សហរដ្ឋអាមេរិក ៖ កាលពីព្រឹកថ្ងៃទី៩ធ្នូ អគារធំមួយនៅក្រុងញូវយ៉ក កើតមានភ្លើងឆេះដ៏សាហាវ បណ្ដាលឲ្យបាក់ដំបូលមួយផ្នែក ហើយប្រជាជនត្រូវបានជម្លៀសចេញ។ អគារUPPER WEST SIDEនោះស្ថិតនៅតំបន់ម៉ាន់ហាតាន់។…
សហរដ្ឋអាមេរិក ៖ កាលពីព្រឹកថ្ងៃទី៩ធ្នូ អគារធំមួយនៅក្រុងញូវយ៉ក កើតមានភ្លើងឆេះដ៏សាហាវ បណ្ដាលឲ្យបាក់ដំបូលមួយផ្នែក ហើយប្រជាជនត្រូវបានជម្លៀសចេញ។
អគារUPPER WEST SIDEនោះស្ថិតនៅតំបន់ម៉ាន់ហាតាន់។ តាមកាសែតញូវយ៉កប៉ុស្តិ៍ថា ភ្លើងចាប់ឆាបឆេះនាវេលាម៉ោង៨និង២០នាទីម៉ោងក្នុងស្រុក នៅជាន់ខាងលើបំផុតនៃអគារមានកម្ពស់៦ជាន់នោះ មុនពេលឆេះរាលដាលដល់លំនៅឋានជាច្រើន និងបណ្ដាជាន់ខាងក្រោម។ ក្រុមអ្នកពន្លត់ភ្លើងបានលើកមកដល់ភ្លាមៗ ហើយប្រាប់ថាជាន់ខាងលើបំផុត ត្រូវភ្លើងឆេះពេញទំហឹង ហើយដំបូលអគារត្រូវបាក់មួយផ្នែក។
បណ្ដាអ្នកជួយសង្គ្រោះត្រូវដកចេញពីជាន់ខាងលើនោះ ពេលដំបូលចាប់ផ្ដើមបាក់ធ្លាក់។ ក្រុមអ្នកពន្លត់ភ្លើងបន្តការពន្លត់ពីខាងក្រៅអគារដោយប្រើជណ្ដើរ និងបាញ់ទឹក។ ប៉ុន្តែធាតុអាកាសត្រជាក់ខ្លាំងបំផុត នាំឲ្យមានការលំបាកព្រោះទឹកដែលប្រើបាញ់ឆាប់កកភ្លាមៗ។
តាមសេចក្ដីប្រកាសមួយរបស់ក្រុមអ្នកពន្លត់ភ្លើងក្រុងញូវយ៉កថា មនុស្ស៣នាក់ ត្រូវបានបញ្ជូនទៅមន្ទីរពេទ្យជាមួយរបួសស្រាល ហើយអ្នកពន្លត់ភ្លើងម្នាក់រងការរលាក។ ជាមួយអន្តរគមន៍របស់អ្នកពន្លត់ភ្លើងដល់ទៅប្រមាណជា១៤០នាក់ ភ្លើងត្រូវបានពន្លត់នាវេលាម៉ោង១០និង៣០នាទី។ មូលហេតុនៃភ្លើងឆេះនោះនៅមិនទាន់ដឹងនៅឡើយ៕
ចែករំលែកព័តមាននេះ