រាជធានីភ្នំពេញ ៖ ដោយសារតែការឈ្លានពានយោធាខុសច្បាប់ និងគួរស្អប់ខ្ពើមរបស់ប្រទេសថៃ បានបាញ់ប្រហារ មកលើអធិបតេយ្យ និងបូរណភាព នៃប្រទេសកម្ពុជា មិនគិតថា ប្រជាពលរដ្ឋស្លូតនោះទេ…
រាជធានីភ្នំពេញ ៖ ដោយសារតែការឈ្លានពានយោធាខុសច្បាប់ និងគួរស្អប់ខ្ពើមរបស់ប្រទេសថៃ បានបាញ់ប្រហារ មកលើអធិបតេយ្យ និងបូរណភាព នៃប្រទេសកម្ពុជា មិនគិតថា ប្រជាពលរដ្ឋស្លូតនោះទេ គិតមកដល់ត្រឹមថ្ងៃទី៩ ខែធ្នូ ឆ្នាំ២០២៥ សាលារៀន ចំនួន៥១៤កន្លែង បានបិទទ្វារ ធ្វើឱ្យប៉ះពាល់ដល់ការសិក្សារបស់សិស្សប្រមាណ ១៣ម៉ឺននាក់ និងការបំពេញការងាររបស់គ្រូបង្រៀន ៤,៦៥០នាក់ នេះបើតាមការឱ្យដឹងពីសំណាក់ក្រសួងអប់រំ យុវជន និងកីឡា ។
យោងតាមបណ្តាញសង្គមរបស់ក្រសួងអប់រំ នៅល្ងាចថ្ងៃទី៩ ខែធ្នូ ឆ្នាំ២០២៥ បានបង្ហាញផលប៉ះពាល់ ដែលកើតចេញពីការឈ្លានពានពីយោធាប្រទេសថៃ មានដូចជា ៖ ស្រុកជាំក្សាន្ត ខេត្តព្រះវិហារ ទទួលរងផលប៉ះពាល់ទាំងស្រុង ដែលធ្វើឱ្យសាលារៀនចំនួន ៦១ផ្អាកដំណើរការ និងប៉ះពាល់ដល់ការសិក្សារបស់សិស្សចំនួន ១៣,៦៦៥នាក់ គ្រូបង្រៀនចំនួន ៤៩៣នាក់។ ខេត្តឧត្តរមានជ័យ ទទួលរងផលប៉ះពាល់ទាំងស្រុង ដែលធ្វើឱ្យសាលារៀនចំនួន ២៦០ផ្អាកដំណើរការ និងប៉ះពាល់ដល់ការសិក្សារបស់សិស្សចំនួន ៥៥,៧៣១នាក់ គ្រូបង្រៀនចំនួន ២,៣៤៤នាក់។ សាលារៀននៅជាប់ព្រំដែនចម្ងាយ ១០គីឡូម៉ែត្រ មានចំនួន ៣២សាលា ក្នុងនោះមានស្រុកបន្ទាយអំពិលចំនួន ៨ ក្រុងសំរោង ចំនួន ១២ ស្រុកអន្លង់វែង ចំនួន ៤ និងស្រុកត្រពាំងប្រាសាទចំនួន ៨ ។
ក្រសួងអប់រំ បានឱ្យដឹងបន្ថែមថា ចំពោះសាលារៀនសរុប ១៨៦ ក្នុងក្រុង ស្រុកចំនួន ៥ ក្នុងខេត្តបន្ទាយមានជ័យ បានផ្អាកដំណើរការ និងប៉ះពាល់ដល់ការ សិក្សារបស់សិស្សចំនួន ៥៨,៧៥៤នាក់ គ្រូបង្រៀនចំនួន ១,៧៩០នាក់។សាលារៀនចំនួន ៥ ក្នុងស្រុកវាលវែង ខេត្តពោធិ៍សាត់ បានផ្អាកដំណើរការ និងប៉ះពាល់ដល់ការសិក្សារបស់សិស្ស ចំនួន ៨៩១នាក់ គ្រូបង្រៀនចំនួន ២០នាក់។ ក្នុងនោះ វិទ្យាល័យប្រម៉ោយ និងវត្តប្រម៉ោយ ត្រូវបានយកជាទីតាំងស្នាក់នៅ បណ្តោះអាសន្ន របស់ប្រជាពលរដ្ឋដែលភៀសសឹកមកពីឃុំថ្មដា។
ដោយឡែកសាលារៀនចំនួន ២ ក្នុងស្រុកមណ្ឌលសីមា ខេត្តកោះកុង បានផ្អាកដំណើរការ និងប៉ះពាល់ដល់ការសិក្សារបស់សិស្ស ចំនួន ៥៥នាក់ គ្រូបង្រៀនចំនួន ៣នាក់។សាលារៀនក្នុងស្រុកចំនួន ៤ នៅខេត្តបាត់ដំបង ជាប់ព្រំដែនកម្ពុជា-ថៃ រួមមានស្រុកសំឡូត ស្រុកសំពៅលូន ស្រុកកំរៀង និងស្រុកភ្នំព្រឹក ពុំទាន់ផ្អាកដំណើរការនៅឡើយទេ ប៉ុន្តែសិស្សអវត្តមានច្រើន៕
ចែករំលែកព័តមាននេះ