​ខេត្តសៀមរាប៖ ដើម្បីចូលរួមចំណែកថែរក្សាបេតិកភណ្ឌជាតិ យុវជន​២០​រូប​ ទទួលបានការបណ្ដុះបណ្ដាលអប់រំ​ពិសេស ស្តីពីវប្បធម៌ និងបរិស្ថាន លើកទី៣ នៅរមណីយដ្ឋានប្រាសាទកោះកេរ។

យោងតាមការផ្សាយរបស់អាជ្ញាធរជាតិអប្សរានៅថ្ងៃទី១០ ខែធ្នូ ឆ្នាំ២០២៥ ​បានឱ្យដឹង​ថា កម្មវិធីអប់រំ និងផ្សព្វផ្សាយពិសេស ស្តីពីវប្បធម៌ និងបរិស្ថាន លើកទី៣ នៅរមណីយដ្ឋានប្រាសាទកោះកេរ ​មានការចូលរួមយ៉ាងសកម្មពីសិស្សានុសិស្សវិទ្យាល័យស្រយង់ចំនួន ​២០នាក់​ (ស្រី ១០នាក់)។

កម្មវិធីនេះដែលរៀបចំឡើងដោយនាយកដ្ឋានស្រាវជ្រាវ បណ្តុះបណ្តាល និងតម្កល់ឯកសារ គឺមានគោលដៅច្បាស់លាស់ក្នុងការបំពាក់ចំណេះដឹង និងបណ្តុះស្មារតីស្នេហាជាតិដល់យុវជនជំនាន់ក្រោយ។

​សិស្សានុសិស្សទាំងអស់បានទទួលចំណេះដឹងយ៉ាងទូលំទូលាយ ដែលជាមូលដ្ឋានគ្រឹះក្នុងការការពារសម្បត្តិវប្បធម៌ និងធម្មជាតិរួមមាន ប្រវត្តិសាស្រ្ត​នៃប្រាសាទកោះកេរ និងអាណាចក្រខ្មែរ។
​ច្បាប់ជួញដូរវត្ថុបុរាណដោយខុសច្បាប់​ និងផលប៉ះពាល់ធ្ងន់ធ្ងរ។ គុណតម្លៃនៃព្រៃឈើ​ និងការការពារធនធានធម្មជាតិ។ ការគ្រប់គ្រងកាកសំណល់​ប្រកបដោយប្រសិទ្ធភាពក្នុងតំបន់បេតិកភណ្ឌពិភពលោក។

​គោលដៅចុងក្រោយនៃកម្មវិធីនេះ គឺដើម្បី បំផុសគំនិតយុវជន ទាំង ២០នាក់ ឲ្យក្លាយជាអ្នកចូលរួមយ៉ាងសកម្មក្នុងការ ​ថែរក្សាការពារបេតិកភណ្ឌវប្បធម៌ជាតិ បរិស្ថាន និងធនធានធម្មជាតិ​នៅក្នុងតំបន់របស់ពួកគេផ្ទាល់។

ពួកគេនឹងក្លាយជាអ្នកនាំសារក្នុងការផ្សព្វផ្សាយបន្ត និងជាកម្លាំងសំខាន់នាពេលអនាគតក្នុងការទប់ស្កាត់ការបាត់បង់សម្បត្តិវប្បធម៌៕

​