើប្រាស់ឧស្ម័នពុលការបាញ់កម្ចេចទី តាំងប្រវត្តិសាស្ត្រ ដូចជាប្រាសាទព្រះវិហារ ប្រាសាទតាក្របី ការបាញ់អាវុធធុនធ្ងន់ គ្រប់ប្រភេទ ដោយមិនរើសគោលដៅ និងបណ្តាលឲ្យជនស៊ីវិលស្លូតត្រង់ជាច្រើននាក់បានស្លាប់ និងរងរបួស ក្នុងនោះ មានទាំងស្ត្រី កុមារ មនុស្សចាស់ជរា និងទង្វើល្មើសច្បាប់ជាច្រើនទៀត ។
លោកជំទាវបានបន្ថែមថា បើទោះជាមានបានរំលោភបំពាន និងទង្វើជាច្រើនរាប់មិនអស់ទេ កងទ័ពថៃបានថែម ចោទកម្ពុជាយ៉ាងមងើល ដែលគោលដៅតែមួយគត់ គឺបង្កើតលេស ដើម្បីបំរើការឈ្លានពាន និងវាយប្រហារមកលើជនស្លូនត្រង់កម្ពុជា ។
លោកជំទាវបានបន្ថែមទៀតថា សហគមន៍អន្តរជាតិ និងមិនព្រងើយកន្តើយ ហើយអនុញ្ញាតឲ្យប្រទេសមួយដែលបោះបង់ចោលមាគ៌ាសន្តិភាពតាមរយៈបោះបង់ចោលកិច្ចព្រមព្រៀងបទឈប់បាញ់ និងសេចក្តីថ្លែងការណ៍រួមស្តីពសន្តិភាព កម្ពុជា ថៃ ហើយមកជ្រើសរើស ការគំរាមកំហែង ការប្រើប្រាស់កំលាំង ដោយមិនខ្លាចញញើតច្បាប់អន្តរជាតិ សូម្បីតែបន្តិច ដោយបន្តទង្វើររបស់ខ្លួនដោយនិទណ្ឌភាព ។
ជាមួយគ្នានោះដែរ ក្រសួងការពារជាតិបានអំពាវនាវឲ្យភាគីថៃបញ្ឈប់ជាបន្ទាន់ ចំពោះការវាយប្រហារដោយមិនរើសអើយ ជាពិសេស លើប្រជាជនស៊ីវិល ហេរដ្ឋារចនាសម្ព័ន្ធស៊ីវិល បញ្ឈប់ការវាយប្រហារលើទីតាំងប្រវត្តិសាស្ត្រ ដែលមិនត្រឹមជាសម្បវប្បធម៌ដ៏មានតម្លៃសម្រាប់កម្ពុជាប៉ុណ្ណោះទេ ប៉ុន្តែសម្រាប់មនុស្សជាតិទាំងមូល និងបញ្ឈប់ការផ្សព្វផ្សាយព័ត៌មានមិនពិតប្រែទៅជាខ្មៅ ៕
ចែករំលែកព័តមាននេះ