រាជធានីភ្នំពេញ ៖ អ្នកនាំពាក្យក្រសួងការពារជាតិកម្ពុជាបានគូសបញ្ជាក់ថា គោលដៅនៃការបាញ់ប្រហារការពារខ្លួនរបស់វីរកងទ័ពកម្ពុជា ផ្តោតសំខាន់តែទៅលើគោលដៅយោធាថៃតែប៉ុណ្ណោះ ។ ក្នុងសន្និសីទសារព័ត៌មាន ស្ដីពី «បច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការវាយប្រហារមុនមកលើកងទ័ព…
រាជធានីភ្នំពេញ ៖ អ្នកនាំពាក្យក្រសួងការពារជាតិកម្ពុជាបានគូសបញ្ជាក់ថា គោលដៅនៃការបាញ់ប្រហារការពារខ្លួនរបស់វីរកងទ័ពកម្ពុជា ផ្តោតសំខាន់តែទៅលើគោលដៅយោធាថៃតែប៉ុណ្ណោះ ។
ក្នុងសន្និសីទសារព័ត៌មាន ស្ដីពី «បច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការវាយប្រហារមុនមកលើកងទ័ព និងជនស៊ីវិលកម្ពុជា » នៅព្រឹកថ្ងៃទី១០ ធ្នូ
ឆ្នាំ២០២៥ នៅទីស្តីការគណៈរដ្ឋមន្ត្រី លោកជំទាវឧត្តមសេនីយ៍ឯក ម៉ាលី សុជាតាអ្នកនាំពាក្យក្រសួងការពារជាតិបានលើកឡើងថា គោលដៅរបស់កម្ពុជាបាញ់តបតទៅភាគីថៃវិញផ្តោតគោលដៅរបស់យោធាថៃប៉ុណ្ណោះ ខុសប្លែកពីយោធាថៃបាញ់សំដៅមកលើប្រាសាទនានារបស់កម្ពុជា ដែលជាសម្បត្តិបេតិកភណ្ឌពិភពលោក ដែលមកពេលនេះបានប៉ះពាល់ប្រាសាទព្រះវិហារ និងប្រាសាទតាក្របី ។ បន្ថែមពីលើនេះ យោធាថៃក៏បាញ់ឆ្ពោះមកលើផ្ទះរបស់ប្រជាពលរដ្ឋខ្មែរដែលបានធ្វើឲ្យជនស៊ីវិលស្លូតត្រង់របស់កម្ពុជាភៀសខ្លួនរត់រកកន្លែងសុវត្ថិភាព ។
លោកស្រីបញ្ជាក់ថា «គោលដៅនៃការប្រហារពីសំណាក់របស់កងកម្លាំងប្រដាប់អាវុធគ្រប់ប្រភេទការពារខ្លួនរបស់កម្ពុជា ផ្តោតគោលដៅរបស់យោធាថៃប៉ុណ្ណោះ មិនសំដៅលើជនស៊ីវិល ឬក៏ទីកន្លែងស៊ីវិលណាមួយនោះទេ» ។
លោកជំទាវអ្នកនាំពាក្យក៏បានអំពាវនាវឲ្យភាគីថៃ វិលត្រឡប់មកអនុវត្តវិញនូវបទឈប់បាញ់ និងសេចក្តីថ្លែងការណ៍រួម ស្តីពីកិច្ចព្រមព្រៀងសន្តិភាពកម្ពុជា-ថៃដែលចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ក្រោមការធ្វើជាសាក្សីរបស់លោក ដូណាល់ ត្រាំ ប្រធានាធិបតីសហរដ្ឋអាមេរិក និងលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងប្រធានអាស៊ានប្តូរវេន ៕
ចែករំលែកព័តមាននេះ